ထၧၫ့ဖုဝဲထံၩၥိၭဖျိၩ့ဖိၪၥံၪဧ့ လၩ အီဂုၭ (၁၂) ၥၫ့နီၪ ဘဲၫထၧၫ့ဖုဝဲဖျိၩ့ဖိၪၥံၪၥ့ၪယၫထၬအၥိၭ မွဲၦဖျိၩ့မၫတုရၫမုနံၩတၭ မုနံၩယီၩ မွဲဒံၭလၧ ၦဖျိၩ့မၫတုရၫ စီၩဘၭအူၩကၠံၩဒဲ အၥုၭဖိၪလဖၪ ဘၪထိးမၩၥံၫအၥၭ မုနံၩမွဲမွဲဆ့တၭ ဘဲၫယီၩ ယမိအၪ့နၩ့လီၩ့ဖ့ၪနဲၪဘၪ နၥံၪ အဝ့ၫအဆၧဆူၩနဲၩအဂး ၦလၧဖ့ၪလၫ့လၩ့အၥၭ စီၩဘၭအူၩကၠံၩအဂဲးနီၪလီၫႉ
နံၪ့ ၁၉၅၀ လၩ အီဂုၭ (၁၁) ၥၫ့နီၪ ပဒိၪအၥုၭလဖၪ လ့ၩထီၩ့လၧ နဘူၫတဝၫ့အနဲၩ့အဎီၩ့နီၪဂီၩ့ စီၩဘၭအူၩကၠံၩဒဲ အခရၧၫ့လဖၪ ထီၩ့လၧ ထော့ကော်ကိုး တဝၫ့အကၠီၩ့ အဝ့ၫၥံၪန့ဘၪဆၧပရၧၫ့နီၪလီၫႉ ပဒိၪအၥုၭၥံၪလဖၪ တဲၩ့ဝဲၩ့ထၪ့အၥၭ ကဆုးဂဲၫလၧ ထီကီၫကိၩတဝၫ့နီၪ ဖျိၩ့ခိၪနါလဂၩ ဖ့ၪလၫ့ထဲၩ့ဝ့ၫဒီၭ ဆၧပရၧၫ့ စီၩဘၭအူၩကၠံၩအီၪလၧ ထီကီၫကိၩတဝၫ့နီၪ ကထုၪ့ဒီၭႉ ထီးနီၪ လၩ အီဂုၭ (၁၂) ၥၫ့ လဂီၩ (၅) နၩရံၫအခံၫ့နီၪ ပဒိၪအၥုၭလဖၪ ဂဲၫထီၩ့လၧ ထီကီၫကိၩ နီၪလီၫႉ လၧခဲၫ အဝ့ၫၥံၪနါဂၧၫ့ စီၩဘၭအူၩကၠံၩ အီၪအလးနီၪ ဝၩ့ဖီၩ့ထၬဝ့ၫလါနၫ့ဂ့ၩ ဒၪဝ့ၫအ့ၬႉ လၧခဲၫ ဖိုးတော်အော တဝၫ့ဖိၪလဂၩ စံၭ အီၪလၧယီၩအ့ၬ အဝ့ၫၥံၪအီၪမွဲဒၪ တဝၫ့ကတဝၫ့အခၫ လီၩ့ဎွါကၠၭဝ့ၫအထီ ဒၪဎီၩ့လၧဖျိၩ့ခွၫၡါဂဲၫထဲၩ့ဖီၪ့ထၬထိၪထၩလဂၩ လီၩအ့ၪပဒိၪအၥုၭၥံၪ စီၩဘၭအူၩကၠံၩအီၪအလးတၭ စီၩဘၭအူၩကၠံၩၥံၪ အီၪအလးကၠၩ့နီၪ အဝ့ၫၥံၪဝၩ့ဖီၩ့ထၬထီးအလူၬလီၫႉ
လယံၬလမီဘၪအဖၧၩ့ လၧကၠၩ့ဖၧၩ့နီၪ စီၩဘၭအူၩကၠံၩအၥုၭဖိၪလဂၩ ဂဲၫစဲၪ့လၫ့လၧ ကၠၩ့အချိၫ့နီၪတၭ ပဒိၪအၥုၭလဖၪ ဖီၪ့ထၬချုၭကထံၪလီၫႉ အီၪယံၬကဆိ ပဒိၪအၥုၭကကဲၩ့နီၪ လီၩစိၩစီၩဘၭအူၩကၠံၩ အၪ့မၧၫ့ဝ့ၫခွံၬလၩ့စူၪဝဲၩလီၫႉ ကထုၪ့ဎး စီၩဘၭအူၩကၠံၩ စၭထၪ့ခၬကထံၪလီၫတၭ ပဒိၪအၥုၭၥံၪလဖၪ ကမိဖီၪ့စီၩဘၭအူၩကၠံၩအမၧၫ့လါနၫ့ အၪ့မၧၫ့ဝ့ၫခွံၬလၩ့စူၪဝဲၩလန့ဘၪတၭ ခၬဆၧၫ့ဒုၭ ထၪ့ထဲၩ့ဝ့ၫလီၫႉ
လၧကၠၩ့ဖၧၩ့နီၪ ဆၧအလူၥုၭလၧၩ့အ့ၬအခၫ ပဒိၪအၥုၭလဖၪလ့ၩနုၬလၩ့ယိဝ့ၫအခၫ စီၩဘၭအူၩကၠံၩလဂၩ မံၫလၩ့ချူၭ ထၬလၧ ကၠၩ့ဖၧၩ့နီၪ အၪ့စၪ့ဝ့ၫ နၥံၪနီၪ ခရၧၫ့ခလဲၪအခၫ စံၭဆၧၫ့ထဲၩ့ဝ့ၫ မွဲပဒိၪအၥုၭၥံၪနီၪလီၫႉ စီၩဘၭအူၩကၠံၩ အၪ့ကံၩ့အီၩ့ထံၫ လါနၫ့ မွဲအဝ့ၫၥံၪလ ဒုၭအီၩဘၪလီၫစွါဘဲၫႉ လၧခဲၫ လယံၬလမီအထီ ၇နၫရံၩ ခီၫအခံၫ့နီၪ စီၩဘၭအူၩကၠံၩလဂၩ ဘၪဖ့ၪလၫ့လၩ့ခွံၬအၥၭ ထၧၫ့ဖျိၪ့ယၫလီၫႉ ဆၧအလးနီၪ ယဲၩ့လၧ ကီၭကရံၭ ၂၅ မဲၫ့ဂီၩ့ ဘၪထၬ ထံၫချိၬအကၠီၩ့တၭ ဘၪလ့ၩထဲၩ့ကၪအကၠီၩ့ စီၩဘၭအူၩကၠံၩ အစွၪနီၪ ဂဲၫထဲၩ့န့ဝ့ၫလၧ မီၫလမၠဲၫ့ထံၫၥုၭအလးဂီၩ့ အီၪထးၥုၭဖိၪၥံၪလဖၪနီၪ ဎုလၫ့ထးဝ့ၫလၧ တဝၫ့နီၪလီၫႉ