ဆၧအဲၪအဘျၪ ဒဲ ဆၧအဲၪတၡါ

စ့ၩဖီၫကဂၩ ဘၪကၠူၭဆၧဂၩ့နီၪ အဲၪဒိၭဝ့ၫအၪမၬလ့ၬလီၫႉ လါနၫ့ အဝ့ၫအဆၧအဲၪခွၫအဂုအိၩ ကဂၩနီၪ အၪ့ကီၪအဝ့ၫအဆၧဂၩ့လဖၪကိၭနံၩ စံၭအဝ့ၫလၧ “နဆၧဂၩ့ကပၫယီၩ ဎိၪဎါလၬအၧၩ့ထဲနီၪ နလီၩ့မၩလူၬဂီၩ့အခံၫ့မၬလီၫႉ” စံၭအဝ့ၫ ဘဲၫနီၪအၥိၭ ခိၬမၬခိၬမၬနီၪလီၫႉ မွဲလၧဆၧချဲၩ့လဖၪနီၪအကၠီၩ့ စ့ၩဖီၫကဂၩ အဆၧဆူနဲၩလၩ့ၥၭလဖၪ ထဲၩ့လၩ့မါကဆံၭကဆံၭဂီၩ့ လခဲၫ့ ကၠူၭဆၧဂၩ့လဘၧၫ့လၧၩ့ဘၪလီၫႉ အဝ့ၫယီၩ စီၪလၩ့အၥၭ အိၭထိၭဆၧအ့ၬဂီၩ့ အၥၭလၩ့ဆ့ၭ လၩ့ယွၩထၪ့အၪမၬနီၪလီၫႉ ကနံၩတၭ စ့ၩဖီၫယီၩ ဒၪခီၩ့ထဲၩ့လိၬၥၭလၧ စအဲၪတီၩနီၪလီၫႉ စအဲၪတီၩယီၩနီၪ အီၪက့ၪဒိၪအ့ၪ ၦၡၩအဆၧကိၪ့ၥ့ၪကိၪ့ဘၪၥ့ၪအၪမၬလ့ၬနီၪလီၫႉ စအဲၪတီၩ အၪ့စၪ့ဘၪ စ့ၩဖီၫ “စ့ၩဖီၫဧ့ နကၠူၭဆၧဂၩ့ လၧၩ့အ့ၬနီၪ ဘၪမန့လဲၪ”အခၫ စ့ၩဖီၫ စံၭဆၧၫ့ထဲၩ့ ယဆၧၥ့ၪဆၧဘၪ လအီၪဘၪအကၠီၩ့ အ့ၪမွဲယကၠူၭ ဆၧဂၩ့နးဆ့ မွဲၦၡၩကဘၪအၥၭနးဂၩဧၪအ့ၬႉ ဘနီၪတၭ အဲၪတီၩယီၩ စံၭအဝ့ၫ ၦၡၩလဘၪဘၪအၥၭ နးဂၩဒၪလူၬ ယဘၪၥၭဘီၪႉ နကၠူၭထၬ ဆၧဂၩ့ကပၫနီၪ မၩဖျီၪထၪ့နၥုၪ့နၥၭလီၫႉ နဆၧဂ့ၩဆၧဘွၩလဖၪနီၪ ဖ့ၪနဲၪထၪ့ဂၪ့ခိၪချိၫ့ယီၩ နးထံၪဘီၩႉ စၭထၪ့လၧအခံၫ့နီၪ အဲၪတီၩကဂၩ အီၪလၧစ့ၩဖီၫအနဲၩ့ထံၭနီၪလီၫႉ စ့ၩဖီၫအဆၧဂၩ့ အ့ၪမွဲ ဂဲၫစဲၪ့ထၪ့ယူၭ စွါဘဲၫ ၦဒဲၩစူၪ အဂုထုၬနီၪ မွဲဒၪ စအဲၪတီၩလီၫႉ ထဲၩ့လၩ့မါခွံၬ စ့ၩဖီၫအဆၧၥၭဆုးလီၩ့လဖၪနီၪ မွဲလၧ စအဲၪတီၩ အဆၧအဲၪဆၧကွံၩအကၠီၩ့ ဂဲၫဖျီၪထၪ့ထဲၩ့ ထံၪထံၪဆၭဆၭနီၪလီၫႉ လၧခဲၫ့ ကနံၪ့အခၫ စ့ၩဖီၫယီၩ ဖ့ၪနဲၪထၪ့အဆၧဂၩ့လဖၪန့ဝ့ၫဒၪနီၪလီၫႉ စအဲၪတီၩနီၪဘိၭ ဖ့ၪလၩ ဖ့ၪဖၩ့ စ့ၩဖီၫလၧဆၧနံမွံၫဖၧၩ့နီၪလီၫႉ စ့ၩဖီၫနၪၥ့ၪထၪ့ဆၧကမံၩ့နီၪ “ဆၧအဲၪဆၧကွံၩတၡါနီၪ ပဆၧဂဲး ဆံၭဘၭဆါအဖၫ့ခိၪ ဆၫ့လၩ့ဘၧၩ့ပၧၩ လမွဲဘၪတၭ မွဲဒၪလၧ ပယူၩဝံၩ့ဝၩ့ထၪ့ ကန့ဂ့ၩဂ့ၩဘၪဘၪအဂး လံၩဖိၪဎွ့ၪဖိၪလၧ အဆၫ့လၫ့ထၬအ့ၪပၧၩ ပဒံၭလဖၪနီၪလီၫ”ႉ အဂဲးလီၫႉ ဆၧမၩလိၪ – ဆၧအဲၪဆၧကွံၩတၡါနီၪ ပကလ့ၩထၪ့လ့ၩထီၫအဂး ယိထဲၩ့ခွါထဲၩ့ပၧၩဒဲ လီၩ့ဎွါထဲၩ့ အ့ၪပၧၩ ပဆၧမံၫမးလၧ အလၩ့မါခွံၬလဖၪနီၪလီၫႉ