ထိၪၡၬလဖၪ ဖံၭၥိၭဘၪမၪလၧ ကျၭလဘံၪ့ – ၂

မုကနံၩ ကျၭကဘံၪ့နီၪ မိကဲၪဘၪအၥၭလၧ ထိၪၡၬနီၪ ဂဲၫမၩလၩ့ဒိၩ့ၥၭႇ မၩလၩ့အဲၪၥၭလၧ အဝ့ၫၥံၪအနဲၩ့ အဎီၩ့လီၫႉ ကျၭယီၩ မွဲမၩထံၩမၩၥိၭဘၪလၧ ထိၪၡၬလဖၪ ကၠၧၫ့ကၠၧၫ့နီၪတၭ အဝ့ၫနီၪ ၥုၪ့မုၬၥၭဎွံၫဝ့ၫအၪမၬဆ့လီၫႉ လၧထိၪၡၬဖၧၩ့ ထိၪၡၬဒိၪကဘံၪ့နီၪ ဒၪဘၪကျၭကဘံၪ့ ဂဲၫမၩလၩ့ဒိၩ့ၥၭ ဂဲၫအီၪလၧ အထံၭၥိၭအကျၩနီၪ အဝ့ၫဆီၪ့မီၪ့ဝ့ၫဒၪ ကနံၩနံၩကကၠၪကၠၪနီၪ ကျၭကဘံၪ့ယီၩ ကဖ့ၪဒၪပၧၩၥ့ၪ ဆၧကၪဆၧဂဲၩ ဆၧနိၪ့ဆၧနၭဒံၭလီၫႉ အကၠီၩ့နီၪတၭ ယကကိၭယထံၭၥိၭဂီၩ့ ယကလီၩဘၪ အဝ့ၫၥံၪ ဆၧချဲၩ့နးဆံၭ လီၫႉ ဆီၪ့မီၪ့ဝ့ၫ ဘနီၪလီၫႉ လယံၬလမီဘၪ ထိၪၡၬဒိၪ ကဘံၪ့နီၪ ကိၭအထံၩၥိၭၥံၪဂီၩ့ မၩဆၧအီၪကီၪ့ဝ့ၫဒၪလီၫႉ

            ထိၪၡၬထီးလူၬ ဂဲၫထီၩ့အခၫ ထိၪၡၬဒိၪနီၪ စံၭဝ့ၫထံၩၥိၭၥံၪဧ့ စၭထၪ့လၧ မုကနံၩယီၩ နၥံၪထီးလူၬ အီၪဘျိၪဘျိၪ နးဂၩလၧၩ့ လဂ့ၩ ကိၩနံၩဒ့ၭ နၥံၪကဘၪအီၪလၧ ဆၧထုၪ့ၥုၪ့ထုၪ့ၥၭလီၫႉ ဆၧယံၩဆၧၡီၩ့လအီၪဘၪ နၥံၪဒဲပၧၩထီးလူၬ ပဂၭဂီၩ့ၥ့ၪႇ ပဘၪထံၭ ဘၪနဲၪ့လိၬၥၭၥ့ၪႇ ပလၩ့ဖၭၥ့ၪလီၫႉ အကၠီၩ့နီၪတၭ နၥံၪထီးလူၬ အီၪလၧဆၧယံၩဆၧၡီၩ့ဖၧၩ့ဂီၩ့ အီၪလၧ ဆၧထုၪ့ၥုၪ့ထုၪ့ၥၭဖၧၩ့ ကိၭဘံၪ့လီၫႉ ထိၬၡၬလဖၪနီၪ ဘဲၫနါဂၧၫ့ ၥ့ၪယၫဘၪနီၪတၭ အဝ့ၫၥံၪနီၪ အီၪလၧ ဆၧယံၩဆၧၡီၩ့ဖၧၩ့ ထီးအလူၬလီၫႉ

            ထိၪၡၬဒိၪကဘံၪ့နီၪ လီၩဘၪ အထံၩၥိၭထိၪၡၬထီးလူၬဂီၩ့ ကိၭၥီၪ့ချဲၩ့ထဲၩ့ ကျၭကဘံၪ့နီၪလီၫႉ အဝ့ၫနီၪ လီၩဘၪဝ့ၫ ကျၭဧ့ႇ နအီၪလၧပၥိၭ ထိၪၡၬလဖၪဖၧၩ့ယီၩ ဂ့ၩဘၪလီၫႉ ဂီၩ နလ့ၩဘၪနးစီၪ့အ့ၬႉ အ့ၪနလ့ၩ လၧအိၩလၧယီၩ ကစီၪ့စီၪ့နီၪ နဘၪလီၩ အ့ၪပၧၩလီၫႉ ပလၥ့ၪယၫဘၪ လ့ၩလၧအိၩလၧယီၩလဂ့ၩလီၫႉ စံၭထၬဝ့ၫဒၪလီၫႉ

အကၠီၩ့နီၪတၭ ကျၭကဘံၪ့နီၪ စံၭထဲၩ့ဝ့ၫဒၪ ထိၪၡၬဒိၪ အတွၭအီၪအ့ၬဘ့ၭ ကဆါဧၪ ယလ့ၩနးစီၪ့အ့ၬႉ ယကအီၪဒၪလၧ နၥံၪဂ့ၩဂ့ၩဘၪဘၪကၠၧၫ့ကၠၧၫ့လီၫႉ အ့ၪယလ့ၩအလး ကစီၪ့စီၪ့နီၪ ယကလီၩဘွ ကဆါထိၪၡၬဒိၪနီၪလီၫႉ ကျၭကဘံၪ့နီၪ မၩလၩ့အဲၪၥၭလၧ ဆၧယၪ့ၥုၪ့ယၪ့ၥၭဖၧၩ့ ဆၧချဲၩ့အဆၧၫ့ အဂ့ၩအဘၪ လၧထိၪၡၬဒိၪအနဲၩ့ထံၭနီၪလီၫႉ ထိၪၡၬလဖၪ အီၪလၧမံၩ့လၬ ဖၧၩ့ယီၩနီၪ မွဲထံၫခးစၩ့ထီၫ့အဝးဖၧၩ့နီၪလီၫႉ

မုကနံၩ ထံၫခးစၩ့ထီၫ့ဖၧၩ့ယီၩ ၦဎွၩအဖိၪခွၫ ဆၧကိၭဝ့ၫအမံၩ့ ၡ့ၫမၡၩဖိၪနီၪ အီၪဝ့ၫကဂၩနီၪလီၫႉ ၡ့ၫမၡၩနီၪ ဖျဲးန့ထၪ့ အချံၪလဒုၩဂီၩ့ လ့ၩလီၩ့ခၭ ဆၧဖိၪဆၧဎါလၧ ၥံၪ့ၡါဝၪနၧၫ့ကျၩနီၪလီၫႉ အဝ့ၫနီၪ အထံၩၥိၭ လပၫဘၪ လ့ၩဒၪဝ့ၫကဂၩနီၪအကၠီၩ့ လ့ၩထီၩ့စိၩလၧ ၥံၪ့ၡါဝၪနၧၫ့ အတိၩ့ဖၧၩ့တၭ ဖၧၩ့ၥၭဘၪမၪ လၩ့မါခွံၬဂီၩ့ ကဲၪထၪ့ ဘဲၫၥိၭ ဆၧဝးဖျိၭနီၪလီၫႉ