ၦဘၧၩ့လၩ့ဆၧစယီဟၫ့အဆၧလီၩလၩ့. (မၭၥုၫ ၃:၁-၁၂)

မုနံၩလဖၪနီၪ, ၦဘၭတံၫဇၫ့ဆၧစယီဟၫ့လဂၩ ဂဲၫလီၩလၩ့လၬလၩ့ဆၧ လၧခးယုဒၫအမံၩ့လၬကျၩနီၪ, စံၭဝ့ၫဒၪ,နီၫ့ယါလၩ့ထဲၩ့နၥံၪအၥၭဆံၭႉ အဂဲးဘဲၫယီၩ မူၭခိၪအဘၩ့အမုးနီၪဘူၭထၪ့ယူၭလီၫ. အဂဲးဘဲၫယီၩ ၦလဂၩယီ မွဲၦလၧမီၪစအဲၫစ့ယၫချဲၩ့ဆၧ လၧအဂဲးတၭ, စံၭဝ့ၫဒၪ, ဆၧအလူၥီၫထၪ့ လၧမံၩ့လၬကျၩ, တဲၩ့ဝဲၩကဆါအဖၧၩ့ၥၭနီၪဆံၭ, မၩလီၩ့အဖၧၩ့မုလဖၪနီၪဆံၭ. အဝ့ၫဒၪ,စယီဟၫ့, အကီၩ့အၥိၭ မွဲကလအူၭအဆီၪ့တၭ, ခဲးထူၬအယးဒံၩ့လၧခၧၩ့ယးဆၧဖံၭတၭ, အဝ့ၫဒၪအဆၧအၪ့ဆၧအီၩနီၪ, မွဲထွ့,ဒဲန့ၫမံၩ့အစၩ့လီၫ. ထီးနီၪလဖၧၫ့ၦယရုစလံၫ့ဖိၪ ဒဲခးယုဒၫဖိၪထၧၫ့ခးယၫ,ဒဲၦအီၪလၧယီၫဒၫ့အနဲၩ့ ထီးအလူၬနီၪ, ဂဲၫဝ့ၫလၧအအီၪတၭ, လီၩလၩ့အဆၧဒဲၩဘၭတၭ, ဒိၭဘၭတံၫဇၫ့အၥၭ လၧအစူၪဖၧၩ့ ထီးယီၫဒၫ့အဖၧၩ့နီၪလီၫ. ထီးအဒၪဘၪ ၦဖၫရစံၫဒဲၦစၭဒုၫစံၫၥံၪဂဲၫဝ့ၫ အၪဂၩဘဲၫၥိၭ အမိဒိၭဘၭတံၫဇၫ့အၥၭတၭ, အဝ့ၫနီၪ စံၭအဝ့ၫၥံၪ, ဂူအၧၩ့အဆၨၩအဆၬၥံၪဧ့, မွဲပလၫၥီၪ့ထဲၩ့နၥံၪဘဲၫၥိၭနၥံၪမိစဲၪ့ဒၪဆၧၥၭထၪ့လၧအမိဂဲၫနီၪလဂၩလဲၪ. ဆၧနီၫ့ယါလၩ့ထဲၩ့အၥၭအဆၧၥၪဂ့ၩနီၪ,ၥၪဒၪခလူၬနၥံၪဝ့ၫဆံၭ.ထီးဆီၫ့မီၪ့စံၭလၧ နၥံၪအၥၭဖၧၩ့နီၪ, စအၫဘြဟၫ့ မွဲပဖါနီၪလဂ့ၩ. အဂဲးဘဲၫယီၩ ယစံၭနၥံၪ လၧလိးလဖၪယီၩအကျၩ, ယွၩဒုၭကဲၪထၪ့ဖိၪလဖၪလၧ စအၫဘြဟၫ့အဂးၥ့ၪလီၫ. ဘိၩ့နဲၪ့ယီၩဒၪလ့ၬ ကွၩဘၪဆၧအီၪက့ၪလၩ့ယူၭဝ့ၫ လၧၥံၪ့အခၪ့ထံၭယူၭ, မၩအၥၭဘဲၫနီၪတၭ, ကယဲၥံၪ့လၧ အလၥၪဘၪလၧအဂ့ၩ ကိၭထံၭဒ့ၭနီၪ, မိဘၪဆၧခူၬခွံၬဝ့ၫတၭ, မိဘၪဆၧဖျႃၭလၩ့ ခွံၬဝ့ၫလၧမ့ၪဖၧၩ့လီၫ. ယဝ့ၫဒၪယီၩ, ယဘၭတံၫဇၫ့နၥံၪလၧထံၫကျၩ လၧဆၧနီၫ့ယါလၩ့ထဲၩ့ၥၭအဂဲးလီၫ. အ့ၪမွဲၦဂဲၫဝ့ၫလၧ ယလးခဲၫ့လဂၩနီၪၥ့ၪနဲၪ့ယၧၩဒံၭတၭ, န့ၫယဆိၬအ ခၪ့ဖံၬနီၪ ယကြၨၭအ့ၬႉ အဝ့ၫနီၪလဂၩ မိဘၭတံၫဇၫ့နၥံၪလၧၥၭမုဆံၫ့ဎံၪ, ဒဲလၧမ့ၪအဖၧၩ့လီၫ. အချဲၩjအီၪဝ့ၫလၧအစူၪဖၧၩ့တၭ, မိမၩဆံၫ့ခွံၬအခရဲးဂ့ၩဘၪစဲၪတၭ, မိအီၪက့ၪကီၪ့ထဲၩ့ အဘုၪၥံၪဂူၫၥံၪ လၧဖၫ့ဖၧၩ့တၭ အ့ၪမွဲလီခၫ့နီၪ, မိဆူၭထၪ့ခွံၬဝ့ၫ လၧမ့ၪလၩ့ဖံၬလၥ့ၪဘၪလီၫ.