ဆိၬၥၫထနၫ ၥၭဘၪ့ၦမုၪ Blessed Sandra Sabattini အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ  မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့  မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ဆိၬၥၫထနၫ ၥၭဘၪ့ၦမုၪ Blessed Sandra Sabattini   အဂဲးအကၠီၩ့နီၪလီၫႉ Blessed Sandra Sabattini ယီၩ အီၪဖျဲၪလၧ နံၪ့ (၁၉၆၁) နံၪ့ လၧခး Italy ဝံး Remini နီၪလီၫႉ အဝ့ၫယီၩ မၩလိၪ ၥံၪ့ဎွံၪ ဆၧမၩလိၪအခံၫ့နီၪ လ့ၩမၩၥၫထနၫဆၧမၩလၧ ခး Africa နီၪလီၫႉ အဝ့ၫယီၩ ကဆါဎြံၬအဂး မၩၥၫထနၫဆၧမၩ အၪမၬဒ့ၭနီၪလီၫႉ

အဝ့ၫကထၪ့ၡါလၧ Goeidorosi အဂးပၥၭၡါၥံၪ ချဲၩ့လၩ့ဎိၭလၩ့ထၬ အဝ့ၫၥံၪဂီၩ့ လယံၬလမီးဘၪ အဝ့ၫအၥၭအီၪ (၂၂) နံၪ့နီၪ လဲၪ့ၥိၪ တၨၭဘၪအဝ့ၫတၭ ၥၭနၪ့ဆၧလၧခီၫ့ဂီၩ့ အီၪကဖျၭနီၪ ၥံၫဖီၩ့ခွံၬဝ့ၫဒၪနီၪလီၫႉ အဝ့ၫၥံၫဖီၩ့ခွံၬဂီၩ့ လယံၬလမီးဘၪ ၦၡၩရွံထၪ့အဝ့ၫ Blessed Sandra Sabattini နီၪလီၫႉ အဝ့ၫအခိၪၥူၫနီၪ ၦဂူၫဂၩ ကယူၭယၪ့ ကန့အဂး ဖၭထၬဝ့ၫလၧ Remini ၥရိၭဖၧၩ့နီၪလီၫႉ ဆၧနီၪအကၠီၩ့ႇ  ကၭၥလ့ၬဆၧအီၪကီၪ့ ၥၭဘၪ့ၦမုၪဖၧၩ့ယီၩ့ Blessed Sandra Sabattini ဘၪထိးရွံထၪ့ၥၭ အဆၫ့လၧၫ့ထုၬနီၪလီၫႉ

ဆၧနီၪအကၠီၩ့ ၥၭဘၪ့ဖိၪၥံၪ ကဘၪအၪ့န့အဒီၩ့ မနီၪလဲၪစွါဘဲၫ ဆၧလၧပမၩ ၥၫထနၫဆၧမၩကမံၩ့နီၪ ၥၫ့ခၫၥံၪႇ မံၭထၬမုၪၥံၪမၬ ဘၪမၩမွဲအ့ၬ ဎရံၬဖိၪၥံၪကိၭဂၩမၩန့ႇ ဎရံၬဖိၪၥံၪကိၭဂၩ ကဘၪမၩ ၥၫထနၫဆၧမၩလိၪဝ့ၫဒၪနီၪလီၫႉ အဲၪကွံၩဘၪ  ထၧၫ့ဖုဝဲထံၩၥိၭ ထီးအလူၬၥံၪဧ့ႇ ဘဲၫၥိၭ နၥံၪကထီးန့ထၬ Blessed Sandra Sabattini  အဂဲးအကၠီၩ့ ကန့အဂး ယရၩလၩ့န့အ့ၪဘၪနၥံၪလၧ  ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ  အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