အဲၪကွံၩဘၪၦခိၭနၪဆၧဖိၪၥံၪဧ့ႇမုကနံၩယီၩလၧဆၧထံၫလၩ့ဒီၪလၩ့ယီၩအဖၧၩ့ ယအဲၪဒိၭ လီၩ့ဖ့ၪနဲၪအ့ၪနၥံၪ ဆၧအဂဲးလၧအကၧၩ့ဒိၪထုၬနီၪ မွဲဝ့ၫဒၪ မန့လဲၪစွါဘဲၫ ၦၡၩကိၭဂၩဒ့ၭ အ့ၪမွဲ အခံၪ့ဘၪနီၪ ၥုၪ့ထၪ့ဝ့ၫဒၪဂံၪ့ဒီၪ့ဂီၩ့ ကဲၪထၪ့ဝ့ၫဒၪ မိဖါတၭ ပၥုၪ့ထၪ့ပဂံၪ့ဒီၪ့အခၫ ဘဲၫၥိၭဆၧဘၪမၪလအီၪဘၪအဂးလချုၭပလၥုၪ့ထၪ့ဒံၭဘၪဂံၪ့ဒီၪ့အထီ ပကဘၪထိၪတွၩ့ အၪ့ဎါဝ့ၫဒၪ ဂ့ၩဂ့ၩဘၪဘၪႇ ပကဘၪအီၪလၧဆၧထၧၫ့ၥုၪ့ထၧၫ့ၥၭကိၭမံၩ့ဒ့ၭအဖၧၩ့နီၪလီၫႉ ၦခိၭနၪဆၧဖိၪၦလၧအကဲၪဝ့ၫဒၪၦမုၪဖိၪႇၦခွၫဖိၪၥံၪဧ့ႇ လချုၭပလဒၩ့ဂံၪ့ဒၩ့ဎၪ့ဒံၭဘၪအထီ ကဂၩဒဲကဂၩပကဘၪထိၪတွၭအၪ့ဎၬလိၬၥၭလါခီၫလါဘၩဂီၩ့ ကြၨၭပထၪ့ၡါလၧအဝ့ၫမၬ ပကဘၪထၪ့ၡါဝ့ၫဒၪနီၪလီၫႉ ပအဲၪလိၬၥၭခီၫယံၬဒ့ၭအ့ၬႉ ကဂၩဒဲကဂၩပၥ့ၪယၫလိၬၥၭ အဂဲးထံၪထံၪဆၭဆၭအ့ၬဂီၩ့ပကအၪ့န့လိၬၥၭစွါဘဲၫပဂံၪ့ဒီၪ့ယီၩ ကဂၩဒဲကဂၩပဆၧနၪၥ့ၪ အ့ၪလိၬၥၭကၡၩဝ့ၫဒၪဒဲဂံၪ့ဒီၪ့အဆၧကၪဆၧဂဲၩလဖၪကဲၪထၪ့ၥ့ၪဝ့ၫဒၪနီၪလီၫႉ ၦခိၭနၩ ဆၧဖိၪၥံၪဧ့ႇၦၡၩကနၩ့နၩ့စံၭဝ့ၫလၧဖျိၩ့ဖျိၩ့အိၩၦမွံၩၦၡါလဖၪနီၪ ဖိၪခီၫဖိၪဒၪယူၩယါလိၬၥၭ နးကၠၪအ့ၬႉအဝ့ၫၥံၪမိဖါနံၫကဲၩ့ဘၪန့အၥၭဂီၩ့ဘၪထၪ့ၡါမွဲအီၪဝ့ၫဒၪဆ့ တၭအဝ့ၫၥံၪယီၩ ဘၪနီၪလၧ ဆၧနၪၥ့ၪအ့ၪလိၬၥၭအီၪဝ့ၫ လၧၫ့လၧၫ့ဎွ့ၩဎွ့ၩဂီၩ့အဂံၪ့ဒီၪ့ဘၪဂုးခၧၫ့ဝ့ၫဒၪနီၪလဲၪၩ့ ဆၧအၪ့စၪ့ကအီၪဝ့ၫဒၪဘဲၫယီၩအၥိၭနီၪလီၫႉ ဆၧစံၭဆၧၫ့အီၪဝ့ၫပၥ့ၪလဲၪစွါဘဲၫ အထီ လခီၩအိၩဒဲအထီဘဲၫယီၩၦၡၩလဖၪအဆၧအီၪက့ၪၥုၪ့ႇအီၪက့ၪၥၭ အဆၧအၪ့ဎၬထိၪတွၭလဖၪ မီၪ့ဎီၩ့လိၬၥၭလၧၩ့အ့ၬဘီၩႉ