ၥၫ့ခိၪဒိၪBp.John မၩ့ဆံၫ့ဎံၪ မံၫမၪထဲၩ့လၧကဆါဎြံၬထၪ့ဘၭ ၅နံၪ့ ဆၧနၪ့ထၪ့မံဆၩ

ဒိၩ့ပၥံၫ့ကၭၥလံၬဆၧအီၪကီၪ့ ၥၫ့ခိၪဒိၪBp.John မၩ့ဆံၫ့ဎံၪ မံၫမၪထဲၩ့လၧကဆါဎြံၬ ထၪ့ဘၭ၅နံၪ့ ဆၧနၪ့ထၪ့ မံဆၩဆၧလုထၪ့နီၪ ၦၡၩမၩလၩမၩဖၩ့ဝ့ၫလၧ လၩယူၫလဲၫ့ ၂၂ၥၫ့ လဂီၩ၆နၩရံၫအခံၫ့ လၧစံၫ့ပံၫတၧၫကၥံၫဒရဲၫ ၥရိၬဖၧၩ့နီၪလီၫႉ ၦအလ့ၩခိၪလ့ၩနါ မံဆၩဆၧလုထၪ့နီၪ မွဲဝ့ၫဒၪလၧ မီၫလမၠဲၫ့ဆၧအီၪကီၪ့ ၥၫ့ခိၪဒိၪ Maurice ညွန့်ဝေ နီၪလီၫႉ

“အ့ၪမွဲ ပကလီၩ့ဎွါ ယွၩအၥံၫနီၪ မွဲပကဒၪဘၪလၧယွၩအမၧၫ့နီၪအ့ၬႉ ပဒၪလၧဆၧနိၫ့ဆၧနၭအခၫ ယဘၪနိၫ့ဘၪနၭထဲဎွ့ၩယီၩယူၭနီၪ ယွၩဒၪယၧၩအ့ၬဧၪႉ ယွၩနီၪမၥံၫယူၭဧၪႉ ယွၩနီၪမွဲလအီၪဘၪအၡါမၪဧၪႉ ပအၪ့ဎၬဆၧဘယီၩနီၪ မီၪ့ဎီၩ့ ပလီၩ့ဎွါယွၩအၥံၫနီၪလီၫႉ ပအၪ့ဎၬထၪ့ ဆၧဆိၫ့ခွံၬလဖၪနီၪဂီၩ့ ပကဂၪ့ဒၪဘနီၪစွါဘဲၫ ယွၩအီၪလၧပနဲၩနီၪ မွဲပကဒၪအ့ၬႉ ယွၩနီၪ မၩဆၧန့နၧၩ့မံၩ့အ့ၬဧၪ ပအၪ့ဎၬဘၪ ဘယီၩစွါဘဲၫ မီၪ့ဎီၩ့ ပစီၪဘၪယွၩနီၪ ခိၭၦအၥံၫစွၫၥိၭလီၫႉ ယွၩအမၧၫ့နီၪအီၪဒၪလၧပနဲၩထံၭလီၫႉ ၡၩအဆၧစီၪဘၪမၪလဖၪနီၪ ယွၩဖျါခွံၬလီၫႉ ယွၩနၪၥ့ၪလီၫႉ မွဲပကဘၪလီၩ့ဎွါ ယ့ၫဇူၩအၥံၫနီၪအ့ၬ ပကဘၪလီၩ့ဎွါ ယ့ၫဇူၩအမၧၫ့နီၪခီၫႉ ဘဲၫနီၪအၥိၭ ကဆါဎြံၬထဲၩ့ကိၭထဲၩ့ၥၫ့ခိၪဒိၪ ဂျွန်မၩ့ဆံၫ့ဎံၪယီၩအခံၫ့ဒၪအိၩ ဘၪကဲၪထၪ့ဘယီၩနီၪ မွဲၦအနီၪအကၠီၩ့ ၦအယီၩအကၠီၩ့ ခီၫခီၫပကလီၩ့ဎွါ ၦဂူၫဂၩအဆၧမၪနီၪ မွဲပကဘၪလီၩ့ဎွါယွၩနီၪလီၫႉ လၧအခီၩ့အိၩ ပလ့ၩမးၥံၫလၧ ထံၫခိၭဖံးဆၧအီၪကီၪ့အခံၫ့ ၥၫ့ခိၪဒိၪ ဂျွန်မၩ့ဆံၫ့ဎံၪ စံၭယံၫယါဝ့ၫ ဆၧချဲၩ့ကမီၪ့နီၪ ပထိးဆၧၫ့ဆၧကနၧၩ့ ဎွ့ၩပၥ့ၪလဲၪနီၪ လိၪနၭန့ ပမၩဆၧကန့ဎွ့ၩပၥ့ၪလဲၪဒံၭႉ ဆၧကၪဆၧဂဲၩလဖၪနီၪ မီၪ့ဎီၩ့လီၫႉ ၡၩအဆၧၥၭမၧၫ့နီၪ ဆၧၫ့ကထံၪထံၪ ခၪကထံၪထံၪႉ ပဆၧၫ့နၩ့ဂၪ့နးဆ့ ပဆၧၥၭမၧၫ့ယီၩ မွဲကအၪ့လဲၩထၪ့အၥၭအ့ၬႉ လၧပဆၧၥၭမၧၫ့ဖၧၩ့ ဘဲၫဆၧၥၭအုၭအီၪအၥိၭ ဆၧၥၭမုၬမွဲအီၪဝ့ၫဆ့လီၫႉ ဆၧကိၭမံၩ့ဒ့ၭအဖၧၩ့ ယွၩအဆၧကိၪဆၧတဲၩ့ထၬ အီၪဝဲၩလီၫႉ အ့ၪမွဲပကလီၩ့ဎွါယွၩအဆၧကိၪ့ဆၧတဲၩ့လၧ ဆၧကၪဆၧဂဲၩဖၧၩ့စွါဘဲၫ လၧဆၧအစၪအဖၧၩ့ မွဲပဆုးလ့ၩထဲၩ့လၧအမ့ၬယၫ လၧဆၧနံမွံၫဖၧၩ့ ကန့နီၪလီၫႉ ဆၧကဲၪလၫ့ၡူၭဘနီၪအီၪအ့ၬ မွဲယွၩအဆၧကိၪ့ဆၧတဲၩ့အီၪဝ့ၫလီၫႉ အဂဲး ၥၫ့ခိၪဒိၪ မောရစ် လီၩလၩ့လၬလၩ့ဝ့ၫ ဘဲၫနီၪအၥိၭလီၫႉ