အဲၪကွံၩဘၪၦခိၭနၪဆၧဖိၪထၧၫ့ဖုဝဲထံၩၥိၭထီးလူၬၥံၪဧ့ႇ ၥၭဎွံၪမုၬမုၬ ကိၭဂၩဒ့ၭ လါဆံၭနဲၪႉဘဲၫယီၩယမိအဲၪဒိၭရၩလၩ့န့အ့ၪဘၪနၥံၪနီၪမွဲဝ့ၫဒၪ ၦလၧအကဲၪ မိဖါ လဖၪနီၪ အဖိၪအဒံၪဘဲၫၥိၭကကဲၪထၪ့ၦလၧအခိၪနုၬကစဲၪ့ဝ့ၫဒၪ လဖၪအဂး ပကယိထဲၩ့ခွါထဲၩ့ႇၥီၪ့ထဲၩ့ၥၫ့ထဲၩ့အဝ့ၫၥံၪဘဲၫၥ့ၪလဲၪအဂဲးနီၪလီၫႉ အဲၪကွံၩဘၪ ၦခိၭနၪဆၧဖိၪၥ့ၪဧ့ႇ ပဖိၪပဒံၪဘဲၫၥိၭကကဲၪထၪ့ဖိၪလၧ အၥ့ၪယၫခိၭနၪလီၩ့ဖိၬ မိဖါအဆၧအၪ့ၥီၪ့လဖၪဒဲအဆၧၥၭမၧၫ့လၧယၫ ဘဲၫၥိၭကကဲၪထၪ့ ဖိၪလၧ အလၧၫ့ဎွ့ၩဝ့ၫဒၪဆၧကိၪ့ၥ့ၪကိၪ့ဘၪႇ ဖိၪလၧအၥ့ၪယၫယူၭယၪ့အဲၪကွံၩ မိဖါ လဖၪအဂး ၦလၧအကဲၪမိဖါလဖၪကဘၪၥီၪ့ၥၫ့ယိခွါအဖိၪအဒံၪဘဲၫၥ့ၪလဲၪနီၪ ပကဘၪၥ့ၪယၫနီၪလီၫႉအထီဘဲၫယီၩၦလၧအကဲၪမိဖါအၪဒၪဆၧနီၪ ယိခွါၥီၪ့ၥၫ့ အဖိၪအဒံၪအဂးဖ့ၪလၫ့အခံၫ့မွဲလန့လၧၩ့ဘၪတၭၦလၧအကဲၪဖိၪလဖၪနီၪ ဎိၩထၪ့ အခၫကဲၪထၪ့ဝ့ၫဒၪဖိၪလၧအရၧးစၧးဝ့ၫဒၪလဖၪႇ ဖိၪလၧလခိၭနၪလီၩ့ဖိၬဘၪ မိဖါအဆၧအၪ့ၥီၪ့ဒဲဖိၪအၧၩ့အၥၫ့လဖၪနီၪလီၫႉ ၦခိၭနၪဆၧဖိၪၦလၧအကဲၪဝ့ၫဒၪ မိဖါၥံၪဧ့ႇ ၦဖိၪၦဒံၪဆၧၥၭမၧၫ့အထီလၧယၫ လကဲၪဘၪ ဘဲၫယီၩၥိၭအဂး အဆိၫထုၬၦလၧအကဲၪဝ့ၫဒၪမိဖါလဖၪမုကိၭနံၩဒ့ၭအၡၩထုၬဖိၭဘိၭအခံၫ့ ( ၃၀ ) မိနစ် နီၪကဘၪအီၪလၧ အဖိၪအနဲၩ့ထံၭဂီၩ့ ကဘၪချဲၩ့လၩ့ဎိၭဝ့ၫဒၪလၧ အဖိၪနီၪလီၫႉ အဲၪကွံၩဘၪ ၦခိၭနၪဆၧဖိၪၦလၧ အကဲၪဝ့ၫဒၪမိဖါၥံၪဧ့ႇ လၧနၥံၪလနါဂၧၫ့ယူၩယါဒံၭဘၪဆၧအဂဲးယီၩ့ အဖီၩ့ခွံၬအခံၫ့လဖၪအိၩ မုကိၭနံၩဒ့ၭအဖၧၩ့အၡၩထုၬအခံၫ့ဖိၭဘိၭ မိနစ် ( ၃၀ ) နၥံၪၥ့ၪယၪအီၪလၧ နၥံၪအဖိၪအဒံၪအနဲၩ့ထံၭ ဘူၭဘူၭ ထံးထံး ဂီၩ့နၥံၪကွ့ၩၥဲၫလၧ အဝ့ၫၥံၪမွဲဂ့ၩႇ နၥံၪလီၩ့ထဲးလၩ့ဎိၭဆၧလၧအဝ့ၫၥံၪမွဲဂ့ၩ နၥံၪအီၪလၧနၥံၪအဖိၪ အနဲၩ့ထံၭ ကိၭနံၩဧၪႉ