ၦဖိၪဎွ့ၪမုၪဖိၪ – ၄

ဖနံၬထးကၩနီၪ ၥ့ၪယၫဝ့ၫ အမၫၥၭဘီၩ့ဘၪဒၪဎီၩ့ဆၧၫ့ယၫ ဆၧနိၫ့ဆၧနၭအမံၩ့မံၩ့နီၪ အထၧၫ့မၫဝၩနံၫဂၩယီၩ ဂၪ့ကၠၭနီၪလီၫႉ အထၧၫ့မၫဝၩနံၫဂၩယီၩ ဂၪ့အခံၫ့နီၪ နါဂၧၫ့ ကျၭကဘံၪ့ ဂၪ့ကိၭလၧ ၥံၪ့ဖၭဒိၪလီၩ့နီၪလီၫႉ ကျၭနီၪ အၪ့စၪ့ နၥံၪဘၪဂၪ့ ဘၪမနီၫလဲၪ ဆၧကၪဆၧဂဲၩအ့ၪအီၪ လီၩအ့ၪယၧၩ ၥံၪ့အထံၭယီၩ အစီၩ့အမၩ့အီၪ လၧနၥံၪမိမၩဆၧလဖၪ အၪ့ကံၩ့ ကဖ့ၪလၫ့အ့ၪနၥံၪလီၫ ထိၪကျၭနီၪ စံၭၦထၧၫ့မၫဝၩနံၫဂၩနီၪ ဘဲၫယီၩၥိၭဂီၩ့ ထဲၩ့ယူၩလၫ့ဝ့ၫဒၪနီၪလီၫႉ ၦထၧၫ့မၫဝၩနံၫဂၩယီၩ နါဂၧၫ့ဘၪ လၩ့ဆၫ့ဝ့ၫဒၪ ကျၭအဆၧချဲၩ့လဖၪနီၪအကၠီၩ့ လၧအဝ့ၫၥံၪမိမၩဆၧလဖၪနီၪ အၪ့ကံၩ့ထၪ့ဝ့ၫလၧ ၥံၪ့ဖၭဒိၪအီၪနီၪလီၫႉ ကထံၪဎး လၧအဝ့ၫၥံၪလိၫဆၧလဖၪနီၪ ၥံၪ့ဖၭဒိၪ တဲၩ့လၩ့အ့ၪထီးအလူၬလီၫစွါဘဲၫႉ

ၥံၪ့ထံၭယီၩ တဲၩ့လၩ့အ့ၪအဝ့ၫၥံၪ ဂံၪ့ဖၭဒိၪဒဲ ဆၧၥုၪ့ဆၧဒီၩ့ၥံၪလၧၫ့ဎွ့ၩဝ့ၫဘဲၫ ဝံးကဝံး အထၧၫ့မၫဝၩနံၫဂၩယီၩ ဂဲၫကဲၪထၪ့ စဎွၩဒဲ နးဎွၩမုၪလၧ ကဘၪပၧၩ့ဝံးဒီၪ့နီၪလီၫႉ ၦခမျၧးၥံၪ အၪ့အူၭဘၪအဝ့ၫၥံၪလၧ စဎွၩဒဲနးဎွၩမုၪလၧ အၥုၪ့ဂ့ၩ ၥၭဘွၩနီၪလီၫႉ အဝ့ၫၥံၪ မၩဆၧၩ့ ၦၡၪ့ဖိၪၥံၪအၪမၬအကၠီၩ့တၭ ထံၫခးအဂူၫဂၩၦၡၩၥံၪလဖၪ မွဲဂဲၫၥုၭအီၪအၥၭလၧ အဝ့ၫၥံၪပၧၩ့ခး နီၪလီၫႉ ထီးနီၪ စဎွၩအမိနးဆ့ ဘၪဒၪဎီၩ့ဆၧၫ့ယၫ ဆၧကၪဆၧဂဲၩတၭ ဂဲၫထီၩ့လၧ အဖိၪခွၫပၧၩ့ခးနီၪလီၫႉ

