ခိးတၩဎိၩဒိၪဝ့ၫဒၪဝၪထံၭလဖၪ

ထၧၫ့ဖုဝဲမုၪခွၫၥံၪဧ့ႇ ပထံၪခးယီၩ မွဲလၧ ၥံၪ့ကျိၭႇ ၥံၪ့ထံၭၥံၪအီၪအၪဝ့ၫဒၪ ထံၫခးကခးနီၪလီၫႉ လၧၥံၪ့ကျိၭအီၪ ၦၡၩၥံၪကၥိၩ့ထၪ့အဂး လိၫဝ့ၫဒၪ ဆၧပိၭဆၧလၫ့ အၪဒၪဆၧနီၪ ဖ့ၪလၫ့အ့ၪဝ့ၫန့နီၪလီၫႉ လကၭဒံၭဘၪ ခးပယၩ့အလး အၪဒၪဆၧနီၪ လၧၥံၪ့ကျိၭအဖၧၩ့ ပကဒၪဘၪ ဝၪအဂိၩ့ၥံၪ ဝၪအထံၭၥံၪနီၪလီၫႉ

ဆၧလၧဝၪအထံၭၥံၪနီၪ ဂဲၫကဲၪထၪ့ဒၪဝ့ၫၥ့ၪအကၠီၩ့တၭ ၦလနၩ့နၩ့ မိၥ့ၪယၫဝ့ၫအခိးအတၩအ့ၬနီၪလီၫႉ မွဲဝ့ၫဒၪ တၡါနီၪ ပထံၫခးယီၩ ဝၪထံၭၥံၪလဖၪ မွဲကအီၪအၪ ဘဲၫလခီၩ့ခီၩ့အိၩလၧၩ့အ့ၬနီၪလီၫႉဘၪနီၪလဲၪစွါဘဲၫ ပဒၪဘၪယီၫယီၫအကၠီၩ့ ဖ့ၬကၠၭဝ့ၫဂ့ၩဘၪစဲၪ့အကၠီၩ့နီၪလီၫႉ

ဆၧယိထွ့ၫနဲၩ့ဎီၩ့အဂး ဝၪထံၭလဖၪနီၪ အရ့ၩဒိၪဝ့ၫတၡါလီၫႉ ဝၪအထံၭအီၪအၪအလးနီၪ မၩလၩ့ၡၩ ဆၧၥူၭဆၧၥီၪ့ န့နီၪလီၫႉ ဝၪထံၭအဝံၥံၪနီၪ ယိထွ့ၫပဒၩ့ထၬ ဖံၭ ထံၫၥံၪန့နီၪလီၫႉ ပစီၪ့ဎီၩ့လၧ ဆၧဂူၫဂၩအထံၭနီၪ စွံၭထၪ့ ကၫဘိၫ့ဒဲၫ့အီၭစဲၭ န့နၭထၪ့ဂီၩ့ ထူၭထၪ့ အီၭစံၫဂၠ့ၫ မွဲန့အၪ့န့ ဆၧအထံၭဂူၫဂၩနီၪလီၫႉ

လၧဂၪ့ခိၪချိၫ့ယီၩ ဝၪနီၪ ကိၭကၠၭဝ့ၫဒံၭလၧ ထီၫအယ့ၫ (အစိမ်းရောင် ရွှေ)  ဒံၭနီၪလီၫႉ ပကဒၪဘၪ ဆၧကၠၧၩ့ဆၧကၠီၩ ဆၧပိၭဆၧလၫ့လဖၪႇ ဆၧပိၭဆၧလၫ့လၧ ၦၡၩၥံၪၥိၩ့ထၪ့န့လဖၪၥံၪနီၪ မွဲန့ဝ့ၫလၧ ဝၪအီၪနီၪလီၫႉ ဆၧလၧဝၪနီၪ ဆၧဖိၭလိၬထၪ့ ချၪၥိၪ မွဲန့ဆ့နီၪလီၫႉ

လကၭဒံၭဘၪ လၧဆၧအၪ့ဆၧအီၩအဂး ဝၪဘၪ့ႇ ဝၪဘၪ့ဆဲၪ့ႇ ဝၪဘၪ့ဎဲၪ့ ဆၧလဖၪၥံၪယီၩ မွဲန့ဝ့ၫလၧ ဝၪနီၪ လီၫႉ လၧအညၫလးကျဲၩ့လဖၪ အၪ့ဒၪဆၧ ၥုၪ့ကၠၭဂံၪ့အခၫ ၥိၩ့ထၪ့ဝ့ၫလၧ ဝၪနီၪလီၫႉ ဆၧလၧဝၪနီၪ ချံၪ့အကၠီၩ့ ထိးဆၧခိန့နီၪလီၫႉ လၩ့ဆၫ့ဝ့ၫဒၪ လၧခဲၫ့ကမံၩ့နီၪ ဂံၪ့လၧ ၦၡၩၥုၪ့ထၬလၧ ဝၪလဖၪနီၪ မွဲထိးဖိၪဆံၫဂူန့အကၠီၩ့ ပၥ့ၪယၫဘၪနီၪလီၫႉ ဘဲၫၥံၪ့ကျိၭ လူၬပျီၩ့ခွံၬ ကလၩ့ၡၩအဂး ဂဲၫၥိၩ့ထၪ့ကၠၭဝ့ၫ ဆၧပိၭဆၧလၫ့လၧအန့လၧဝၪအီၪလဖၪနီၪလီၫႉ ဝၪအထဲၩ့ႇ အဝံလဖၪၥံၪနီၪ ၥိၩ့ထၪ့ ဝ့ၫဂီၩ့ ထူၭထၪ့ ဝၪမ့ၪၥွၫထီးန့နီၪလီၫႉ အ့ၪပၥုၪ့လၩ့ၥံၪ့အဂူၫဂၩၥံၪလဖၪ ထီးပၥိၩ့ထၪ့ကန့အဂး ပကဘၪခိၭ ဖိၭဘိၭ အနံၪ့ (၂၀) လါနၫ့ အ့ၪပၥုၪ့ဝၪအထံၭစွါဘဲၫ ၥၧၫ့နံၪ့ဒဲ ယဲနံၪ့အဖၧၩ့ ပၥိၩ့ထၪ့ကန့နီၪလီၫႉ