ထိၪၡၬလဖၪ ဖံၭၥိၭဘၪမၪလၧ ကျၭလဘံၪ့ – ၁

ပဂဲကဲၪထၪ့ၦၡၩဂီၩ့  ပအီၪလၧ ဂၪ့ခိၪချိၫ့ယီၩ ပဂၭဎ့ၭလန့ဘၪ အီၪဝ့ၫ ဆၧဖံၭဆၧမၩအၪမၬလီၫႉ ပအီၪလၧ ဂၪ့ခိၪချိၫ့ယီၩ ဆၧမုၬဆၧလၩ ဆၧၡူၪဆၧမုၬ ကကဲၪထၪ့အဂး ကအီၪဝ့ၫ ဆၧကျ့ၭစၨၭအၪမၬလီၫႉ ၦၡၩကိၭဂၩ ဆၨၩကိၭဆၨၩနီၪ ကမိအီၪ ဂ့ၩအီၪဘၪလၧ ဆၧလးဆၧကျဲၩႇ ကမိအၪ့ဘၪ ဆၧအၪ့ဆၧအီၩ အအွံၪအဆၧၫ့ႇ ကမိၥိၭကီၩ့ ဆၧကီၩ့ဆၧၥိၭ အဂ့ၩအဘၪ အမံၩ့မံၩ့ လီၫႉ လါနၫ့ဂ့ၩ ကနၩ့နၩ့ ကယဲပစီၪနီၪ လကဲၪထၪ့ဘၪ အီၪဝ့ၫအၪမၬလီၫႉ ကနၩ့နၩ့ ဂၪ့ခိၪယီၩ ဆၨၩဆၬၥံၪနီၪ ကမိအီၪ ဝ့ၫလၧ ဆၧၡူၪဆၧမုၬ ချံၪ့ချံၪ့ၡူၪၡူၪဖၧၩ့ လါနၫ့ဂ့ၩ အီၪဝ့ၫလန့ဘၪလီၫႉ ဆၨၩကနၩ့နၩ့ အီၪလၧအဝံးဒီၪ့ အဆၨၩခးဒီၪ့ဖၧၩ့ လါနၫ့ ဆၨၩအဂူၫဂၩ ဂဲၫမၩနၧၩ့မၩစၪ ဂဲၫဖ့ၪဝ့ၫၥ့ၪ ဆၧၡၪ့ဆၧနၭႇ ဆၧကၪဆၧဂဲၩလဖၪနီၪလီၫႉ

            နၥံၪဒဲပၧၩနီၪ မွဲၦဖျိၩ့ဆၧၩအကၠီၩ့နီၪတၭ ပဆၨၩဆၬထီးလူၬ ဘၪထူဖျိၪ့ၥၭႇ ဘၪစူၭကီၪ့ၥၭႇ ဘၪအီၪလၧ ဆၧယံၩဆၧၡီၩ့ ဖၧၩ့ ကၠၧၫ့ကၠၧၫ့ကိၭဂၩလီၫႉ အ့ၪပအီၪကကၠၧၫ့ကၠၧၫ့လၧ ဆၧယံၩဆၧၡီၩ့ဖၧၩ့နီၪ ဒုၪဒၩလဖၪ ဂဲၫမၩနၧၩ့မၩစၪပၧၩ လန့ဘၪယီၫယီၫလီၫႉ ဆၧယံၩဆၧၡီၩ့ လအီၪဘၪ ပလၩ့ကွဲၪ ဘဲၫဝၪထူလဖၪအၥိၭ ဆၨၩအဂူၫဂၩ (ဒုၪဒၩလဖၪ) ဂဲၫမၩနၧၩ့မၩစၪပၧၩၥ့ၪလီၫႉ အကၠီၩ့နီၪတၭ ဆၧယံၩဆၧၡီၩ့ယီၩ ကဘၪအီၪဝ့ၫ အၪမၬလီၫႉ

