နးနွဲ (၁)

လၧဖျိၩ့ဖျိၩ့အိၩ ၦမုၪနၩ့ဖိၪအီၪကဂၩႇ အမံၩ့မွဲ နးနွဲႉ ဆၧလၧနွဲနီၪ မွဲၥံၪ့အဂ့ၩထုၬကမံၩ့ လၧၦဖျိၩ့ခိၪလီၩ့ခိၪဖိၪၥံၪ အဲၪဒိၭနၭလ့ၬႉ ယစံၭခိၪလီၩ့နီၪ မွဲဒၪ ခိၪလီၩ့ၥံၪလၧ ပထံၫထၪကျိၩ့ယီၩနီၪလီၫႉ မွဲခိၪလီၩ့ လၧမုထၪ့ယဲၩ့ယိၬလၧအိၩနီၪအ့ၬႉ

ဆၧလၧနွဲနီၪ ၥံၪ့အယၫမွဲနီၩ့ဆ့ အလွ့ဖိၪဘၩ့ဘၩ့နီၪ ပဒၪမဎံၪဆ့ႉ ၦမုၪနၩ့ဖိၪယီၩ အမိအဖါကိၭန့အ့ၪအမံၩ့ လၧ နးနွဲနီၪ ကမွဲဒၪအဖံၭအယၫဎံၫလၩနၭလ့ၬ အကၠီၩ့နီၪလီၫႉ ကနံၩနီၪတၭ နးနွဲလ့ၩလၩ့ အၪ့ဝဲယၪ လၧခိၪလီၩ့ခၪ့ထံၭ စၩ့ဖၧၩ့နီၪ အၪ့ဝဲဆၧဎွ့ၫန့လၫ့ယၪဖိၪကဆံၭကခ့ဒံၭလီၫႉ ထံၩ့ထိၩ့ဘၩ့ကဘီၩ့ ဂဲၫထဲၩ့ပၫလၧ ၥနဲးဖၧၩ့ အဝ့ၫၥံၪအဂံၪ့ဒီၪ့ဖိၪၥံၪနီၪ အၪ့ထံၩ့ထိၩ့နးမံၩ့အ့ၬႉ ဘနီၪတၭ အဝ့ၫဘၪခွံၬလၩ့ထဲၩ့ဝ့ၫ လၧထံၫကျၩလၥၨၩႉ ခိၬနီၪ နးနွဲအၪ့ဝဲဒီၭ ယံၬအ့ၬ ထံၩ့ထိၩ့ဘၩ့နီၪ ဂဲၫထဲၩ့ဒီၭႉ ခိၬလၩ့ဒီၭ အၪကၠၪ အၪကၠၪမၬနီၪ အဝ့ၫအၥၭဆၧၩ့လၧၩ့အ့ၬယါႉ ဖီၪ့န့ထံၩ့ထိၩ့နီၪတၭ လ့ၩထၪ့လၧခီၫ့ၥံၭခိၪ ဘျၭလၫ့ထၬခွံၬထံၩ့ထိၩ့နီၪ လၧၥံၪ့ထိၬနၪလီၩ့ကထုၪလီၫႉ အနီၪကဲၪဘလဲၪကဲၪႉ

ဘဲၫနီၪမၬဆံၭ နးနွဲအၪ့ဝဲထဲၩ့ဘၪဆၧ မုၬမုၬရူၪရူၪလီၫႉ ထီးမၩန့ယၫ လၧၫ့အၪ့အထၧၫ့ဖိၪမိ ထၧၫ့ဖိဖါၥံၪအဂးဂီၩ့ အဝ့ၫဂဲၫထဲၩ့ထဲၩ့လၧဂံၪ့ႉ လၧကနၩနီၪ နးနွဲမံၫတၭ မံၫမးဆၧဘယီၩ ဘဲၫအ့ၬဧၪႉ လၧအဆၧမံၫမးဖၧၩ့နီၪ အဝ့ၫဘၪလ့ၩဆၧ လၧဆၧခံၭကျၩကဂၩလီၫႉ ဆၧခံၭနၭလ့ၬတၭ မထီၩ့အလးခလဲၪနီၪ စီၪဝါဘၪအ့ၬႉ အဝ့ၫၥံၪယၪ ကမံၩ့နီၪ လၧအအီၪလၧၡိၬကျၩကစီၪ့စီၪ့ဒၪဘနီၪလီၫႉ တၭ အီၪဘနီၪကဆိဖိၪဂီၩ့ နါဂၧၫ့ၦၡၩၥၭအွံၪဆၧ ဘူၭဘူၭဒၪအနၫ့ဆါအအီၪနီၪႉ ဆၧၥၭအွံၪနီၪ ပၥ့ၪလဲၪဒဲ ၡါဖိၪယီၩ ကဆုးဂဲၫကဲၪထၪ့ ဘဲၫၥ့ၪလဲၪနီၪ လၧခဲၫ့မုနွ့ၫမၬ ယကဆုးလီၩ့အ့ၪဘၪနၥံၪနဲၪႉ ဆၧခိးဆၧတၩႉ