ၦဖျိၩ့ဆၨၩ အခၪ့ထံၭခၪ့ဎၧၩ့

ၦဖျိၩ့ဆၨၩအလုၫလါနီၪ မွဲဆုးအီၪအလးကစီၪ့လီၫ လမွဲဘၪအကၠီၩ့ နဲၪဖျီၪ့ထၪ့ထၬဝ့ၫပျၩ့ပျၩ့နီၪလီၫႉ ၦဖျိၩ့ဆၨၩအခၪ့ထံၭၥၫ့မွဲဝ့ၫ ဖူၫထိၭမဲၪဖါၡါနီၪ အဝ့ၫအီၪလၧ အဂံၪ့ဒီၪ့ဖိၪၥံၪလၧလံၩခံၫလးကျဲၩ့ကစီၪ့ဂီၩ့ အဝ့ၫၥံၪအဆံၭလးနီၪ ထိၭဖၭဒိၪကဒုၩ ဂဲၫမၩဂၭဂီၩ့နီၪလီၫႉ ဖူၫထိၭမဲၪဖါနီၪ မၩၥံၪခွံၬထိၭဖၭဒိၪနီၪဂီၩ့ အၪ့မၧၫ့အဖိၪၥံၪလ့ၩအၪ့န့အခၫ ထိၭဖၭဒိၪနီၪ အဖိၪၥံၪဒၪလၧၩ့အ့ၬဂီၩ့ ဒၪထးဝ့ၫမွဲ ထိၭမဲၪ ကဘီၩ့နီၪလီၫႉ ဖူၫယီၩ ထိၭအမဲၪနီၪ ဖိၬလိၬထၪ့ၥံၪ့ခွံဂီၩ့ လၩ့ဆၫ့ဝ့ၫဒၪကမံၩ့နီၪ ၦလၧအခွံၪၥံၪ့ခွံနီၪ လၩ့ဘၪ့ကိၭဂၩ အစီၩ့အမၩ့အီၪ အကၠီၩ့ ၦၡၩၥံၪထီၫမံၫထီၫမၫ နီၪလီၫႉ လယံၬလမီဘၪအဖၧၩ့ အဝ့ၫၥံၪအီၪအလးနီၪၦၡၩၥံၪဂဲၫအၪထၪ့တၭ စဲၪ့ထၪ့လီၩ့ဎွါထဲၩ့ ဖံၬလး လးကျဲၩ့အဂ့ၩနီၪလီၫႉ ဖူၫထိၭမဲၪဖါနီၪ ဂဲၫစဲၪ့လၫ့လၧ အဖိၪအလံၩၥံၪကၠၧၫ့ကၠၧၫ့ ထီၩ့လၧ ထံၫဆ့ၭမ့ၬယွၩနီၪလီၫႉ  

ဖူၫထိၭမဲၪဖါဒဲ အဖိၪလံၩၥံၪ ဆုးဂဲၫထီၩ့လၧ ထံၫဆ့ၭမ့ၬယွၩနီၪ အီၪပွံၭဂီၩ့ အၪ့ဖီၪ့အၪ့ ချိၪတၭ ချိၪနီၪ မံၫ့နးကၠၪအ့ၬ အခံၫ့ယံၬထၪ့တၭ ဖူၫထိၭမဲၪဖါနီၪ ခိၭဆၧ အၥၭဆၧၩ့ဎီၩ့လၧၩ့အ့ၬဂီၩ့ ကဆုးလ့ၩထၬလၧ အမ့ၬယၫ အဝ့ၫလ့ၩအလးနီၪ ကမၩပျၩ့ထၬဖၧၩ့ၥၭ ကဖ့ၬထၬ ၥၭကျုၩအကၠီၩ့ မၪလူၬထွ့ၫထၬ အဖိၪလံၩၥံၪနီၪလီၫႉ အီၪယံၬကဆိ တရူၭဆၨၩၥံၪလဖၪဂဲၫထီၩ့တၭ လီၩနဲၪအ့ၪဝ့ၫ ချိၪနီၪ ဘၪအိၭအၪ့ဘဲၫၥ့ၪလဲၪ အဂဲးနီၪလီၫႉ ဖိၪလံၩၥံၪယီၩ အၪ့ချိၪဂီၩ့အခၫ ဆုးလ့ၩလီၩ့ဖိၬ ဖူၫထိၭမဲၪဖါအလးခဲၫ့လါနၫ့ အဝ့ၫဖ့ၬထ့ၬထၬ ၥၭကျုၩထံၭလဖၪနီၪ ထၪ့ထဲၩ့ထီၩ့ လ့ၫယူၭအကၠီၩ့ စီၪဝ့ၫလၧ လ့ၩလီၩ့ဝ့ၫဒၪ လခလူၭလၧၩ့ဘၪ နီၪလီၫႉ မွဲဆၧဘဲၫနီၪ ဖိၪလံၩၥံၪနီၪ ဆုးအီၪၥၭမၧၫ့ထးဒၪလၧ အလး အနဲၩ့အဎီၩ့ ထနီၭနီၪလီၫႉ ဆုးလ့ၩဝ့ၫဒၪလၧ အမ့ၬယၫ ဖူၫထိၭမဲၪဖါနီၪ လ့ၩန့ ထိၭမဲၪၥံၪ့ခွံနီၪလီၫႉ

