မုကိၭနံၩဆၧၥၭထိၬပရၧၫ့ (စမၫကၨၭ (၁၀:၃၂-၄၅)

ယ့ၫၡုၬလီၩဖျီၪထၪ့ဆၧၥၧၫ့ဖၧၫ့လဖၧၫ့ ဘၪဆဲၫ့အဆၧၥံၫအဂဲး.

အဝ့ၫၥံၪအီၪဝ့ၫလၧဖၧၩ့ၥၭ ထီးအလ့ၩထၪ့ဝ့ၫလၧ ယရုစလံၫ့နီၪ, ယ့ၫၡုၬလ့ၩလၧယၫတၭ, အထံၩအဖျဲၥံၪ ထီၫမံၫထီၫမၪတၭ, ဖိၬဝ့ၫအခဲၫ့အဘိၩ့ဘၭနီၪ, ၥၭမဲၪၥၭဖျဲၩ့ဝ့ၫဒၪလီၫ. အဝ့ၫဒၪကိၭန့ဒီၭ ၦလဆံၫနံၫဂၩ လီၩဘၪဆိၫအဝ့ၫၥံၪလၧ ဆၧမိမၩအၥၭလၧအလီၩ့အဂဲးလီၫ. အဂဲးဘဲၫယီၩ, ယိခွါ, ပလ့ၩထၪ့လၧယရုစလံၫ့တၭ, ၦၡၩအဖိၪခွၫဘၪဆၧဖ့ၪလၫ့ခွံၬဝ့ၫ လၧၦလုဆၧအဒိၪၥံၪ, ဒဲၦကွ့ၭလံၬၥံၪအစူၪဖၧၩ့တၭ, အဝ့ၫၥံၪမိစ့ၩရၫ့ၥံၫအဝ့ၫဒၪနီၪ, မိဖ့ၪလၫ့ဝ့ၫလၧၦဆၨၩလဖၪအစူၪဖၧၩ့လီၫ. အဝ့ၫၥံၪမိဒုၪဒွ့ၪဝ့ၫမိဒိၪဝ့ၫထးဝ့ၫ, မိထိၪဖျံၭဝ့ၫတၭ, မိမၩၥံၫအဝ့ၫဒၪလီၫ.ထီးအဘၪၥၧၫ့နံၩလနံၩနီၪ, မိဂဲထုၪ့ထဲၩ့ဝ့ၫဒၪလီၫ.

စယ့မံၭဒဲစယီဟၫ့အဆၧအၪ့ကံၩ့အၪ့ယၫ.
စဇ့ၭဘဒံၫအဖိၪခွၫစယ့မံၭ, ဒဲစယီဟၫ့ဂဲၫလၧအအီၪတၭ, စံၭဝ့ၫဒၪ, ဆရၫဧ့, ထီးဒၪပအၪ့ကံၩ့အၪ့ယၫဆၧနီၪ, ဘၪပၥၭလၧနမိမၩလၧပဂးလီၫ. အဝ့ၫဒၪစံၭအဝ့ၫၥံၪ, မွဲအဘၪနၥံၪအၥၭလၧယမိမၩ ဆၧနီၫလၫလၧနၥံၪအဂးလမံၩ့လဲၪ. အဝ့ၫၥံၪစံၭအဝ့ၫဒၪ, ဖ့ၪလၫ့ပၧၩလၧ ပမိဆၧၫ့နၩ့လၧနစူၪထွ့ၪနးဂၩ, ဒဲလၧနစူၪစ့ၪနးဂၩလၧနလၩနဖၩ့အကျၩဘီၪ. ယ့ၫၡုၬစံၭအဝ့ၫၥံၪ, မွဲနၥံၪအၪ့ကံၩ့ဆၧနီၫလဲၪနီၫလဲၪနီၪး နၥံၪၥ့ၪယၫအ့ၬ.လိၫ့လၧယအီၩနီၪ မွဲနၥံၪအီၩမိကဲၪဧၪ. ဘၭတံၫဇၫ့ဆၧလၧယထိးဘၭတံၫဇၫ့ယၥၭနီၪ, မွဲနၥံၪထိးဘၭတံၫဇၫ့မိကဲၪဧၪ. အဝ့ၫၥံၪစံၭဆၧၫ့ဝ့ၫ, ကဲၪဝ့ၫတကၨ.ယ့ၫၡုၫစံၭအဝ့ၫၥံၪ, မွဲမၬ, လိၫ့လၧယအီၩနီၪ, နၥံၪမိအီၩတၭ, ဆၧဘၭတံၫဇၫ့လၧယထိးဘၭတံၫဇၫ့နီၪ, နၥံၪမိထိးဘၭတံၫဇၫ့ဆ့လီၫ. မွဲလါနၫ့ဘိၩဆၧ ဆၧၫ့နၩ့လၧယစူၪထွ့ၪဒဲလၧယစူၪစ့ၪနီၪ, မွဲယဆၧဘဲၫ ယမိဖ့ၪလၫ့ဝ့ၫအၥိၭ န့ၫလၧၦလၧဆၧတဲၩ့ဝဲၩ အၥၭ လၧအဂးလဖၪနီၪyလီၫ.
ထီးၦဆံၫဂၩနါဂၧၫ့ဝ့ၫတၭ, အၥၭထၪ့စယ့မံၭဒဲစယီဟၫ့လီၫ. ယ့ၫၡုၬကိၭန့အဝ့ၫၥံၪလၧအအီၪတၭ, စံၭဝ့ၫ, နၥံၪၥ့ၪယၫလၧၦလၧအပၧၩ့ဘၪ ၦဆၨၩလဖၪနီၪ, ကဲၪထၪ့ဝ့ၫလၧအကဆါလီၫ. အၦဒိၪၦၡါနီၪ စ့ၩရၫ့ထဲၩ့ဝ့ၫဒၪလီၫ. မွဲလါနၫ့ဘိၩ, လၧနၥံၪအကျၩနီၪ ဆၧမၩဘၪအၥၭဘဲၫနီၪအ့ၬ. အ့ၪမွဲထီးဒၪၦလၧအ မိကဲၪဘၪအၥၭလၧ အဒိၪလဂၩဂၩလၧနၥံၪအကျၩနီၪ, မွဲအကဲၪဒၪဝ့ၫလၧနၥံၪအခ့ၫအၡၩဆံၭ. ထီးဒၪၦလၧအမိကဲၪဘၪအၥၭလၧ အခိၪလၧနၥံၪအကျၩလဂၩဂၩနီၪ, မွဲအကဲၪဒၪဝ့ၫလၧၦထီးအလူၬအခ့ၫအၡၩဆံၭ. အဂဲးဘဲၫယီၩ ဆၧလၧၦၡၩအဖိၪခွၫယီၩ, ဂဲၫအၪ့မၧၫ့ၦၡၩအ့ၬ. မွဲအဂဲၫဒိၭန့ဆၧအၪ့မၧၫ့ဝ့ၫဒၪ, ဒဲဖ့ၪလၫ့အၥၭလၧၦၡၩအၪဂၩအဎွ့ၩလီၫ.