ဘဲၫၡၩနဲၩ့ဎီၩ့ကဆီၪ့ချဲၫ့အဂးယိထွ့ၫဆၧဖိၪဆၧဎါလၧအီၪၡိၬကျၩလဖၪဆံၭ
လၧနံၪ့ ၂၀၀၀အလးခဲၫ့ ဆၧခၫအၥၫ့လဖၪဒဲ ခိဆၧၩ့ချံၪ့အၪ့လဲၩ့ထၪ့အၥၭလဖၪ ဂဲၫအၪထၪ့နီၪ မွဲပကထုၪ့ၥုၪ့ထုၪ့ၥၭကၠၭကိၭ ဂၩဆ့လီၫႉ ၥံၪ့ကျိၭလဖၪ လူၬပျီၩ့ခွံၬႇ လၧၥနိၫ့လအီၪဘၪအဖၧၩ့ ဆၧမၩလဲးထၪ့ဖံၬၥုၪ့ဆၧဒဲ ဆၧမၩၥံၫဆၧဖိၪဆၧဎါၥံၪ လၧအအီၪ လၧၡိၬကျၩလဖၪၥံၪ အကၠီၩ့ စၭထၪ့လၧ နံၪ့ ၁၉၇၀ထီးထီၩ့စိၩ ၂၀၁၆နံၪ့အထီ ဆၧဖိၪဆၧဎါလၧ အီၪၥၭမၧၫ့လၧ ၡိၬကျၩလဖၪ ဘၪၥံၫလူၬပျီၩ့ခွံၬ ဝ့ၫဒၪ ၆၈ယၩဒူၩအကၠီၩ့ ခရၧၫ့လၧအယိထွ့ၫ ဆၧဖိၪဆၧဎါလၧအီၪၡိၬကျၩလဖၪ ထူၭထၪ့ထၬဝ့ၫဒၪအီၪနီၪလီၫႉ ၦၡၩၥံၪအဆၧမၩအကၠီၩ့ ၥံၪ့ကျိၭလဖၪ လူၬပျီၩ့ထၪ့ခွံၬဂီၩ့ ဆၧဖိၪဆၧဎါလၧ အီၪၡိၬကျၩလဖၪ ဂဲၫလၩ့ဘူၭထၪ့လၧ ၦၡၩအကၠီၩ့ ဆၧဆၫၥံၪ ဂဲၫကဲၪထၪ့နီၪလီၫႉ ၦၡၩၥံၪအဲၪဒိၭ ဆၧဖံၭဆၧယၪၥံၪအကၠီၩ့ ဂဲၫထဲၩ့ဖီၪ့ထၬ ဆၧဖိၪဆၧဎါၥံၪအၪမၬဂီၩ့ ၦၡၩဒဲ ဆၧဖိၪဆၧဎါၥံၪအီၪဘူၭထၪ့အကၠီၩ့ ဆၧဒၪထၪ့ ဆၧဆၫၥံၪလဖၪ ဂဲၫအၪထၪ့နီၪလီၫႉ
မွဲဆၧဘဲၫနီၪ ဂၪ့ခိၪအခရၧၫ့ဖၭဒိၪလၧ အယိထွ့ၫ ဆၧဖိၪဆၧဎါလၧအအီၪၡိၬကျၩလဖၪနီၪ အဝ့ၫၥံၪ ဘၪပဂၪ့ၪထၪ့ယံၫယါဝ့ၫကိၭကၠၪဒ့ၭနီၪ မနီၫလဲၪစွါဘဲၫ ဆၧယိထွ့ၫထၪ့ၥံၪ့ကျိၭဒဲ ဆၧမၩၥံၫအၪ့ ဆၧဖိၪဆၧဎါလၧအီၪၡိၬကျၩလဖၪ ပဒၩ့အ့ၪအဂးနီၪလီၫႉ လကၭဒံၭဘၪ ဘဲၫဆၧအၪ့ဆၧအီၩလဖၪ လဆိၫ့ဂီၩ့ဘၪႇ ဆၧလၧလလိၫဘၪလဖၪ ပကဘၪမၩလၩ့ၡၩထၪ့နီၪ ဂဲၫလိၫထၪ့ယူၭဝ့ၫနီၪလီၫႉ