လုၫလါအယီၩနီၪ မွဲနဲၪထၬဝ့ၫဒၪလၧဖျိၩ့ဆၨၩဆၬၥံၪအဂးလီၫ လမွဲဘၪလါနၫ့ ယဆီၪ့မီၪ့ မွဲဘၪဎၭလၧ  ဖျိၩ့ဆၨၩဆၬ အခၪ့ထံၭၥၫ့ နီၪလီၫႉ ထံၫဆ့ၬမ့ၬယွၩ လမွဲဘၪ ဒီၭတၫ မ့ၫဆၫ့ (Mason) ကိၭဝ့ၫ ထံၫဆ့ၭယွၩလၩ့ဝ့ၫဒၪ ၥီၫ့ဘံၩ (River of Running Snad) နီၪ ဘဲၫအဝ့ၫစီၪထၬအၥိၭ Gobi မ့ၬပျၩ့ဖၧၩ့ အဂဲး ကွ့ၭထၬဝ့ၫအၪမၬနီၪလီၫႉ ဒီၭတၫ မ့ၫဆၫ့ အဆၧဒၪနီၪ ဖၫဟံၫယၫ့ ခၪ့ဂၬ မ့ၬပျၩ့ဖၧၩ့နီၪဂီၩ့ လ့ၩယံၫယါဆၧနီၪ အီၪဂဲၫစဲၪ့လၩ့လၧ ဆၧနဲၪဖျီၪ့ထၪ့ဖၧၩ့နီၪလီၫႉ လါနၫ့ ဘံၩယီၩ အမံၩ့လၧ ဖျိၩ့ခီၫနီၪ မွဲထံၫဆ့ၭမ့ၬယွၩ အခီၫပယီၫလီၫ လကၭဘၪဒဲ အခီၫပယီၩအီၪဒံၭဝ့ၫဒၪလၧ မ့ၬယွၩလၩ့ဝ့ၫ ထံၫဘံၩ ဒံၭနီၪလီၫႉ Dr. D. C. Gilmore ဖ့ၪကိၪ့ဖ့ၪတဲၩ့ထၬ ၥၫ့လွ့ၫဘံၩနီၪ မွဲဆၨၩဆၬလုၫလါထူၫရူၪအလိၫလဖၪ မၩလၧၫ့ဎွ့ၩထၪ့ဝ့ၫ ဘံၩကဘံၩလါနၫ့ Dr. Vinton အၡါဖၧၩ့ အၪ့ဎၬနဲၪဖျီၪ့ထၪ့ထၬဝ့ၫ ထိၪမဲၪဖါ အအီၪဖျဲၪအလးလၧ ဖျိၩ့ဖျိၩ့အိၩ ဆၧနဲၪဖျီၪ့ထၪ့အဖၫ့ခိၪ မွဲအခၪ့ထံၭခၪ့ဎၧၩ့နီၪလီၫႉ ဆၧဒိၭနဲၩ့နီၪ လၧၡါအဂူၫဂၩဖၧၩ့ မွဲပလဒၪဘၪဒဲ  အဆိၪထုၬ အဒီၩ့နီၪ အဆံၭအခ့ၭကမံၩ့ ကဲၪၥ့ၪအ့ၬနီၪလီၫႉ မွဲဆၧဘဲၫနီၪ ဆုးလီၩ့ဎွါၥီၫ့ဘံၩအကၠီၩ့ အဂဲးဖျီၪ့ထၪ့ဝ့ၫနီၪလီၫႉ

လၧဆၧလီၩ့ဎွါအၪ့ဎၬအဖၧၩ့ ဖျိၩ့ဆၨၩလဖၪနီၪ မွဲအီၪယံၫယါလၧ ခးတရူၭ လၧဖျိၩ့ဖျိၩ့အိၩ ဆၨၩကဆၨၩတၭ လၧခဲၫ့ ကဆၫ့ဘၪကဆၫ့ ဂဲၫၥုၭအီၪထဲၩ့အၥၭထီၩ့လၧ ခးပယၩ့ဖၧၩ့ယီၩနီၪလီၫႉ