ခိဆၧၩ့ချံၪ့အၪ့လဲၩ့ထၪ့အၥၭအီၪပဒၩ့ထုၪ့လၩ့ၥၭ (၁)

လၧဂၪ့ခိၪချိၫ့ယီၩ ဆၧဖိၪဆၧဎါၥံၪလၧအၥၭအီၪလဖၪ ကဆုးအီၪမၧၫ့ကန့အဂး ဆၧခိခၫႇ ဆၧဆၧၩ့ခၫ ဒဲ ဆၧယီၩခၫ ခိဆၧၩ့ချံၫ့ ၥၧၫ့မံၩ့ယီၩ ဂဲၫအီၪထၪ့နီၪလီၫႉ လါနၫ့ လၧၦခမျၧးၥံၪလဖၪ အဆၧမၩအကၠီၩ့ ခိဆၧၩ့ချံၪ့ယီၩ ဂဲၫအၪ့လဲၩ့ထၪ့ အၥၭယူၭနီၪလီၫႉ ခိဆၧၩ့ချံၪ့အၪ့လဲၩ့ထၪ့အၥၭနီၪ ဂၪ့ခိၪချိၫ့ ဘၪဂဲၫခိထၪ့ဂီၩ့ ကဆုးကဲၪထၪ့ နဲၩ့ဎီၩ့ ဆၧလၩ့အၪ့ယိၪအမံၩ့မံၩ့နီၪ ၦခမျၧးၥံၪလဖၪ ကဘၪဒၪဎီၩ့ဆၧၫ့ယၫနီၪလီၫႉ

ဂၪ့ခိၪချိၫ့ဂဲၫခိထၪ့အကၠီၩ့ ထံၫခိလီၫ့ခိၪလီၩ့လးကျဲၩ့လဖၪနီၪ ထံၫခိလီၫ့လဖၪ ကဖံထၪ့ႇ ဆၩ့လၩ့ကနၬထၪ့ဒဲ ဆၧဆၧၩ့ၡၩလးကျဲၩ့လဖၪနီၪ ဆၧဆၧၩ့အ့ၬႇ ဆၧခိဆီၪ့လၨၪကဲၪထၪ့ဂီၩ့ ကဂဲၫကဲၪထၪ့  ကန္တာရ နီၪလီၫႉ ဂၪ့ခိၪချိၫ့ဂဲၫခိထၪ့အကၠီၩ့ ယၩနံၪ့ ၁၉ႇ ၂၀ ခိဆၧၩ့ချံၪ့အဆၧၫ့အထီဒဲ အထီဘဲၫယီၩ ဆၧၫ့ထီလဖၪ ကနံၪ့ဒဲကနံၪ့ ပကဒၪဘၪ မီၪ့ဎီၩ့လၧၩ့အ့ၬ နၭထၪ့နီၪလီၫႉ အၪဒၪဆၧနီၪ အယ်လ်နီညိုအဆၧကဲၪထၪ့အကၠီၩ့ ဂၪ့ခိၪချိၫ့ဂဲၫခိထၪ့အဖၫ့ခိၪ ကနံၪ့ဒဲကနံၪ့ ဂဲၫနၬထၪ့ယူၭနီၪလီၫႉ

ဂၪ့ခိၪထၧၫ့ဘံၪ့ယၫ အဆၧထိၪအဒီၩ့အဖၧၩ့ ပဘၪဒၪဎီၩ့ဆၧၫ့ယၫ အယ်လ်နီညိုဒဲ လာနီညာ အဆၧကဲၪထၪ့ လဖၪနီၪလီၫႉ အထီဘဲၫယီၩ ဆၧခိဆီၪ့ထၪ့နီၪ မွဲဝ့ၫ အယ်လ်နီညိုဒဲ လၧခဲၫ့ ဆၧချံၪ့ကဆီၪ့ထၪ့နီၪ မွဲဝ့ၫ လာနီညာအကၠီၩ့ ပကိၪ့ၥ့ၪ လဖၪအၪ့ဎၬထယၬထၬနီၪလီၫႉ ပစံဖံၭမၫဆမံၭ မုထၪ့ကကဲၩ့ခီၫ ထံၫနဲၩ့ထံၭလဖၪ အခိဆၧၩ့ချံၪ့လကၭဘၪ ထီးထီၩ့စိၩ ခးအ့ၩၡၩလံၩထံၭကကဲၩ့ခီၫထံၫနဲၩ့ထံၭလဖၪ ခိဆၧၩ့ချံၪ့ အၪ့လဲၩ့ထၪ့အၥၭ အဆၧၫ့အထီ ဂဲၫအီၪထၪ့နီၪလီၫႉ