ဆၧဖိၪဆၧဎါလၧ အအီၪၡိၬကျၩလဖၪ အဆၨၩ ၂၁၀၀၀အဖၧၩ့နီၪ ပကဘၪဆုးဖီၪ့ဂုးထၬ အဆၨၩ ၄၀၀၀ လိၫဝ့ၫအၥိၭ နံၪ့ ၂၀၃၀အဂး ပကဘၪပဒၩ့ဆိၫထၬအကၠီၩ့ ပကိၪ့ၥ့ၪလဖၪ ဖ့ၪကိၪ့ဖ့ၪတဲၩ့ထၬဝ့ၫနီၪလီၫႉ ပဆုးဖီၪ့ဂုးထၬ ဆၧဖိၪဆၧဎါအဆၨၩလဖၪအလးနီၪ ၦၡၩၥံၪ အဆၧအၪ့ဆၧအီၪလအၪ့လဲၩ့ထၪ့ဘၪအၥၭနီၪ မွဲပဖီၪ့ဂုးထၬကန့အ့ၬအကၠီၩ့ WFF လီၩဝ့ၫဒၪနီၪလီၫႉ WFF ဒါရိုက်တာ လန်ဘာတီနီ လီၩဝ့ၫဒၪ ၦၡၩအဆၧဆီၪ့ဆၧချဲၫ့ဒဲ ဆၧဖိၪဆၧဎါၥံၪအဆၧၥၭမၧၫ့နီၪ မွဲဆုးကျိၭအၥၭအကၠီၩ့နီၪလီၫႉ ၦလၧအမူၩဒၩအီၪလၧ WFF မွဲဝ့ၫ မၫကိၫနီၪ လီၩထၬဝ့ၫဒၪ ၦၡၩၥံၪအဆၧအၪ့ဆၧအီၪဒဲ ဆၧယိထွ့ၫပဒၩ့နဲၩ့ဎီၩ့ ဆုးကျိၭအၥၭနီၪ ပထုၪ့ၥုၪ့ထုၪ့ၥၭအ့ၬ မွဲလန့ ဘၪလီၫႉ လၧမၫဆမံၭဖၧၩ့ ယၪၥံၪႇ လၧထံၫချိၬနဲၩ့ န့ၫၥံၪနီၪ မွဲယိထွ့ၫနဲၩ့ဎီၩ့ နီၪလီၫႉ အ့ၪမွဲနဲၩ့ဎီၩ့ဂၭဂီၩ့ဂၭစၪထၪ့နီၪ ဆၧဖိၪဆၧဎါလၧ အအီၪၥၭမၧၫ့လၧ ဂၪ့ခိၪချိၫ့လဖၪ ကဂၭဂီၩ့ဂၭစၪထၪ့နီၪလီၫႉပပဒၩ့ထၬ ဆၧဖိၪဆၧဎါလၧအအီၪၡိၬကျၩလဖၪဒဲ နဲၩ့ဎီၩ့နီၪ မီၪ့ဎီၩ့ပပဒၩ့ထၬ ၡၩအဆၧဆီၪ့ဆၧချဲၫ့ဒဲ အထီလၧယၫနီၪလီၫႉ လၧခးအၫဖရံကၭ ကဆၫ့ၥံၪၥံၫႇ ခးတရူၭလံၩခံၫ ပၫ့လဲၫ့ဖၧၩ့ ဆၧဖီၪ့ယၪနၭလၨၪႇ လၧခးအုရီၩပၭ ဆၧၥိၩ့ထၪ့ ၥယ့ၫ ဆၧလဖၪၥံၪနီၪ ဘၪထံၭဆၫ ဂၪ့ခိၪထၧၫ့ဘံၪ့ယၫလီၫႉ မွဲဆၧဘဲၫနီၪ အထီလၧယၫ ဆၨၩၥၫ့ဘၪ့ၥံၪအဂး ပဖိၬလိၬထၪ့အ့ၪ ရူၪမုၬဎံၫလၩဝ့ၫဒၪ ၡၩခရၧၫ့ကန့အဂး နဲၩ့ဎီၩ့ဒဲ ဆၧဖိၪဆၧဎါလၧ အအီၪၡိၬကျၩလဖၪ ပကဘၪပဒၩ့ထၪ့ လိၫယူၭအကၠီၩ့နီၪလီၫႉ
