ၦမၩဎွ့ၩပၩရမံၫနီၪ ပကဲၪလၫ့ထၧၫ့မၫဝၩနီၪမွဲအ့ၬႉ ပကဲၪလၫ့ထၧၫ့မၫဝၩလါနၫ့ ပကဲၪထၪ့ ၦမၩဎွ့ၩပၩရမံၫလမွဲဘၪလီၫႉ

ဆၧအဲၪတၩ့ဖိၪၥံၪအၪဒၪဆၧ ဆီၪ့မီၫ့ထၬဝ့ၫနီၪ ပဂဲၫထဲၩ့အဲၪလိၬၥၭအနံၪ့အ့ၪယံၭဂီၩ့ အ့ၪပအီၪဎုၬဘၪလၧ ပအဲၪဝ့ၫဒၪၦလဂၩစွါဘဲၫ အနီၪစီၪဘၪဝ့ၫလၧ ပကဲၪထၪ့ၦမၩဎွ့ၩပၩရမံၫ ယူၭနီၪလီၫႉ

အၡါမၪဆၧအဂဲးယီၩယိၬန့အယီၩဒံၭႉ ဆၧနီၪအကၠီၩ့ ကနံၩယီၩ ယအဲၪဒိၭလီၩၥ့ၪယၫအ့ၪဘၪနၥံၪ ပၩရမံၫ၁၀မံၩ့အဂဲးဒဲ ပၩရမံၫလဖၪယီၩ ပကဘၪမၩဎွ့ၩထၪ့ပၥ့ၪလဲၪအဂဲးနီၪလီၫႉ

ပၩရမံၫအဆိၪထုၬကမံၩ့နီၪ မွဲလၧဆၧဖ့ၪလၫ့နီၪလီၫႉ ဘဲၫအဝ့ၫကအီၪဘၪအၪ့ဘၪဂ့ၩဂ့ၩ အဂး လၧပဆၧအီၪဝ့ၫအဖၧၩ့ ပဖ့ၪလၫ့အ့ၪအဝ့ၫလီၫႉ လၧဆၧဖ့ၪလၫ့နီၪအဖၫ့ခိၪ လအီၪက့ၪဘၪ ဆၧအီၪက့ၪထၪ့ထီၫၥၭ ဘဲၫၥိၭ အဝ့ၫနီၪယဖ့ၪလၫ့မၬန့ဘၪဝ့ၫဘဲၫနီၪလီၫႉ ကန့ထဲၩ့အဂးဆ့ ယိလါဝ့ၫဧၪအ့ၬႉ အယီၩနီၪ မွဲလၧဆၧဖ့ၪလၫ့ပၩရမံၫနီၪလီၫႉ

၂ႉ အီၪဝ့ၫဒၪလၧ တခ့ၭဖဝၭဂ့ၩဘွၩအဖၧၩ့လီၫႉ လၧဆၧအဲၪတၩ့ၥံၪအကျၩ ကဲၪထၪ့ယံၩယါဆၧဘံၪဘူၪကမံၩ့နီၪ ဆၧအဲၪတၩ့အီၪလါနၫ့ လီၩ့အဲၪထဲၩ့ၦဂူၫဂၩ လီၩ့အၪ့ဂူၪလိၬၦၡၩအဆၧအဲၪတၩ့ ကဂၩဒဲကဂၩအဖၫ့ခိၪ အီၪ့ကၪထၬ ဆၧတီၩလီၩ့အ့ၬႉ ဆၧလဖၪယီၩအၪဒၪဆၧပဒၪဘၪလီၫႉ

အၡါမၪ ပဆၧအဲၪတၩ့အီၪထၬဝဲၩ့ယူၭ တခၩၦၡၩကဂဲၫၥၭဘၪပၧၩနးဂၩ အ့ၪပၥၭလပၪထဲၩ့ဘၪနီၪ ဆၧလဖၪယီၩဘၪကဲၪထၪ့အလးအီၪနးစီၪ့အ့ၬႉ ဆၧနီၪအကၠီၩ့ ပအီၪမၧၫ့ပၥၭ ဘဲၫပလအဲၪဘိၩ့ဘၪၦၡၩအဂးနီၪ မွဲဒၪပပၧၩ့ဆုးထၬ ပတခ့ၭဖဝၭအဂ့ၩနီၪလီၫႉ

