အီၪလၧမူၭခိၪ ၡၪကဖိၪ
ဂၪ့ခိၪချိၫ့ဖၧၩ့ အကၪဂဲၩထုၬနီၪ ဆၧနူၭဆဲၭထွ့ၫ လအီၪဘၪအဖၧၩ့ ပဘၪယဲၩ့ခွံၬလိၬၥၭလီၫႉ အထံၩၥိၭ အၪဝ့ၫဒဲ အီၪၥ့ၪမုၬမုၬ ဖိၪခွၫကဂၩအဆၧနံမွံၫၥံၪ အ့ၪလအီၪလၧၩ့ဘၪကကၠၪ ဂံၪ့ဖိၪယီၩ မုၬလၩ ဘဲၫအဂုအိၩအၥိၭ မွဲကန့အလၧၫ့အဎွ့ၩလၧၩ့အ့ၬႉ
ဆၧနၪ့ထၪ့လဖၪနီၪ ကအီၪထးလဆိၩယၫလီၫႉ
အဝ့ၫယီၩ လၧအထံၩၥိၭကျၩ ဖ့ၪလၫ့ဆၧမုၬလၩၥၭဎွံၪန့ဝ့ၫဒၪႇ လီၩ့အထံၩၥိၭအၪမၬဂီၩ့ အီၪၥ့ၪမုၬမုၬ ၥၭဘၪ့ကဂၩလီၫႉအဝ့ၫယီၩအီၪဘၪလၧဂၪ့ခိၪချိၫ့ဖၧၩ့ကဆိလီၫလါနၫ့ အဝ့ၫအီၪက့ၪထး ဆၧနၪ့ထၪ့အဆၧနဲၪ့လ ဖၪ အီၪဝ့ၫအၪမၬလီၫႉ လၧဂံၪ့ဒီၪ့ဖိၪၥံၪအအီၪ န့ဘၪဆၧအဲၪဆၧကွံၩအလၧၫ့အဎွ့ၩအကၠီၩ့ အဝ့ၫဂဲၫထီၩ့စိၩလၧ ဂၪ့ခိၪချိၫ့ယီၩနီၪ အဝ့ၫအဂးလၧၫ့ဎွ့ၩလီၫႉ
အီၪက့ၪဒိၪ အဝ့ၫအီၪၥ့ၪမုၬမုၬနီၪလါဆံၭႉ
အဝ့ၫယီၩ အီၪၥ့ၪမုၬမုၬလၩလၩဒဲ အဲၪဒိၭဆၧပျီၩဖျ့ၭတၭ ပမီၪ့ဘၪအဝ့ၫအခံၫ့ ခီၫခီၫ ပကဂၪ့ ပကၥၭ အုၭနီၪ လၧအဝ့ၫအီၪဒံၭအခံၫ့အိၩ လၧအဝ့ၫကၠၧၫ့ကၠၧၫ့ ပဂဲၫထဲၩ့မုၬလၩထၬလဖၪနီၪအၪ့ဎၬထဲၩ့ဂီၩ့ ကျ့ၭစၨၭနံမွံၫထဲၩ့လါဆံၭႉ အ့ၪမွဲအဝ့ၫ ကၥ့ၪယၫ အမိဖါထၧၫ့ဖုဝဲၥံၪႇ အထံၩၥိၭၥံၪ အမ့ၬထံၫဘၪ လၩ့လၧ အဝ့ၫအဂးစွါဘဲၫ မွဲအဝ့ၫကဘၪၥၭအ့ၬႉ
လၧခဲၫ့ထုၬဖၧၩ့ၥၭနီၪ မွဲမုၬၡူၪဒၪဝ့ၫနဲၪ
ဆၧၥံၫကမံၩ့နီၪ ကဂဲၫထီၩ့အခံၫ့ပၥ့ၪလဲၪ ၦၡၩၥ့ၪယၫထၬနးဂၩအ့ၬႉ အဝ့ၫအဂး ပကမၩဘိၪ့မၩဆၧၩ့ ဆၧဂီၩ့ အဝ့ၫဂဲၫထဲၩ့အီၪဘၪလၧမိဖါဘူၭထံးလဖၪ အထံၩၥိၭလဖၪမုၬမုၬလၩလၩအကၠီၩ့ အဝ့ၫအဆၧ ၥၭမၧၫ့ ထၧၫ့ဖျီၩ့ယၫယီၩ အဝ့ၫအဂး မွဲလၧၫ့ဎွ့ၩဝ့ၫဒၪ ပကဆီၫ့မီၪ့ကၠၭ ဘဲၫနီၪအၥိၭဆံၭႉ ပဂံၪ့ဒီၪ့ဖိၪကဂၩ လအီၪလၧၩ့ဘၪ ဆၧၥၭအုၭယီၩနီၪ ပအၪ့လဲၩလၧဆၧၥၭအုၭဂူၫဂၩမွဲလန့ဘၪလီၫႉ လါနၫ့ အဝ့ၫယီၩ လၧၦအၪဂၩအအီၪ န့ဘၪဆၧအဲၪဆၧကွံၩအၪမၬလ့ၬအကၠီၩ့ အဝ့ၫယီၩ မွဲအဆၧ ဘိၪ့ဆၧထးဂ့ၩဝ့ၫဒၪ ၥၭဘၪ့ကဂၩလီၫႉ အဝ့ၫအီၪက့ၪထး ဆၧနၪ့ထၪ့ဆၧနဲၪ့လဖၪနီၪ ပကဖီၪ့ထၬဂီၩ့ ထီလၧယၫမုနံၩမုၥၫ့အဖၧၩ့ ပကဲၪဂံၪ့ဒီၪ့ဖိၪလဖၪႇ အထံၩၥိၭဘူၭထံးလဖၪ ဒဲ ၦမၩဎုၬဆၧမၩလၧအဝ့ၫ ကၠၧၫ့ကၠၧၫ့ ပဝ့ၫၥံၪလဖၪ ပကဘၪကျ့ၭစၨၭအီၪက့ၪထၬ ပၥၭခၧၫ့ခၧၫ့နီၪလီၫႉ အဝ့ၫအဂး ပကဆုး ထဲၩ့အၪ့ကံၩဘၩဆိၪဖၪလါဆံၭႉ လၧအဝ့ၫ အဂံၪ့ဒီၪ့ဖိၪၥံၪ ဒဲ အထံၩၥိၭလဖၪ အၥၭဖၧၩ့ အဝ့ၫယီၩ မွဲကဖၩ့ထၪ့လဆိၩၡၩ ၡၪကဖိၪနီၪလီၫႉ #RVAPwoKaren#SaEiVin#Familylove#friendshiplove
