ဘိၪ့လ့ၩဖၭဆၧၫ့ထီ ၅နွ့ၫလနွ့ၫ မုအီၪပွံၩနံၩ (စယီဟၫ့ (၁၄:၁-၁၂)

ယ့ၫၡုၬမွဲဖၧၩ့ၥၭလၧအၥိၫ့ပၧၩလၧဖါအီၪ. နၥံၪဝ့ၫဒၪယီၩထီးၥုၪ့ခိၥၭဝီၩလဂ့ၩ, နဲၩထဲၩ့ယွၩတၭ, နဲၩထဲၩ့ယၧၩဆ့ဆံၭ.- လၧယဖါအီၪဝ့ၫအလး နီၪ, နီးလဖၪအီၪဝ့ၫအၪစီၪ့လီၫ. အ့ၪလမွဲဘၪဘဲၫနီၪ, ယလီၩဘၪယူၭနၥံၪယူၭတၭ, မွဲလၧယလ့ၩတဲၩ့ဝဲၩနၥံၪအလး လစီၪ့အကၠီၩ့လီၫ.- ယအ့ၪလ့ၩတဲၩ့ဝဲၩ နၥံၪအလးလစီၪ့နီၪ, ဘဲၫၥိၭနၥံၪမိအီၪဘၪ ထီးယအီၪအလးနီၪ ယမိဂဲၫထဲၩ့ဒီၭတၭ, မၩန့နၥံၪလၧယအီၪလီၫ. ထီးဒၪယလ့ၩဆၧလစီၪ့နီၪ, မွဲနၥံၪၥ့ၪယၫဒဲဖၧၩ့ၥၭနီၪ နၥံၪၥ့ၪယၫဆ့လီၫ.  စထီမၭစံၭဝ့ၫ,ကဆါဧ့, မွဲနလ့ၩခီၫခီၫလဲၪနီၪ ပလၥ့ၪယၫဘၪတၭ, မွဲပၥ့ၪယၫဖၧၩ့ၥၭနီၪ မိၥ့ၪဘဲၫၥ့ၪလဲၪ. ယ့ၫၡုၬစံၭဆၧၫ့ဝ့ၫ, ယဝ့ၫဒၪယီၩ ယမွဲဖၧၩ့ၥၭ, ဒဲဆၧမွဲဆၧတီၩ, ဒဲဆၧမၧၫ့လီၫ. အ့ၪလမွဲဘၪလၧယၧၩယီၩ ၦထီၩ့လၧဖါအအီၪနးဂၩအ့ၬ. နၥံၪအ့ၪၥ့ၪယၫယၧၩတၭ, မွဲနၥံၪမိၥ့ၪယၫယဖါဆ့လီၫ. တၭအယီၩစူၩယၫနၥံၪၥ့ၪယၫအဝ့ၫနီၪတၭ, မွဲနၥံၪဒၪဘၪယူၭဆ့လီၫ. စဖံလံၭစံၭအဝ့ၫ, ကဆါဧ့, ဒုၭနဲၪပၧၩလၧဖါတၭ, မိမံၫ့ၥုၪ့မံၫ့ၥၭပၧၩလီၫ.- ယ့ၫၡုၬစံၭအဝ့ၫ, စဖံလံၭဧ့, ယအီၪလၧနၥံၪအၥိၭ ယံၬခီးယီၩတၭ, မွဲနၥံၪၥ့ၪယၫယၧၩဒံၭအ့ၬဧၪ. ၦလၧအဒၪဘၪယၧၩယီၩ မွဲအဒၪဘၪယူၭဖါဆ့လီၫ. အ့ၪမွဲဘဲၫနီၪတၭ, မွဲဘၪနီၫ နစံၭဒုၭနဲၪပၧၩလၧဖါနီၪလဲၪ. ယအီၪလၧဖါအဖၧၩ့, ဒဲဖါအီၪလၧယဖၧၩ့နီၪ မွဲနနဲၩအ့ၬဧၪ. ဆၧချဲၩ့လၧယလီၩဘၪနၥံၪယီၩ မွဲယလီၩဘၪဒၪယဝ့ၫအ့ၬ. ဆၧလၧယမၩယဝ့ၫနီၪ မွဲဖါအီၪလၧယဖၧၩ့မၩဆၧလီၫ. နဲၩထဲၩ့ယၧၩ လၧယအီၪလၧဖါအဖၧၩ့, ဒဲဖါအီၪလၧယဖၧၩ့ဆံၭ. အ့ၪလမွဲဘၪဘဲၫနီၪတၭ, နဲၩလၧယဆၧမၩလဖၪအကၠီၩ့ဆံၭ. ယလီၩဘၪနၥံၪတီၩတီၩလီၩ့လီၩ့ယီၩ, ၦလၧအနဲၩထဲၩ့ယၧၩလဂၩဂၩ, ဆၧမၩလၧယမၩနီၪ မိမၩဒၪဝ့ၪဆ့တၭ, မိမၩဆၧဒိၪနဲၪ့အနီၪဒံၭလီၫ.