ၥုၪ့ၥၭဘၪလၩ့ဎိၭဒဲ လဘၪလၩ့ဎိၭဘၪ ဆၧအဲၪတၩ့ၥံၪအကျၩ ဆၧလဘၪလၩ့ဎိၭဘၪ မန့လဲၪအီၪလဲၪႉ အဆိၪထုၬ ပကယိထၪ့ကၠၭ ဆၧအၪ့ဎၬဆၧဆီၫ့မီၪ့အဂဲးဘီၪနဲၪႉ

ၥုၪ့ၥၭဘၪလၩ့ဎိၭဝ့ၫဒၪ ဆၧအဲၪတၩ့ဖိၪၥံၪနီၪ ဆၧၥၭမၧၫ့အဂးထိးဆၧၫ့ထၬဝ့ၫႇ လၧဆၧကမံၩ့မံၩ့ အဖၫ့ခိၪ အၪ့ဎၬထၪ့ဝ့ၫဒၪလဖၪ အၪဒၪဆၧနီၪ ဆၧဘၪလၩ့ဎိၭအီၪဝ့ၫဒၪအကၠီၩ့ အဝ့ၫၥံၪအကျၩယီၩ ဆၧကိၭမံၩ့ နီၪ အီၪဘၪဝ့ၫဒၪ လကၭဘၪ ဆၧနၪၥ့ၪလိၬၥၭဆ့ အီၪအလၧၫ့အဎွ့ၩဒံၭနီၪလီၫႉ

ၥုၪ့ၥၭလဘၪလၩ့ဎိၭဘၪ ဆၧအဲၪတၩ့ဖိၪၥံၪလဖၪနီၪ ဆၧၥၭမၧၫ့အဂးထိးဆၧၫ့ထၬဝ့ၫဆ့ လမီၪ့ဎီၩ့ဘၪ လိၬၥၭဂီၩ့ ဆၧကိၭမံၩ့အဖၫ့ခိၪအၥုၪ့ၥၭလဘၪလၩ့ဎိၭဘၪအကၠီၩ့ အဝ့ၫၥံၪအကျၩနီၪ ဘၪလီၩ့ဎိၭဎဲၫ့န့ဝ့ၫအၪမၬ လ့ၬႉ အ့ၪမွဲဎိၭဎဲၫ့လိၬၥၭ လန့ဘၪအခၫဘိၭ ကကဲၪထၪ့ဆၧၥုၪ့ၡၪ့ၥၭၡၪ့လဖၪနီၪလီၫႉ

ဆၧဘၪၥၭအနိၫ့ ၥုၪ့ၥၭဘၪလၩ့ဎိၭဝ့ၫဒၪ ဆၧအဲၪတၩ့ဖိၪၥံၪယီၩ ဆၧဘၪၥၭ ဘၪလၩ့ဎိၭအကၠီၩ့ ကလ့ၩ ခလဲၪ ကမၩမန့လဲၪ ကအၪ့ကၠၭမန့လဲၪ ဆၧလဖၪယီၩ အ့ၪမွဲကမိမၩဝ့ၫအခၫ ဘၪကိၭလိၬၥၭ၂မီၪ့ လလိၪဘၪဂီၩ့ လၧၥုၪ့လဖျိၪ့ဎး ၥၭလဖျိၪ့ဎးဖၧၩ့ အီၪဝ့ၫန့အကၠီၩ့ အဝ့ၫၥံၪအကျၩ ဆၧအွံၪဆၧယိၭ လအီၪဒဲ အီၪဝ့ၫန့ မုၬမုၬ လၩလၩနီၪလီၫႉ

