ၦဖိၪဎွ့ၪမုၪဖိၪ – ၃

ၦဖိၪဎွ့ၪဖိၪလဂၩ ယၪ့ၥၭအဖိၪနီၪကကဲၩ့ ဘၪထိးအမံၩ့ၡါအဆၧမၩနၧၩ့မၩစၪနီၪ ကမံၩ့အၥၭမုၬအ့ၬ ဂၪ့နီၪလီၫႉ လၧအဝ့ၫအၥၭခံဖၧၩ့စံၭဆၧ ယအီၪလၧ ယထၧၫ့ခွၫၥံၪကၠၧၫ့ကၠၧၫ့ဒၪအိၩယအီၪဘၪမုၬမုၬလၩလၩႇ ဆၧကၪဆၧဂဲၩအီၪနးမံၩ့အ့ၬ ဘဲၫယီၩ ယဘၪဒၪဎီၩ့ ဆၧနိၫ့ဆၧနၭယူၭ ယမိအီၪထယီၩလၧၩ့အ့ၬႉ ယကထဲၩ့ထဲၩ့မၬလၧအဝ့ၫၥံၪအီၪနီၪလီၫႉ အၪ့ဎၬထၪ့ဝ့ၫ ဘဲၫယီၩၥိၭဂီၩ့ အၪ့န့ထၪ့ မ့ၪခွ့ၭကဖျိၪ့ႇ ဎ့ၬကဘံၪ့ဂီၩ့ ထဲၩ့ထဲၩ့လၧ အထၧၫ့ခွၫၥံၪအီၪနီၪလီၫႉ အထီနီၪ ဖနံၬထးကၩဖိၪနးဆ့ ဂဲၫထဲၩ့ထဲၩ့လၧဂံၪ့အထီဖၧၩ့ၥၭနီၪ အီၪပွံၭလၧ ထံၫချိၬနဲၩ့ကလးနီၪလီၫႉ

ကထံၪဎး လၧဆၧလၧဆီၪ့မီၪ့ဘၪအဖၧၩ့ လၧထံၫချိၬဖၧၩ့နီၪ ဒၪဝၪဖၭဒိၪအကဲၩ့ဂဲၫထဲၩ့လၩ့ယွၩတၭ ဒၪစိၩဝ့ၫလၧ ဖိၪၥၪပၫကဂၩလီၫႉ ထီးနီၪ အထံၩၥိၭၥံၪလဖၪ စံၭအဝ့ၫ ဖိၪၥၪယီၩ ကမွဲဒၪ နဖိၪလီၫႉ ကထံၪဎး ဖနံၬထးကၩဖိၪယီၩ ၥ့ၪယၪဝ့ၫလၧ အမိ မၩနၧၩ့မၩစၪအဝ့ၫအမၫယူၭနီၪလီၫႉ ထီးနီၪ အဖိၪယီၩ ထဲၩ့န့ထဲၩ့ဝ့ၫလၧအဂံၪ့ ကထံၪဎး ဒၪအမၫၥၭဘီၩ့အ့ၬတၭ အၪ့စၪ့အမိအခၫ အမိနီၪ ကျဲၩ့မၩအၥၭဘဲၫ အဝ့ၫလနါဂၧၫ့ဘၪ ဆၧနးမံၩ့နီၪလီၫႉ

အမိမွဲလီၩ့ဆၧၫ့ထဲၩ့အဝ့ၫနးမံၩ့ဘိၭ ၥ့ၪယၫဝ့ၫလၧ အမၫထဲၩ့ထဲၩ့လၧ အတဝၫ့ယူၭနီၪလီၫႉ မွဲဆၧဘဲၫနီၪ အဝ့ၫအၪ့န့ ၥ့ၪကဒုၩဂီၩ့ ယိၬထၪ့အဖိၪဒဲ ဆၧပိၭဆၧလၫ့လနၩ့ လီၩ့ဖိၬဝ့ၫလၧ အမၫကထဲၩ့ဖၧၩ့ၥၭနီၪလီၫႉ အမၫၥၭဘီၩ့နီၪ ထဲၩ့လၧဖၧၩ့ၥၭအထီ အၪ့ဘၪဆၧအၪ့ဆၧအီၩ့အ့ၬတၭ အဂဲးအဘၭအီၪအ့ၬ ဂၭဖၭန့လၧၩ့အ့ၬ အီၪပွံၭလၧ ၥံၪ့ဖၭဒိၪကထံၭအဖၫ့လၬနီၪလီၫႉ အထီနီၪ ဖနံၬထးကၩဖိၪနီၪ ဂဲၫထီၩ့လၧ အမၫအီၪယူၭ ဒၪဘၪအမၫဘဲၫယီၩၥိၭအခၫ မွဲအဝ့ၫအၥၭမုၬအ့ၬ ဒိၪဒိၪလ့ၬနီၪလီၫႉ လၧခဲၫ့ အၪ့မၧၫ့အမၫ ဒုၭအီၩအဖိၪနူ လါနၫ့ အဝ့ၫမွဲလဒုၭအီၪဘၪအဖိၪနူဒဲ စံၭအဝၩ နမိမၩနၧၩ့မၩစၪယၧၩယထိးန့လၧၩ့အ့ၬ မွဲဆၧဘဲၫနီၪ အၪ့န့နဖိၪယီၩဂီၩ့ ထဲၩ့အီၪထဲၩ့လၧနမိ ထဲၩ့မၩဘျုၪ့လၩ့ နမိဒဲ နဖိၪယီၩ ယၧၩနီၪ ယထဲၩ့လၧၩ့အ့ၬ ယကထဲၩ့အီၪထဲၩ့မၬလၧ ယထၧၫ့ခွၫၥံၪအီၪနီၪလီၫႉ ၥၭခိယဂး နးမံၩ့လဂ့ၩ နီၪလီၫႉ ဖနံၬထးကၩဖိၪလဂၩ ထီးအမၫကဒုၭအီၪနူအဖိၪနီၪ ဘၪအၪ့ယၫဝ့ၫဒၪ အဘျၩ့ဘျၩ့နီၪလီၫႉ