မုကိၭနံၩဆၧၥၭထိၬပရၧၫ့ (စယီဟၫ့(၁၀:၃၁-၄၂)

(စယီဟၫ့(၁၀:၃၁-၄၂) မၩအၥၭဘဲၫနီၪတၭ,ၦယုဒၫဖိၪလဖၪ ဘဲၫၥိၭအမိခွံၬဘၪအဝ့ၫလၧလိးတၭ, အၪ့ထုၫ့ထၪ့ဒီၭလိးလဖၪနီၪလီၫ. တၭယ့ၫၡုၬစံၭဆၧၫ့အဝ့ၫၥံၪ, ယဒုၭနဲၪနၥံၪဆၧမၩလၧအဂ့ၩလၧယဖါအၪမံၩ့တၭ, မွဲနၥံၪမိခွံၬယၧၩလၧလိးလၧ ဆၧလဖၪနီၪအကၠီၩ့လမံၩ့မံၩ့လဲၪ.- ၦယုဒၫဖိၪၥံၪချဲၩ့ဆၧၫ့ဝ့ၫတၭ, စံၭဝ့ၫ, ပမိခွံၬနၧၩလၧလိးနီၪ လၧဆၧမၩဂ့ၩအကၠီၩ့မွဲအ့ၬ. မွဲလၧဆၧဒုၪဒွ့ၪကဆါနီၪ, နမွဲၦၡၩလါနၫ့ဘိၩ, နအီၪက့ၪနၥၭ လၧနမွဲယွၩနီၪအဂဲးလီၫ. ယ့ၫၡုၬချဲၩ့ဆၧၫ့အဝ့ၫၥံၪ, ဆၧကွ့ၭအၥၭလၧနၥံၪ အဆၧမၪလူၬအဖၧၩ့, ယစံၭနၥံၪ မွဲ က ဆါ ၥံၪ မွဲ အ့ၬ ဧၪ.- ၦလၧအထီးန့ကဆါအလူအထၫလဖၪနီၪ, ဆၧအ့ၪကိၭအဝ့ၫၥံၪ လၧကဆါတၭ, လံၬအဆၧချဲၩ့နီၪ အ့ၪလဂၭဂီၩ့ဘၪတၭ,- ၦလၧဖါအီၪက့ၪဆံၫ့ဎံၪဝ့ၫ,ဒဲအၪ့မၧၫ့လၩ့န့ဝ့ၫလၧဂၪ့ခိၪချိၫ့ယီၩလဂၩနီၪ, လၧအစံၭဝ့ၫ, ယဝ့ၫဒၪယီၩ ယမွဲယွၩအဖိၪခွၫအကၠီၩ့တၭ, မွဲနၥံၪစံၭ, နဒုၪဒွ့ၪယွၩနီၪဆ့ဧၪ. ယဖါအဆၧမၩနီၪ, ယအ့ၪလမၩဘၪတၭ, နဲၩလဂ့ၩ. ယအ့ၪမၩတၭ, နၥံၪအ့ၪလနဲၩဘၪလါနၫ့ယၧၩ တၭ, ဘဲၫၥိၭနၥံၪမိၥ့ၪယၫ, ဒဲနဲၩလၧဖါအီၪ လၧယဖၧၩ့, ဒဲ ယအီၪလၧယဖါအဖၧၩ့နီၪ, နဲၩယဆၧမၩလဖၪယီၩဆံၭ. မၩအၥၭဘဲၫနီၪတၭ, အဝ့ၫၥံၪအၪ့ဎၬဖီၪ့ထၬဒီၭအဝ့ၫဒၪတၭ, မွဲအဂၭထၪ့ခွံၬလၧအဝ့ၫၥံၪအစူၪဖၧၩ့လီၫ. လ့ၩဒီၭလၧယီၫဒၫ့အဝါလခီၫ, ထီးစယီဟၫ့ဘၭတံၫဇၫ့ဆၧလၧအခၪ့ထံၭအလးတၭ, အီၪဝ့ၫထီးနီၪလီၫ. ၦအၪဂၩဂဲၫလၧအအီၪတၭ, စံၭဝ့ၫဒၪ,စယီဟၫ့မၩလၩ့ လၭဆၧနးမံၩ့အ့ၬ. အ့ၪမွဲကယဲစယီဟၫ့ ချဲၩ့ဆၧလၧအယီၩလဂၩ အဂဲးအကၠီၪ့ထီးအလူၬနီၪ, မွဲဆၧအတီၩအလီၩ့လီၫ.ၦအၪဂၩနဲၩထဲၩ့အဝ့ၫထီးနီၪလီၫ.