အထီနီၪ ဖံၫၥၭၡါနီၪ မွဲလၧၥ့ၪယၫလၧၩ့ဘၪအဒဲၪမုၪဒဲ အဖိၪခွၫနီၪလီၫႉ အဝ့ၫဘၪအၪ့အီၪၡၪ့ၡၪ့ယါယါ လါနၫ့ အဒဲၪ့မုၪနီၪ ၥ့ၪယၫအမံၩ့ၡါမုၪ ဂ့ၩဂ့ၩနီၪလီၫႉ မွဲဆၧဘဲၫနီၪ အမံၩ့ၡါမုၪဘၪဒၪဎီၩ့ဆၧၫ့ယၫ ဆၧနိၫ့ဆၧနၭနီၪ မွဲယိဝ့ၫလထၪ့ဘၪဒဲ ကမိမၩဆၧၩ့ဝ့ၫလီၫႉ အမံၩ့ၡါမုၪယီၩ မၩနၧၩ့မၩစၪထၬအဝ့ၫအၪမၬလါနၫ့ မွဲအၥၭလဆၫဘၪဒဲ ခွံၬလၩ့အၥၭလၧ ကမၩဆၧၩ့ဝ့ၫနီၪလီၫႉ အဝ့ၫယၪ့ၥၭ အမံၩ့ၡါအကၠီၩ့ ဒုၭအီၪဝ့ၫဆၧအၪ့ဆၧအီၩ ဖ့ၪလၫ့ဝ့ၫ ဆၧကီၩ့ဆၧၥိၭနီၪလီၫႉ  ဖံၫမုၪၡါယီၩ ကမွဲဒၪအဒဲၪဖ့ၪလၫ့အ့ၪ ဆၧနးမံၩ့ ဘၩဝ့ၫဂီၩ့ စံၭခိးစံၭတၩဝ့ၫလီၫႉ နးဎွၩမုၪယီၩ ကျဲၩ့မၩၥ့ၪယၫအၥၭလၧအမံၩ့ၡါအ့ၬဂီၩ့ အၪ့စၪ့ဝ့ၫ နအီၪတဝၫ့ခလဲၪ နအီၪလၧမပၫလဲၪ အၪ့စၪ့ဝ့ၫအခၫ စံၭဆၧၫ့ထဲၩ့အဒဲၪ ယဖိၪခွၫအီၪကဂၩလီၫ လ့ၩမၩဆၧမၩလၧ ၦၡၩအတဝၫ့ဂီၩ့ အၪ့န့အမၫ ယဖိၪခွၫအမၫနီၪ အၥၭဂ့ၩအၪမၬလီၫ လါနၫ့ဂ့ၩ ယဖိၪခွၫနီၪ ယမုၫလါန့ဘၪမွဲ ပတဝၫ့ၦၡၩအမုၪၥံၪလီၫ အဝ့ၫဂဲၫထဲၩ့ကိၭန့အမၫနီၪ ယဒိၪယထးအမံၩ့မံၩ့ ယအၪ့မၧၫ့အမံၩ့မံၩ့ လၧခဲၫ့ အခံၫ့ယံၬထၪ့အခၫ အဝ့ၫထိးန့လၧၩ့အ့ၬ ထဲၩ့ထဲၩ့လၧအတဝၫ့ အဘူၭအထံၭၥံၪအီၪလီၫႉ

အနီၭတၭ ယဖိၪခွၫ ဂဲၫထဲၩ့ထီၩ့ဂံၪ့အခၫ ဒၪအမၫလၧၩ့အ့ၬဘိၭ ၥၭထၪ့ယၧၩ လ့ၩလီၩ့ဖိၬအမၫအခဲၫ့လီၫႉ ထီးထီၩ့ဘဲၫယီၩ ယဒၪဘၪယဖိၪခွၫနးကၠၪလၧၩ့အ့ၬႉ မွဲဆၧဘနီၫ ယဘၪဒၪဎီၩ့ဆၧၫ့ယၫ ဆၧကၪဆၧဂဲၩဘယီၩ ကဲၪယၥၭ စံၭဆၧၫ့ထဲၩ့အဒဲၪ ဘဲၫယီၩလီၫႉ ထီးနီၪ နးဎွၩမုၪစံၭ ယၧၩနးဆ့ လၧခီၩအိၩ ယမံၩ့ၡါမုၪနီၪ မၩနၧၩ့မၩစၪယၧၩ အမံၩ့မံၩ့လီၫႉ ယိလယီၩ အဝ့ၫ ဎုယစူၪလၧမ့ၪႇ ၡီၫ့ယၧၩလၧ ထံၫချၪ့ အလးအီၪထးဘဲၫဒံၭအခၫ ဖံၫမုၪၡါယီၩ ၥ့ၪယၫဝ့ၫလၧအဒဲၪဂီၩ့ ၡူၭဖျးဂီၩ့ မွဲချဲၩ့လထၪ့လၧၩ့ဘၪနီၪလီၫႉ လၧခဲၫ့ ဖံၫၥၭၡါနီၪ စံၭထဲၩ့အဒဲၪ ဘဲၫယီၩ ကမွဲဒၪ ဖိၪမုၪကမိမၩဆၧၫ့ထဲၩ့ယၧၩနးမံၩ့ ယကထိး ထီးအလူၬလီၫ အဒဲၪမုၪနီၪ မွဲဝ့ၫပၧၩလၧ အၥုၪ့ၥၭဂ့ၩဘွၩအကၠီၩ့ စံၭဆၧၫ့ထဲၩ့အမံၩ့ၡါ မိဧ့ မၩၡၪ့နၥၭနးမံၩ့လဂ့ၩ ဂဲၫထဲၩ့အီၪ ကၠၧၫ့ကၠၧၫ့လၧပၧၩနီၪလီၫႉ နးဎွၩမုၪနီၪ ဂဲၫထဲၩ့ကိၭန့ထဲၩ့အမံၩ့ၡါမုၪလၧ နီးဖၧၩ့ဂီၩ့ အီၪကၠၭထဲၩ့ မုၬမုၬလၩလၩနီၪလီၫႉ