ဆၧဘၪၥၭ လလၩ့ဎိၭဘၪ ဆၧအဲၪတၩ့ဖိၪၥံၪနီၪဘိၭ ကိၭၥၪအမံၩ့ ကဘၪလီၩ့န့ဒၪလိၬၥၭအၥၭလုအကၠီၩ့ အဝ့ၫၥံၪအဂး ဆၧအွံၪဆၧယိၭ ကအီၪထၪ့ကိၭနံၩနီၪလီၫႉ ပၧၩဝ့ၫပမိလ့ၩထယီၩ လါနၫ့အဝ့ၫဘ့ၭ မကမိလ့ၩဧၪ ပၧၩဝ့ၫပမိအၪ့အယီၩ လါနၫ့အဝ့ၫဘ့ၭ မွဲကမိအၪ့ဝ့ၫဧၪ အဝ့ၫမိလ့ၩ အဝ့ၫမိအၪ့ အဝ့ၫမိမၩလဖၪနီၪဆ့ အ့ၪမွဲ ပလဘၪဘၪပၥၭစွါဘဲၫ လၧပၥိၭနံၫဂၩအကျၩ ဆၧမုၬဆၧလၩကအီၪနီၪ အီၪဒၪၡၩၡၩဖိၪနီၪလီၫႉ စံၭမၬချၭ အဝ့ၫဘ့ၭ အဲၪဒိၭလ့ၩစဲၪ့လၫ့လၧခီၫ့ ပၧၩခီၫပမိအီၪဒၪလၧဂံၪ့ဖၧၩ့ႉ ပဘၪလီၩ့လ့ၩဆၧနီၪ ပအဲၪဒိၭအ့ၬႉ ကကဲၪဘယီၩဘီၪနဲၪႉ

လခဲၫ့ကမံၩ့နီၪဘိၭ အခၨၬႉ အခၨၬလၩ့ဂၬလိၬၥၭ ၦၥိၭနံၫဂၩယီၩ ပအီၪပအၪ့အဒီၩ့ၥံၪ ဆၧဘၪလၩ့ဎိၭ အီၪဝ့ၫဒၪလါနၫ့ႉ အခၨၬလမီၪ့ဎီၩ့ဘၪၦၡၩနံၫဂၩယီၩနီၪ အီၪအၪ့လ့ၩထဲၩ့ဒဲ အၥုၪ့အၥၭၥံၪ မွဲကဘၪလၩ့ဎိၭလိၬ ၥၭအ့ၬႉ စံၭမၬချၭ ကဂၩနီၪ အီၪၥ့ၪဆံၫ့ဆံၫ့ဖျ့ၪဖျ့ၪ အကဂၩနီၪခီၫ အီၪၥ့ၪၥၭလိၫၥၭလံၭစွါဘဲၫ မွဲကဘၪဆုး နးထံၪအ့ၬႉ ကဂၩနီၪအၥုၪ့ဂ့ၩၥၭဘွၩအီၪ အကဂၩနီၪ အၥုၪ့ကဲၪ့ၥၭကဲၪ့အီၪစွါဘဲၫ ပကစီၪဘၪအဝ့ၫယီၩ ကြၨၭ လၧယၧၩအ့ၬဘဲၫနီၪမွဲၥ့ၪဆ့ႉ

ဂီၩ့နီၪ ပထိၪတွၭအၪ့ဎၬဆၧ ပခိၪနုၬအဂဲး မီၪ့ဎီၩ့လိၬၥၭဧၪႉ အ့ၪလမီၪ့ဎီၩ့ဘၪလိၬၥၭစွါဘဲၫ ပဖ့ၪကိၪ့ဖ့ၪ တဲၩ့လိၬၥၭ မွဲကန့နးမံၩ့အ့ၬႉ ပဆုးလ့ၩလၧအမ့ၬယၫ မွဲကန့ၥ့ၪဂ့ၩဂ့ၩဘၪဘၪအ့ၬႉ အ့ၪမွဲဆၧဘၪလၩ့ဎိၭ လအီၪ ဘၪဒၪ ကပျဲကဆဲလီၫနီၪဘိၭ အတွၭအီၪအ့ၬႉ လါနၫ့အ့ၪမွဲဆၧဘၪလၩ့ဎိၭ အီၪနးမံၩ့အ့ၬစွါဘဲၫ ဆၧအယီၩ ကကဲၪထၪ့ဆၧကၪဖၭဒိၪနီၪလီၫႉ