ဘၪနီၫလဲၪမိလၨဆၧချဲၩ့ဘၪလၩ့မါထၪ့နီၪ (၂)

လၧခးပယၩ့နးဆ့ ပဂၫ့ကၠီၭစၫနီၪ ပၠူၫဆၨၩဒဲ ပၠူၫလၨဆၧချဲၩ့ လၩ့မၬခွံၬဝ့ၫထီးအလူၬလီၫႉ ၁၉၃၁နံၪ့ ခိၪလၩ့ဘွၩပဒိၪ လီၩ့အၪ့ထၧၫ့ဆၧရၫ့ကွ့ၭနဲၪ့အဖၧၩ့ အမံၩ့မွဲဝ့ၫ တလိုင်ကလေစိ ဖျိၩ့ဆၨၩဆၬနီၪ အထီဘဲၫယီၩ မွဲလအီၪလၧၩ့ဘၪနီၪလီၫႉ လၧဂၪ့ခိၪချိၫ့ယီၩ ထံၫခးလၧ အၥိၩ့ထၪ့ လၨဆၧချဲၩ့ကမံၩ့လီၫ ထံၫခး မွဲလအီၪဘၪလီၫႉ လၧမုထၪ့လံၩထံၭခးအ့ၩၡၩအဖၧၩ့ ခးပါပူယာ-နယူးဂီနီ နီၪ လၨဆၧချဲၩ့အီၪဝ့ၫ (၈၂၃) မံၩ့နီၪလီၫႉ ထံၫခးယီၩ မွဲဒံၭလၧ ဂၪ့ခိၪချိၫ့ယီၩ ၦၥိၩ့ထၪ့ လၨဆၧချဲၩ့အအၪထုၭ ထံၫခးကခးနီၪလီၫႉ ၦၥိၩ့ထၪ့ လၨဆၧချဲၩ့အအၪထုၭ ထံၫခး နံၫခးလခးနီၪမွဲ ခးအင်ဒိုနီးရှား နီၪလီၫႉ အဝ့ၫနီၪ ပဒိၪအဆၧထိးဆၧၫ့ထၬန့ လၨဆၧချဲၩ့ အီၪဝ့ၫ (၇၂၆) မံၩ့နီၪလီၫႉ

ၦၥိၩ့အၪဆၧချဲၩ့ဒဲ မိလၨဆၧချဲၩ့ ၦချဲၩ့န့နံၫမံၩ့ အဆၧၫ့အထီနီၪ မိလၨဆၧချဲၩ့အခံအလဲၫ့ လၩ့ဆ့ၭလၩ့ယွၩၥ့ၪဝ့ၫဒၪနီၪလီၫႉ ဖိၪၥၪဆံၭဖိၪၥံၪလဖၪ ပစၭထၪ့ချဲၩ့ဒုၪ့ဂုလၧ ၦၥိၩ့အၪဆၧချဲၩ့နီၪနးဆ့ ဂဲၫကဲၪထၪ့ ပလၨဆၧချဲၩ့ဘၪလၩ့မၬထၪ့ဝ့ၫဒၪ အရ့ၩဒိၪထုၬ အဂဲးအဖးကမံၩ့နီၪလီၫႉ  လၧခဲၫ့ထုၬ ပမိလၨဆၧချဲၩ့ယီၩ ဂဲၫလၩ့မၬထၪ့နီၪလီၫႉ လကၭဒံၭဘၪ ၦလၧချဲၩ့ ဆၨၩဆၬလၨဆၧချဲၩ့လနၩ့နၩ့နီၪ စီၪဆံၭအလၨဆၧချဲၩ့ စီၪဝ့ၫ ဆၨၩဆၬမိလၨဆၧချဲၩ့နီၪ အီၪထးလၧ ဆၧၫ့ထီအလးခဲၫ့ အထီဘဲၫယီၩ မွဲလထီၩ့ဘၪအလးနးမံၩ့ နီၪလီၫႉ

လၧဂၪ့ခိၪချိၫ့ယီၩ လၨဆၧချဲၩ့ဘၪလၩ့မၬထၪ့ဝ့ၫဒၪ အဂဲးအဖးနီၪ ဘၪထိးမၩအၧၩ့မၩနၭလၧ ဆၧအနိၪ့ (၅) နိၪ့ယီၩနီၪလီၫႉ ဆၧလဖၪၥံၪနီၪမွဲဝ့ၫ ဆၧဒုၭဆၧယၩႇ ခီၫၡၩအနိၪ့ႇ ဆၧဘိၪ့ဆၧဘၩအနိၪ့ႇ ဆၧဆၧးဎံၫဆၧးလၩဒဲ ဆၧကိၪ့ဘၪကိၪ့ၥ့ၪအနိၪ့ၥံၪနီၪလီၫႉ ဂၪ့ခိၪချိၫ့ယီၩ ကမွဲဒၪ ထံၫခးလးကျဲၩ့နးစီၪ့ ဆၨၩဆၬဖိၪလဖၪ ၥိၩ့ထၪ့ အမိလၨဆၧချဲၩ့ လၩ့ၡၩထၪ့ဂီၩ့ ဖိၪၥၪဆံၭလဖၪ ထၪ့ဆၧမၩလိၪလးအခၫ ဘၪၥိၩ့ထၪ့ဒၪမွဲ ၦၥိၩ့အၪဆၧချဲၩ့ နီၪလီၫႉ မွဲဆၧဘဲၫနီၪ ပဆၨၩမိလၨဆၧချဲၩ့လဖၪယီၩ ဘဲၫလလၩ့မၭဘၪအဂး ပကဘၪဆုးဖီၪ့ဂုးခၧၫ့ထၬနီၪ မွဲဆၨၩဆၧထၧၫ့ၥုၪ့ထၧၫ့ၥၭႇ ဆၧၥ့ၪယၫနၪၥ့ၪ ကဘၪအီၪဝ့ၫလီၫႉ တၡါနီၪ ၦၥိၩ့အၪဆၧချဲၩ့လဖၪ ဂဲၫလုဘံၭထၪ့ ဆၨၩမိလၨဆၧချဲၩ့နီၪဆ့ ဘဲၫဆၧဒီၩ့အီၪဝဲၩ့အၥိၭ ထံၫအၪထံၫနၧၩ့ ႇ မ့ၪအၪမ့ၪနၧၩ့ (ရေများလျှင် ရေနိူင်၊ မီးများလျှင် မီးနိူင်)  မွဲဂၪ့ခိၪအဆၧမွဲဆၧတီၩကမံၩ့နီၪလီၫႉ