၃ႉ လယိလၩ့ဘၪအဂးပၩရမံၫလီၫႉ ဆၧအယီၩနီၪ ယိလၩ့ဒၪန့ၫအဝ့ၫကအီၪဘၪအၪ့ဘၪဂ့ၩဂ့ၩအဂးလီၫလမွဲဘၪတၭ အ့ၪမွဲအဝ့ၫယီၩအီၪဘၪအၪ့ဘၪဂ့ၩဂ့ၩစွါဘဲၫ မုလါအဆၧအဲၪတၩ့ အီၪဘၪအၪ့ဘၪဂ့ၩဂ့ၩဘၪဘၪဆ့လီၫႉ

အဆၧမုလါယီၩ လမွဲဘၪမုလါဝ့ၫကမံၩ့လီၫတၭ ဘဲၫကကဲၪထၪ့တၡါအဂးဆ့ မၩလၧၫ့ဎွ့ၩထၪ့အ့ၪဝ့ၩဒၪလီၫႉ အ့ၪပကဘၪလီၩဖၨၪဖၨၪနီၪဘိၭ ဘဲၫအဆၧအဲၪတၩ့ကန့ဘၪဆၧအဂ့ၩထုၬလဖၪအဂး မၩထၪ့အ့ၪဝ့ၫနီၪလီၫႉ

၄ႉ ဆၧကိၪ့ဆၧတဲၩ့အီၪဝ့ၫဒၪ ပၩရမံၫနီၪလီၫႉ ပကဲၪမုၪမွဲဂ့ၩ ခွၫမွဲဂ့ၩ အ့ၪမွဲပစံၭလၩ့ထၬပၥၭလၧ ၦမၩဎွ့ၩပၩရမံၫကဂၩစွါဘဲၫ ပဆၧကိၪ့ဆၧတဲၩ့ဘဲၫကြၨၭအီၪအၥိၭ ကဘၪအီၪဝ့ၫဒၪလီၫႉ အ့ၪမွဲပဆၧကိၪ့ဆၧတဲၩ့အီၪမၬ ပလီၩ့ဖ့ၪလၫ့ ပဆၧအဲၪတၩ့ ဆၧကိၪ့အတီၩအလီၩ့လဖၪကန့နီၪလီၫႉ ဆၧယီၩနီၪဂ့ၩ ဆၧအယီၩနီၪဂ့ၩအ့ၬ အဂဲး ပၧၩဒၪပၧၩအ့ၪမွဲ ပအၪ့ဎၬလၥ့ၪဘၪစွါဘဲၫ ပကြၨၭစီၪလၩ့ပၥၭလၧ ၦမၩဎွ့ၩပၩရမံၫအ့ၬႉ

၅ႉ ဆၧၥုၪ့ဆီၪ့ၥၭဆီၪ့ပၩရမံၫ ပၩရမံၫအယီၩနီၪ ပၧၩ့ဆုးထၬအဖၫ့ခိၪဆၧ၄မံၩ့အိၩနီၪလီၫႉ ဘဲၫပဖ့ၪလၫ့ကန့ႇ ပဆၧအဲၪတၩ့ကအီၪဘၪဂ့ၩဂ့ၩအဂး ပဖ့ၪဆိၫဂုကန့ႇ ပဆၧကိၪဆၧတဲၩ့ကအီၪအဂးႇ ဘဲၫပတခ့ၭဖဝၭကဂ့ၩအဂးနီၪ ပၥုၪ့ပၥၭအ့ၪဆီၪ့မၬကန့နီၪလီၫႉ အ့ၪမွဲပၥၭအီၪ တခၩၦၡၩဂဲၫမၩယဲၩ့လၫ့ပၧၩလါနၫ့ မွဲပကယဲၩ့လၫ့အ့ၬႉ အ့ၪမွဲပၥၭလအီၪဘၪနီၪဆ့ တခၩပကအဲၪၦၡၩနးဂၩ မွဲကဂုးခၧၫ့ဧၪအ့ၬႉ