ခိဆၧၩ့ချံၪ့ဘၪအၪ့လဲၩ့ထၪ့အၥၭဘဲၫယီၩၥိၭနီၪ ယိလၩ့န့အဝ့ၫၥံၪအဂး ပၥထ့ၫလဖၪ အခီၫ့ၡၩ ဆၧဖံၭဆၧမၩလဖၪၥံၪအကၠီၩ့ နဲၩ့ဎီၩ့ကိၪ့ၥ့ၪလဖၪ လီၩ့ဖျီၪ့ထၪ့ထၬနီၪလီၫႉ ဆၧလၧဂၪ့ခိၪ ခိဆၧၩ့ချံၪ့ အၪ့လဲၩ့ ထၪ့အၥၭအဖၫ့လၬနီၪ ဆၧဒုၭၥုၭ ခီၫ့ၡၩအနိၫ့ ၡၩခံးဂး ဒဲ ဆုးကျိၭအၥၭလၧ ထံၫဂဲးခးဂဲး နီၪလီၫႉ ခိဆၧၩ့ချံၪ့ဂဲၫအၧၩ့နၭထၪ့အကၠီၩ့ ဘၪထဲးဘၪဎဲး ၦခမျၧးၥံၪအီၪ ဝံးၥံၪ တဝၫ့ၥံၪႇ ဘၪထဲးဘၪဎဲးထၪ့ ခီၫ့ၡၩအခၫ လ့ၩၥုၭအီၪထဲၩ့အၥၭလၧ ခိဆၧၩ့ချံၪ့ဒဲ ခီၫ့ၡၩလ့ၩထၪ့ထီၪ့ဝ့ၫဒၪထံၫခး လဖၪအကၠီၩ့ ဘၪဒၪဎီၩ့ဆၧၫ့ယၫဆၧကၪ ဆၧဂဲၩဆ့နီၪလီၫႉ
လၧခးပယၩ့ယီၩ မၩဂၭဂီၩ့ဂၭစၪထၪ့ခိၪလီၩ့ဂီၩ့ ခုၪ့လိးယ့ၫႇ ထီၫ့ႇ စ့ၩႇ ၥၭထုႇ နဲၩ့ဎီၩ့စီၩ့ဂဲးဒဲ ကျဲၩ့တံၭ ထုၭထၪ့ဝ့ၫဂ့ၩဘၪစဲၪ့နီၪ ဆၧပဒၩ့ထၬအီၪနးမံၩ့အ့ၬအၥိၭ ၥံၪ့ကျိၭလဖၪ ဖ့ၬဝ့ၫထီး လမိအီၪလၧၩ့ဘၪႇ ခုၪ့ဖံၬၥံၪ မ့ၬၥံၪဂီၩ့ အၪ့ဆၫဝ့ၫလၧခးစ့ၫကပူၫၥံၪနီၪ ဘၪထံၭဆၫပထံၫခး နဲၩ့ဎီၩ့အၪမၬအကၠီၩ့ ၦလၧအယိထွ့ၫနဲၩ့ဎီၩ့ ပကိၪ့ၥ့ၪလဖၪ လီၩနဲၪထၬဝ့ၫနီၪလီၫႉ အ့ၪပကဘၪ ယိမၩလိၪအဒီၩ့ကမံၩ့နီၪဘိၭ နံၪ့ ၂၀၀၈ လၩမ့ၫနီၪ ၦလၧအအီၪထံၫထၪကျိၩ့လဖၪ ဘၪထိး နၫဂ့ၭလံၩမုလဖုၬဒၪအိၩ ၦၡၩၥံၪဘၪၥံၫခွံၬဎွ့ပၥ့ၪလဲၪ ဆၧဂၭဂီၩ့ဂၭစၪထၪ့ ဎွ့ၩပၥ့ၪလဲၪနီၪ ဆၧအဂဲး ယီၩ မွဲပကၥ့ၪယၫကိၭဂၩလီၫႉ
မွဲဆၧဘဲၫနီၪ အထီဘဲၫယီၩ ၦၡၩၥံၪလဖၪ ဂၪ့ခိၪယီၩပကမၩထၪ့ဘၪဒၪပၥၭစွါဘဲၫ လၧခဲၫ့ ဆၨၩၥၫ့ဘၪ့ ဖိၪလံၩၥံၪလဖၪအဂး ကမီၪ့ဎီၩ့ဒၪ ပယိအ့ၪအဝ့ၫၥံၪအဂးအ့ၬဒဲ ပဖ့ၪလၫ့ထးအ့ၪအဝ့ၫၥံၪ ဆၧနိၪ့ဆၧနၭအကၠီၩ့ ခပယၩ့ယီၩ လကၭဘၪ ဂၪ့ခိၪထၧၫ့ဘံၪ့ယၫ နဲၪဖျီၪ့ထၪ့ထၬဝ့ၫဂီၩ့ ဆၧယီၩ ၦလၧကဘၪလ့ၩခိၪလ့ၩနါနီၪ ကမွဲဒၪပဒိၪၥံၪအကၠီၩ့ လီၩထၬဝ့ၫဒၪနီၪလီၫႉ