ထီၫ့ခၪ့ဖံၭ – ၁

လၧဖျိၩ့ဖျိၩ့အိၩ ၦဖိၪဎွ့ၪမုၪဖိၪအီၪဝ့ၫဒၪ ကဂၩနီၪလီၫႉ အဝ့ၫအမံၩ့နီၪ မွဲနးဂ့ၩလူၬနီၪလီၫႉ နးဂ့ၩလူၬနီၪ ဘၪလ့ၩအီၪလၧ အမိဂါ ဂါၥၧၫ့ဘံၩ အဂံၪ့နီၪလီၫႉ ဂါၥၧၫ့ဘံၩနီၪ အဖိၪမုၪအီၪဝ့ၫ နံၫဂၩနီၪလီၫႉ နးဂ့ၩလူၬလဂၩ ဘၪလ့ၩအီၪလၧ အမိဂါအဂံၪ့နီၪ အီၪဝ့ၫမုၬအ့ၬ ဘၪနီၫလဲၪစွါဘဲၫ ဂါၥၧၫ့ဘံၩနီၪ နၧၩ့အဝ့ၫအၪမၬဒဲ အၪ့မၧၫ့ဝ့ၫဆၧမၩ ခီၫလၧ ဆၧဖၩ့လၫ့ ထီးဆၧခံၭနီၪလီၫႉ ဂါၥၧၫ့ဘံၩအဖိၪမုၪနံၫဂၩနီၪ ဘၪမၩဆၧမၩနးမံၩ့အ့ၬဂီၩ့ ကနံၩနံၩ အီၪမွဲ ကၠၧၩ့ကၠီထၪ့အၥၭနီၪလီၫႉ

နးဂ့ၩလူၬ အ့ၪမွဲအၥၭမုၬအ့ၬအခၫ မံၫမးဘၪအမိမိၥၭဘီၩ့ဒ့ၭစွါဘဲၫႉ နးဂ့ၩလူၬနီၪ ကကၠၪကၠၪလ့ၩလၧ အမိမိအီၪ ဆၧၥွၫခိၪနီၪလီၫႉ ကနံၩနီၪတၭ အဝ့ၫလ့ၩလၧ ဆၧၥွၫခိၪနီၪအခၫ လၧၦၡၩဘၧၩ့လၩ့ထၬ အမိမိအစွၪဖၫ့ခိၪနီၪ ထီၫ့ဖီၫ့ဂဲၫမၧၫ့လၫ့ ကထံၭနီၪလီၫႉ  အထီနီၪ အမိမိနီၪ လူလၫ့အၥၭလၧ ၦၡၩဂီၩ့ အၪ့စၪ့အဖိၪမုၪ ဖိၪမုၪဧ့ႇ ဘၪနီၪလဲၪနဘၪဂၪ့အခၫ မိမိဧ့ မိဂါ ဂါၥၧၫ့ဘံၩ မၩနၧၩ့မၩစၪယၧၩ ဆၧအၪ့ဆၧအီၩ့ ဒဲ ဆၧကီၩ့ဆၧၥိၭနးဆ့ ဖ့ၪလၫ့ယၧၩဂ့ၩဂ့ၩ ဘဲၫၥိၭ အဝ့ၫအဖိၪမုၪၥံၪဧၪအ့ၬအကၠီၩ့ လီၩအ့ၪ အမိမိ ဘဲၫယီၩၥိၭလီၫႉ အထီနီၪ အမိမိစံၭဆၧၫ့ထဲၩ့ ဖိၪမုၪဧ့ စၭထၪ့လၧ ကနံၩယီၩ ထီၫ့ဖီၫယီၩ ဂဲၫၡီၫ့ထံၫကိၭနံၩဂီၩ့ အ့ၪမွဲဖိၪမုၪအၥၭၡၪ့အခံၫ့ ဘၪဒၪဎီၩ့ဆၧကၪဆၧဂဲၩအခံၫ့ အ့ၪမွဲမိမၩကမံၩ့မံၩ့ မိမိကဖ့ၪလၫ့အ့ၪ ဖိၪမုၪနီၪလီၫႉ နးဂ့ၩလူၬအမိမိလဂၩ စံၭအဖိၪမုၪဘဲၫယီၩၥိၭဂီၩ့ အခၫ လၩ့မါခွံၬဝ့ၫဒၪနီၪလီၫႉ နးဂ့ၩလူၬလဂၩ ဒၪဘၪအမိမိအကၠီၩ့ အၥၭဂဲၫမုၬလၫ့ထဲၩ့ကဆံၭနီၪလီၫႉ နးဂ့ၩလူၬနီၪ ဘၪအီၪဖၫခွၭဒူၭဖၧၩ့ဂီၩ့ အလီၩ့ဘၪၥၧၫ့လၧဖၧၩ့ခဲၫ့ၥံၪကိၭနံၩဒ့ၭလီၫႉ လါနၫ့ နးဂ့ၩလူၬ ဘၪမၩဆၧမၩၡၪ့ ဆၧပွံၭအၥၭလၫ့နၫ့ လ့ၩၡီၫ့ ထီၫ့ဖီၫထံၫကိၭနံၩဒ့ၭနီၪလီၫႉ

ကနံၩနီၪတၭ ဝံးကဝံး စဎွၩအဖိၪခွၫလဂၩ ကထၪ့အီၪဎုၬအဂး အခံၫ့လၩ့ဘူၭထၪ့ယူၭနီၪလီၫႉ လါနၫ့ ၦမုၪလၧ အဝ့ၫဘၪ အၥၭ ဒၪဝ့ၫနးဂၩဒ့ၭအ့ၬစွါဘဲၫႉ မွဲဆၧဘဲၫနီၪ စဎွၩဒိၪနီၪ မၩဆၧဘိၪ့ဖၭဒိၪ နွ့ၫနံၩနွ့ၫနၩဂီၩ့ ကအၪ့ထၧၫ့ရွံထၪ့အဖိၪခွၫ အမၫအဂး ကယဲၦမုၪၥံၪအီၪလၧ အထံၫခးဖၧၩ့နီၪ စဎွၩခွံၬလၩ့အလူ အၪ့မၧၫ့ဝ့ၫဂဲၫထီးအလူၬနီၪလီၫႉ ဆၧဘိၪ့ဖၭဒိၪနီၪ ထီၩ့အခၫ ၦမုၪနၩ့ဖိၪၥံၪလဖၪ ဂဲၫကၠၭလၥၨၩႉ ဂါၥၧၫ့ဘံၩအဖိၪမုၪနံၩဂၩနီၪ ကၠၧၩ့ကၠီလၫ့အၥၭဂ့ၩဘၪစဲၪ့ဂီၩ့ လ့ၩဆၧဘိၪ့နီၪ ကိၭနံၩဒ့ၭနီၪလီၫႉ