            ပဆၨၩကထၪ့ထီၫအဂး လၧယၫခီၫ နၥံၪဒဲပၧၩယီၩ ဘၪကျၭစၨၭ ဘၪဆဲၫ့လၧဆၨၩခံးဂးႇ ထံၫဂဲးခးဂဲးဂးႇ ၡၩခံးဂး လဖၪနီၪလီၫႉ အ့ၪပကျ့ၭစၨၭ ဆၨၩဆၬအဆၧဖံၭဆၧမၩနီၪ ကဂၩဒဲကဂၩ ကခရၧၫ့ဒဲ ကခရၧၫ့ ကဘၪအီၪဝ့ၫ လၧဆၧၥ့ၪယၫနၪၥ့ၪ ဆၧယံၩဆၧၡီၩ့ဖၧၩ့ ကိၭဂၩလီၫႉ ဘိၩ့ယီၩ ပဒၪဘၪ ၦဖျိၩ့ဆၨၩခရၧၫ့ၥံၪနီၪ ကဲၪထၪ့ထ့ဖၭယူၭ အကဲၩ့အခီၫအၪမၬလီၫႉ အကၠီၩ့နီၪတၭ ဆၧယံၩဆၧၡီၩ့ လအီၪဘၪဝ့ၫဒၪလီၫႉ ပဒၪဘၪနီၪ ၥၭလမုၬဘၪဒိၪဒိၪလီၫႉ

            ၦဖျိၩ့ဆၨၩယီၩ အီၪဝ့ၫဎံၩ့လၩ့ လၧခးပယၩ့ဖၧၩ့ အလးကိၭစီၪ့ အကၠီၩ့နီၪတၭ ဆၨၩအဂူၫဂၩနီၪ မၩထ့ဖၭပၧၩန့ယီၫယီၫႇ မၩဂၭဂီၩ့ပၧၩ န့ၥ့ၪဝ့ၫနီၪ ပဘၪပၭထံၭပၭယၬၥၭ ကိၭဂၩလီၫႉ အဝ့ၫၥံၪနီၪ မၩထ့ဖၭပၧၩ ၥ့ၪလၧဆၧဘိၪ့ဆၧဘၩဒဲ ဆၨၩဆၬခံးဂး လဖၪလီၫႉ ကယဲပမၩ ဆၧဖံၭဆၧမၩကမံၩ့မံၩ့ ပၭထံၭပၭယၬၥၭ လအီၪဘၪနီၪ ပထၪ့ထီၫလန့ဘၪလီၫႉ ဆၨၩဆၬအဂး ၦလၧဖီၪ့စူၪ(စူၪဝဲၩ) ၥံၪနီၪ ဘၪပၭထံၭပၭယၬၥၭ ကဘၪအၪန့ ၦၡၩအဂူၫဂၩလဖၪလီၫႉ လၧပစူၪဖီၪ့ဖၧၩ့ ၦဖျိၩ့လဖၪနီၪ ဒဲၩခီၫဒဲၩ ပနဲၩလိၬၥၭန့ လါနၫ့ဂ့ၩ အ့ၪဆၨၩဆၬအဂူၫဂၩ ဂဲၫနုၬလၩ့စဲၪထၪ့လၧ ပနဲၩ့ပဎီၩ့နီၪ ပနဲၩလန့ဘၪ ယီၫယီၫလီၫႉ အကၠီၩ့နီၪတၭ ယမိ လီၩ ဘၪ နၥံၪၡါဖိၪကယွ့ယီၩနးဆံၭလီၫႉ

            လၧကကၠၪအိၩ ထိၪၡၬၥံၪနီၪ အီၪဝ့ၫလၧ ၥံၪ့ၡါဝၪနၧၫ့ကျၩလီၫႉ ထိၪၡၬၥံၪနီၪ အီၪဝ့ၫဒၪလၧ အၥိၭၥံၪနီၪ မုၬမုၬလၩလၩ ၥုၪ့ဎွံၫၥၭယီၫဝ့ၫ ကိၭဘံၪ့လီၫႉ အဝ့ၫၥံၪနီၪ ကဘံၪ့ဒဲကဘံၪ့ ဖ့ၪဂဲးဖ့ၪဘၭလိၬၥၭႇ မၩနၧၩ့မၩစၪလိၭၥၭအီၪအ့ၬႇ စီၪနါလိၬၥၭအဆၧချဲၩ့ ႇ အဲၪလိၬၥၭအၪမၬဆ့ဂီၩ့ အီၪဝ့ၫဒၪလၧ ဆၧယံၩဆၧၡီၩ့ဖၧၩ့ ကိၭဘံၪ့နီၪလီၫႉ