စဎွၩအဖိၪခွၫၥၭဘီၩ့ဒဲနးဖျီၩၥၪ (၁)

လၧဖျိၩ့ဖျိၩ့အိၩ စဎွၩအဖိၪခွၫၥၭဘီၩ့လဂၩနီၪ လ့ၩမၩလိၪလံၬလၧ အဲၩ့ၥဲၭလဂၩအအီၪလီၫႉ မၩလိၪလံၬဂီၩ့ ကထဲၩ့အထီနီၪ အဲၩ့ၥဲၭဖ့ၪလၫ့စိၩ ဖျီၩၥၪကဖျိၪ့ဒဲ မၪလူၬထၬဝ့ၫ ဖျီၩၥၪယီၩ နထဲၩ့ထီၩ့လၧ နနီးဖၧၩ့မၬ မၩထ့ၬဖၭ ထီးထဲၩ့ဖ့ၬအၪ့ဘၪလၧ ဖၧၩ့ၥၭလဂ့ၩ နီၪလီၫႉ စဎွၩအဖိၪခွၫလဂၩ အၪ့န့ဖျီၩၥၪနီၪဂီၩ့ ထဲၩ့လၧနီးဖၧၩ့အထီ အီၪပွံၭအလးဖၧၩ့ၥၭ တဝၫ့ကတဝၫ့အနဲၩ့နီၪ ဖ့ၬအၪ့ဖျီၩၥၪနီၪဒဲ ဖျီၩၥၪနီၪ ဖ့ၬထ့ၬဖၭဝ့ၫကထံၪဎး ၦမုၪနၩ့ဎံၪလၩ ဂဲၫစဲၪ့လၪ့ကဂၩနီၪလီၫႉ ၦမုၪနၩဎံၫလၩယီၩ ဂဲၫစဲၪ့လၫ့လၧ ဖျီၩၥၪဖၧၩ့အကၠီၩ့ ကိၭအ့ၪဝ့ၫအမံၩ့လၧ နးဖျီၩၥၪနီၪလီၫႉ စဎွၩအဖိၪခွၫနီၪ စံၭ ၦမုၪနၩ့နီၪ ထဲၩ့ဖိၬယခဲၫ့ လါနၫ့ နကဘၪဂၭဖၭနီၪ မငါအ့ၬ  အီၪခိၬယၧၩထယီၩ ယကထဲၩ့လၧနီးဖၧၩ့ဂီၩ့ ယကထဲၩ့အၪ့န့ ကဆၫ့ ဂီၩ့နီၪ ယကဂဲၫကိၭထဲၩ့နၧၩအကၠီၩ့  မၪလူၬထၪ့ဝ့ၫ ဘဲၫယီၩၥိၭလီၫႉ စဎွၩအဖိၪခွၫလဂၩ ၦမုၪနၩ့ဎံၪလၩနီၪ ထံၭလၫ့ထၬဝ့ၫလၧ ၥံၪ့ခံၫဂီၩ့ ထဲၩ့အၪ့န့ ကဆၫ့နီၪလီၫႉ စဎွၩအဖိၪခွၫထဲၩ့အၪ့န့ ကဆၫ့အထီနီၪ ၥံၪ့ကလိၭလဂၩ လ့ၩအၪ့လုထံၫတၭ ဒၪစိၩနးဖျီၩၥၪအလၩဒုၩနီၪလီၫႉ

လၧခဲၫ့ ၥံၪ့ကလိၭနီၪ လၧဆၧၥၭဎွံၪအဖၧၩ့ အၪ့စၪ့လၩ့အၥၭ ယဂ့ၩဧၪတၭ နးဖျီၩၥၪနါဂၧၫ့ နံကထံၪလီၫႉ ကထံၪဎး ၥံၪ့ကလိၭမုၪလဂၩ နါဂၧၫ့ နးဖျီၩၥၪနံအလူနီၪ လီၩ့ဎွါဝ့ၫဂီၩ့ ဒၪနးဖျီၩၥၪအခၫ အၪ့စၪ့ဝ့ၫ နကိၪ့ဂဲၫထၪ့ပၥ့ၪလဲၪ အခၫ နးဖျီၩၥၪလီၩအ့ၪအဂဲးအဖးထီးအလူၬနီၪလီၫႉ လၧခဲၫ့ ကိၭအၪ့ နးဖျီၩၥၪ ဖုလၪနီၪလီၫႉ နးဖျီၩၥၪစံၭဆၧၫ့ထဲၩ့ ယအၪ့ဖုလၪၥ့ၪအ့ၬ ယဖုလၪမအီၪဧၪအ့ၬတၭ ဖုလၪလအီၪဘၪနီၪ မၩလၧၥံၪ့လၪနီၪ မၩအ့ၪဝ့ၫဘဲၫ ၥံၪ့ကလိၭအၪ့မၧၫ့အၥိၭဂီၩ့ ခွံၬလၩ့စိၩအ့ၪဝ့ၫလီၫႉ လါနၫ့ ၥံၪ့ကလိၭမုၪနီၪအၪ့အ့ၬႉ အ့ၪမွဲ ဖုလၪနီၪ နးဖျီၩ့ၥၪ ကၭထၬလၧ အခိၪမၬ ကအၪ့ဝ့ၫလီၫႉ နးဖျီၩ့ၥၪလဂၩ မွဲၥ့ၪယၫ ၥံၪ့ကလိၭမုၪ အဆၧကိၪ့ဆၧတဲၩ့အ့ၬတၭ မၩဝ့ၫဘဲၫ ဆၧအၪ့မၧၫ့အၥိၭနီၪလီၫႉ လၧခဲၫ့ ၥံၪ့ကလိၭနီၪ ကၠူၭလၩ့ထ့ၬနးဖျီၩ့ၥၪလၧ ဖံၬဖၫ့ခိၪတၭ နးဖျီၩၥၪလဂၩ ၥံၫဝ့ၫဒၪလီၫႉ အၥုၪ့အၥၭအုၪဝ့ၫဒၪ ၥံၪ့ကလိၭမုၪလဂၩ ယဲးလၩ့ဘၧၩ့နးဖျီၩ့ၥၪလၧ ဖံၬဖၫ့လၬဂီၩ့ အၪ့န့ၥိၭကီၩ့လၫ့ထဲၩ့ဝ့ၫ အဆၧကီၩ့ဆၧၥိၭဂီၩ့ ထဲၩ့ထၪ့အီၪထဲၩ့လၧၥံၪ့ခံၫအိၩ မၩအၥၭ ဘဲၫနးဖျီၩၥၪနီၪလီၫႉ