ဘိၪ့လ့ၩဖၭဆၧၫ့ထီ မုအီၪပွံၩနံၩ ၄နွ့ၫလနွ့ၫ

ဆၧချဲၩ့ဒီၩ့ဘၪဆဲၫ့ၦယူၬၥိၪ. (စယီဟၫ့ (၁၀:၁-၁၀) ယလီၩဘၪနၥံၪ တီၩတီၩလီၩ့လီၩ့ယီၩ, ၦလၧအဂဲၫနုၬဝ့ၫ လၧၥိၪအဖီၩ့ဖၧၩ့ လၧအလမွဲဘၪ လၧတရၫ့ အဖၧၩ့နီၪတၭ, အ့ၪဂဲၫခၫ့ဖၬ လၧအလးလစီၪ့ဒၪနီၪ, မွဲဆၧဂူၪဆၧဘျၪ,ဒဲထမျိၭထမျၬလီၫ. အ့ၪမွဲၦလၧ အဂဲၫနုၬဝ့ၫလၧတရၫ့လဂၩနီၪ မွဲၥိၪအၡၩယူၬၥိၪလီၫ.  ၦအီၪခိၭတရၫ့လဂၩနီၪ ဝဲထၪ့န့ဝ့ၫအဂးတၭ, အၥိၪလဖၪခိၭနၪအလူတၭ, ကိၭထၪ့အၥိၪဒၪဝ့ၫ လၧအမံၩ့တၭ,စဲၪ့ထၪ့ဂၧၩ့အဝ့ၫၥံၪလီၫ.- ထီးအဒုၭစဲၪ့ထၪ့ အၥိၪဒၪဝ့ၫထီးအလူၬနီၪ, လ့ၩထၪ့လၧယၫတၭၥိၪလဖၪဖိၬထၪ့အခဲၫ့လီၫ. အဂဲးဘဲၫယီၩ ၥ့ၪယၫဝ့ၫအလူလီၫ.- အ့ၪမွဲၦမွံၩနီၪ ဖိၬဝ့ၫအခဲၫ့အ့ၬ. မွဲအစဲၪ့ခွံၬဒၪဝ့ၫ လၧအအီၪလီၫ. အဂဲးဘဲၫၫယီၩ ၥ့ၪယၫၦမွံၩအလူအ့ၬ. ယ့ၫၡုၬလီၩလၩ့လၬလၩ့ၦလဖၪနီၪ လၧဆၧချဲၩ့အဒီၩ့ယီၩ လါနၫ့ဘိၩ့, ဆၧလၧအလီၩဘၪအဝ့ၫၥံၪနီၪ မွဲအနၪဝ့ၫၥ့ၪအ့ၬ. ယ့ၫၡုၬမွဲၦယူၬၥိၪအဂ့ၩ. မၩအၥၭဘဲၫနီၪတၭ, ယ့ၫၡုၬစံၭဒီၭဝ့ၫ, ယလီၩဘၪနၥံၪ တီၩတီၩလီၩ့လီၩ့ယီၩ, ယဝ့ၫဒၪယီၩ ယမွဲၥိၪဖီၩ့အတရၫ့လီၫ.- ကယဲၦလၧအဂဲၫဆိၫဝ့ၫလၧယမ့ၬယၫ လဂၩဂၩနီၪ, မွဲဆၧဂူၪဆၧဘျၪ ဒဲထမျိၭ ထမျၬလီၫ. အ့ၪမွဲၥိၪလဖၪခိၭနၪအလူအ့ၬ. ယဝ့ၫဒၪယီၩ ယမွဲတရၫ့လီၫ. မွဲလၧယကၠီၩ့ယီၩ ၦအ့ၪဂဲၫနုၬဝ့ၫနီၪ, မိထီၩ့လၧဆၧထိးထဲၩ့တၩ့ထဲၩ့ဝ့ၫတၭ, မိနုၬစဲၪ့ထၪ့နုၬစဲၪ့ထၪ့ဝ့ၫတၭ, မိဒၪန့ဆၧအၪ့ဆၧအီၩလီၫ. ဆၧလၧဆၧဂူၪဆၧဘျၪနီၪ, အ့ၪလမွဲဘၪဘဲၫၥိၭ အမိအၪ့ဂူၪဆၧဒဲ မၩၥံၫဆၧ, ဒဲမၩဂၭဂီၩ့ဆၧအကၠီၩ့တၭ, ဂဲၫဝ့ၫအ့ၬ. အ့ၪမွဲယဝ့ၫဒၪယီၩ ဘဲၫၥိၭအဝ့ၫၥံၪမိန့ဘၪ ဆၧမၧၫ့ဒဲန့ ဘၪဝ့ၫအၪအၪလ့ၬတၭ, ယဂဲၫယဝ့ၫဒၪလီၫ. ယဝ့ၫဒၪယီၩ ယမွဲၦယူၬၥိၪလၧအဂ့ၩလဂၩလီၫ. ၦယူၬၥိၪလၧအဂ့ၩလဂၩယီၩ, အီၪက့ၪလၩ့ခွံၬအၥၭလၧၥိၪအဂးလီၫ.