ဖိၪအဆၧကိၭစိၩလၧ ဖါအအီၪ

ဘၪကကၠၪကၠၪ လၧဖိၪၥံၪအအီၪ ဂဲၫဝ့ၫဒၪ ခွ့ၩဒိၭနါ အဆၧကိၭကထံၪနီၪ ဖါကဂၩအဂး ကဲၪထၪ့ ထီးနံၩယၫ ဆၧမုၬဆၧလၩၥ့ၪဝ့ၫလီၫႉ ခွ့ၩဒိၭနါလူၥီၫထၪ့အခၫ ဖါယီၩအမ့ၬခွၩ့ဖၧၩ့ ဎွ့ၩလၩ့ဝ့ၫဒၪလၧ ဆၧနံမွံၫလီၫႉ ဟဲၫလိၫ ဖိၪမုၪဧၪ ႉ ဖါအလူနီၪ အၪ့လဲၩထၪ့ၥၭ စ့ၭစ့ၭဒံၭႉ ဖါနီၪချဲၩ့ဒုၪ့အဖိၪမုၪ အၪမၬလ့ၬႉ နအၪ့မ့ၩဂီၩ့ယူၭဧၪႉ နဆၧဖံၭဆၧမၩ ဘၪလးဘၪစၩဧၪႉ ယိလၩ့နဆၧဆီၪ့ဆၧချဲၫ့အီ ဖိၪမုၪႉ ဖိၪမုၪနီၪဘိၭ လီၩအ့ၪအဖါ အဆၧဖံၭဆၧမၩအဂဲး ဒဲ ကိနံၩဒ့ၭအဝ့ၫ အဂဲးအဖးလဖၪလၥၨၩႉ ဖါနီၪ ခိၭနၪအ့ၪအဖိၪမုၪ အဆၧချဲၩ့ ထီးလူၬႉ

ဘၪကထံၪထံၪနီၪဘိၭ “ဟၩ ဖိၪမုၪ နလီၩမနီၪလဲၪ?” ဆၧအၪ့စၪ့အယီၩနီၪ အဝ့ၫလနါဂၧၫ့ဘၪအကၠီၩ့ ခ့ၬလၫ့အၪ့စၪ့ထဲၩ့ အဖိၪမုၪမွဲအ့ၬႉ ချဲၩ့လၧအဖိၪမုၪ လဘျဲၩဒံၭဘၪအကၠီၩ့ ကျဲၩ့ခ့ၬလၫ့အၪ့စၪ့ထဲၩ့ အဖိၪမုၪခီၫႉ ဖါယီၩ ကမိမၩထီၫလၫ့ ဆၧချဲၩ့လၥၨၩႉ အဝ့ၫၥံၪချဲၩ့ဂီၩ့ဂီၩ့ ကခွံၬလၩ့ထီခွ့ၩဒိၭနါအခံၫ့နီၪ ဖါယီၩအီၪကယုကစုၩကဆိဂီၩ့ “နကိၭ ချဲၩ့ဒုၪ့စိၩယၧၩ ဘယီၩအကၠီၩ့ စံၭခိးစံၭတၩ ဖိၪမုၪဧ့ႉ” ဖါယီၩ လီၩထွ့ၫအဖိၪမုၪ ဘဲၫနီၪအၥိၭလီၫႉ

အ့ၪပနါဂၧၫ့ဘၪ ဆၧချဲၩ့ယီၩစွါဘဲၫ ကြၨၭပအၪ့ဎၬထၪ့ထဲၩ့ ပကိၭဘၪအဝ့ၫခွ့ၩဒိၭနါလီၫနီၪ အဝ့ၫဘၪစံၭခိးစံၭတၩထဲၩ့ပၧၩနီၪ မွဲဘၪလဲၪႉ ပမိဖါၥံၪနီၪ လၧပအီၪ အၪ့ကံၩ့ပၧၩဆၧ အီၪအၪအၪအ့ၬႉ အဝ့ၫၥံၪ မိနါဂၧၫ့ပလူႇ မိချဲၩ့ဒုၪ့ပၧၩ ဒဲ ပကဲၪဖိၪလဖၪ ပၥၭနၪ့ အဝ့ၫၥံၪဒံၭအ့ၬအဂဲး အဝ့ၫၥံၪမိၥ့ၪယၫဝ့ၫလီၫႉ ပမိပဖါၥံၪ အၥၭဂဲၫဎိၩထၪ့ကကၠၪ အဝ့ၫၥံၪအနဲၩ့ဎီၩ့နီၪ လၩအံၪ့ဝ့ၫဒၪလီၫႉ ဖိၪၥံၪ အီၪလၧ အဝ့ၫၥံၪအနဲၩ့လၧၩ့အ့ၬႉ အဝ့ၫၥံၪ အထံၩၥိၭကနၩ့နၩ့နီၪ အီၪလၧဂၪ့ခိၪချိၫ့ဖၧၩ့လၧၩ့အ့ၬႉ ဖိၪၥံၪအနဲၩ့ဎီၩ့နီၪဘိၭ မွဲလၧဆၧဖံၭ ဆၧမၩႇ ထံၩၥိၭအၥၫ့လဖၪ ဒဲ ဂံၪ့ဒီၪ့အၥၫ့အကၠီၩ့ အနဲၩ့ဎီၩ့ဂဲၫလဲထၪ့ဝ့ၫလီၫႉ ဆၧနီၪအကၠီၩ့ လၧဖိၪၥံၪအဂး ကဘၪဖ့ၪလၫ့ ပမိပဖါ အခံၫ့နီၪ ကဲၪထၪ့ဘဲၫဆၧမၩကမံၩ့ၥိၭၥ့ၪလါနၫ့  ပကိၭစိၩခွ့ၩဒိၭနါကထံၪနီၪ လၧပမိပဖါအဂးခီၫ ကဲၪထၪ့ထဲၩ့ မုထီးနံၩယၫအဂး အရ့ၩဒိၪထုၬအခံၫ့ ၥ့ၪနီၪလီၫႉ

ဆၧနီၪအကၠီၩ့ ကနံၩယီၩအထးဖၧၩ့ ကိၭစိၩနဖါခွ့ၩဒိၭနါနးထံၪဆံၭႉ အၪ့စၪ့စိၩမၬ ဖါဧ့ နအီၪမုၬဧၪ လီၫႉ လၧဆၧအၪ့စၪ့နီၪ အလးခဲၫ့ နဒၪစိၩ ဖါအဆၧနံမွံၫ လန့ဘၪလါနၫ့ လၧဖါအၥၭလၬဖၧၩ့နီၪ အီၩ ယဖိၪမုၪယီၩ ယဖိၪခွၫယီၩ ၥၭနၪ့ယၧၩဒံၭအ့ၬနဲၪ ဆၧဆီၫ့မီၪ့ ဘဲၫနီၪၥိၭ မွဲကအီၪထၪ့တၡါၡါဂီၩ့ အၥုၪ့အၥၭကမုၬဝ့ၫဒၪ တၡါၡါလီၫႉ