ၦဖျိၩ့ဆၨၩၥံၪအဂဲး ဆၧၥိၫ့နုၬလဖၪ

ၦဖျိၩ့ဆၨၩအဂဲးနီၪ ခးမုနုၬ ဖးဖီၩ့ၦလီၩ့ဎွါအၪ့ဎၬဆၧၥံၪ လီၩ့ဎွါအၪ့ဎၬထၬအဖၧၩ့ အဝ့ၫၥံၪ ၥိၫ့နုၬဝ့ၫအမံၩ့မံၩ့နီၪလီၫႉ ခးပယၩ့ဖၧၩ့ ဖးဖီၩ့ ၦလီၩ့ဎွါအၪ့ဎၬဆၧကိၪ့ၥ့ၪလဖၪနးဆ့ ပကဒၪဘၪ ဘၪထွ့ၫလၧ ၦဖျိၩ့ဆၨၩအဂဲး ဆၧၥိၫ့နုၬလဖၪ ကွ့ၭထၬဝ့ၫအီၪနီၪလီၫႉ လၧခးပယၩ့ဖၧၩ့ ဖျိၩ့ဆၨၩလဖၪ ဂဲၫထီၩ့နီၪ ပဒၪဘၪလၧ ထၩ ဆၧၥၭအွံၪလဖၪအဖၧၩ့မွဲဂ့ၩႇ ၡါဖၧၩ့လဖၪမွဲဂ့ၩနီၪလီၫႉ လါနၫ့ အခံၫ့ ထံၫထံၫဆၭဆၭနီၪ မွဲပလဒၪဘၪနီၪလီၫႉ

            ခးအမ့ၫရံကၭ န့ၭခၠ့ၩ ဆၧအီၪကီၪ့ဆၧရၫ ဒီၭတၫ ဖရၫ့စ့ၭ မ့ၫဆၫ့ ဒုၭဖျီၪ့ထၪ့ထၬလၧ ၁၈၃၄နံၪ့ ဆၧအီၪကီၪ့ မ့ၭကဇ့ၩ (Missionary Magazine ) အဖၧၩ့ ဖျိၩ့ဆၨၩၥံၪနီၪ မွဲဝ့ၫ ဟေဗြဲ အဆၨၩဖိၪလၧ အလၩ့မါလဖၪနီၪလီၫႉ လၧခဲၫ့ တီၫ့ငူၫ န့ခၠ့ၩဆၧအီၪကီၪ့ဆရၫ ဒီၭတၫ Cross နီၪလီၩဝ့ၫ ဖျိၩ့ဆၨၩၥံၪနီၪ ဂဲၫထီၩ့လၧ ခးပယၩ့ အဆိၪထုၬနီၪလီၫႉ

            အူၩစီၩကွ့ၭထၬလၧ ကရင်ရာဇဝင် ဖၧၩ့နီၪ ခီၫလၧ ဂီၩတမၭကၠဲၬ လအီၪဒံၭဘၪအထီအိၩ ပခိၩခိၪလီၩ့ဒၩ့ခိၪႇ ရခဲၫ့ခိၪလီၩ့ဒၩ့ခိၪဒဲ တန့ၥၫရံၫခိၪလီၩ့ နဲၩ့ဎီၩ့လးကျဲၩ့လဖၪနီၪ ဖျိၩ့ဒဲ မိၫဆၨၩၥံၪနီၪ မွဲဆၨၩလၧ အဂဲၫထီၩ့ထၬဝဲၩလၧ ခးပယၩ့အကၠီၩ့ ဒဲ လၧခဲၫ ၦၡၩၥံၪ ဂဲၫအၪထၪ့ကဆံၭဆံၭဂီၩ့ ဂဲၫကဲၪထၪ့ ဝံးနီၪလီၫႉ လၧမိၫဆၨၩအဖးဖီၩ့ဖၧၩ့နီၪ ဖျိၩ့ဆၨၩၥံၪနီၪ ဂဲၫထီၩ့လၧ ခးပယၩ့ဖၧၩ့ ခီၫလၧ မိၫၥံၪလဂဲၫထီၩ့ဒံၭဘၪအကၠီၩ့ လီၩထၬဝ့ၫ ထံၫထံၫဆၭဆၭနီၪလီၫႉ လါနၫ့ ဖျိၩ့ဆၨၩၥံၪနီၪ ဖးဖီၩ့လအီၪဘၪဒဲ အီၪထးဒၪမွဲ ထၩဖၧၩ့ လံၬလဲဖၧၩ့နီၪလီၫႉ