နးနွဲ (၂)
နးနွဲနါဂၧၫ့ ၦၡၩၥၭအွံၪဆၧ ဘူၭဘူၭဒၪအနၫ့ဆါအအီၪ ဆၧၥၭအွံၪနီၪ ပၥ့ၪလဲၪစွါဘဲၫႉ
ယမံၩ့ ထံၩ့ထိၩ့ဘၩ့ႇ ယအီၪလၧ ထံၫကျၩ ႇ နးနွဲ အၪ့ဝဲယၧၩ ႇ ကွၬလၩ့ဆဲၩလၧ ၥံၪ့ထိၬနၪႇ ယဎဲၪ့ထီးယဎဲၪ့ထၬႉ
ဆၧကဂၩနီၪ ၥၭအွံၪၥဲၩအဆၧၥၭအွံၪနီၪ ကဘျၩ့ဂီၩ့ကဘျၩ့ ထီးနးနွဲနၫ့ဖျးအၥၭကကၠၪ အနီၪမွဲ ဖိၬဖၪ့မုလီးယူၭႉ နးနွဲၥၭမဲၪဆၧနၭလ့ၬတၭ ဒူၭဘံၭအခိၪ လၧအၡၪ့ လုၬဂီၩ့ ကိၪ့မံၫထဲၩ့ဒံၭႉ
ဎွ့ၪမံၫန့လီၫ မံၫမးဘၪထဲၩ့ မွဲၥၪဆၧမံၫမးအနီၪဒီၭႉ နၫ့ဖျးအၥၭ အယီၩအကၠၪယီၩ နးနွဲမံၫထဲၩ့န့လၧၩ့အ့ၬႉ ဘၪအီၪဂူၪအၥၭ လၧအလးမံၫဖၧၩ့ ထီးဆၧဖၩ့လၫ့ကကၠၪႉ အမိအဖါၥံၪ မံၫဂဲထုၪ့ကကၠၪ နးနွဲလီၩနဲၪထဲၩ့ အဆၧကဲၪဘနီၪဘယီၩၥံၪနီၪတၭ အမိအဖါၥံၪစံၭ အဝ့ၫ ဝ့ၫ ဖိၪမုၪဧ့ႇ နထံၩထိၩ့ဘၩ့ဖိၪနီၪ လၩ့ယၫ့ၥၭနၭလ့ၬနဲၪႉ လ့ၩ လ့ၩ လ့ၩဖျါလၩ့ထဲၩ့အ့ၪ လၧထံၫကျၩဖျဲၪဖျဲၪဘီၪႉ အနၫ့ဆါနီၪ ကအီၪဒၪ လၧၥံၪ့ထိၬနၪလီၩ့နီၪလီၫဘ့ၭႉ
ဘနီၪဘိၭ နးနွဲခိၬဆၧ ထီးဆၧဖၩ့ လၫ့တုၩ့ချၭကကၠၪဂီၩ့ ဘၪလ့ၩထဲၩ့ဝ့ၫ လ့ၩဝ့ၫလၧ အၥၭဘံၭဘံၭလၥၨၩႉ အဝ့ၫလ့ၩလီၩ့ဎွါထဲၩ့ဝ့ၫတၭ ဒၪထဲၩ့အထံၩ့ထိၩ့ဘၩ့ဖိၪနီၪ မွဲဒၪ လၧၥံၪ့ထိၬနၪလီၩ့နီၪ လၩ့ဆဲၩအီၪ ဎဲၪ့ထီးဎဲၪ့ထၬဖိၪနီၪလီၫႉ နးနွဲဖီၪ့လၫ့ထံၩ့ထိၩ့နီၪ လ့ၩဆိၬန့ဝ့ၫ လၧစၩ့ဖိၪနဲၩ့တၭ ခွံၬလၩ့ထဲၩ့ဝ့ၫလၧ ထံၫကျၩဂီၩ့ ဂဲၫထဲၩ့ထဲၩ့လၧဂံၪ့နီၪလီၫႉ တၭ ၦၡါဖိၪယီၩ ထုၬဝ့ၫဒၪနီၪလီၫႉ
