ဘိၪ့လ့ၩဖၭဆၧၫ့ထီ မုအီၪပွံၩနံၩ ၃နွ့ၫလနွ့ၫ

ဆၧလ့ၩလၧတဝၫ့အ့ၫမ့အၧၭ. (စလုကၭ(၂၄:၁၃-၃၅) ယိခွါ, လၧအဝ့ၫၥံၪအကျၩ ၦနံၫဂၩ လ့ၩဆၧလၧမုလနံၩဎးနီၪ လၧတဝၫ့လဖျိၪ့အမံၩ့ မွဲအ့ၫမ့အၧၭယဲၩ့လၧ ယရုစလံၫ့စတ့ဒအၧၫ့ဎူၫဆံၫလီၫ. အဝ့ၫၥံၪချဲၩ့ဒုၪ့လိၬအၥၭလၧ ဆၧမၩအၥၭနီၪ အဂဲးအကၠီၪ့ထီးအလူၬလီၫ.  ဆၧမၩအၥၭ ထီးအချဲၩ့လိၬအၥၭ ဒဲအၪ့စၪ့လိၬအၥၭ အဘိၩ့ဘၭနီၪ, ယ့ၫၡုၬၥုၭဘူၭထၪ့အၥၭတၭ, လ့ၩဆၧလၧအဝ့ၫၥံၪအၥိၭလီၫ. ဆၧမၩကဒၩအမ့ၬ ဘဲၫၥိၭအထီးၥ့ၪယၫအဝ့ၫလဂ့ၩလီၫ. အဝ့ၫဒၪစံၭအဝ့ၫၥံၪ, နၥံၪလ့ၩဆၧအဘိၩ့ဘၭတၭ, နၥံၪချဲၩ့လိၬနၥံၪအၥၭယီၩ, မွဲဆၧချဲၩ့ဘဲၫၥ့ၪလဲၪ. တၭနၥံၪအမ့ၬလၩ့ၡါမွဲဘၪလဲၪ.- အလဂၩအမံၩ့စကျံအိၫဖၭနီၪ ချဲၩ့ဆၧၫ့ဆၧတၭ, စံၭအဝ့ၫနီၪ, နဝ့ၫဒၪယီၩ, နမွဲန့ၫ ၦမွံၩလၧယရုစလံၫ့အဖၧၩ့တၭ, ဆၧမၩအၥၭလၧမုနံၩလဖၪယီၩမွဲနၥ့ၪယၫအ့ၬဧၪ.- အဝ့ၫဒၪလဂၩစံၭအဝ့ၫၥံၪ, မွဲဆၧနီၪလဖၪလဲၪ. အဝ့ၫၥံၪစံၭဆၧၫ့ဝ့ၫ, မွဲၦနၭဇရ့ၭဖိၪ ယ့ၫၡုၬအဂဲးအကၠီၪ့လီၫ. အဝ့ၫနီၪ, မွဲမီၪလဂၩ အီၪလၧအစီၩ့အမၩ့လၧ အလူဒဲအဆၧမၩ လၧယွၩအမ့ၬယၫ, ဒဲလၧၦၡၩထီးအလူၬအမ့ၬယၫလီၫ.- ဘဲၫၥိၭ အမိထိးဆၧစ့ၩရၫ့ထီးအၥံၫတၭ, ၦလုဆၧအခိၪ, ဒဲၦဒိၪၦၡါလဖၪနီၪ ဖ့ၪလၫ့ၥံၫခွံၬဝ့ၫ, ဒဲဖျၩထၪ့အဝ့ၫလၧထုၪ့စူၪယၫအလီၩ့လီၫ.- အ့ၪမွဲပယိလါလၧအဝ့ၫနီၪ မွဲဝ့ၫၦလၧအမိထိးထဲၩ့တၩ့ထဲၩ့ ၦအံၫစရ့လၭဖိၪၥံၪလီၫ. တၭလၧဆၧနီၪလဖၪ ထီးအလူၬအမ့ၬယၫ, လၧဆၧမၩအၥၭဘဲၫနီၪလဖၪအလးခဲၫ့, အယီၩလနံၩ မွဲမုၥၧၫ့နံၩလနံၩလီၫ. တၭၦမုၪလၧပကျၩလနၩ့နၩ့လ့ၩလၧဆၧၥွၪခိၪအအီၪဂီၩဂီၩလ့ၬနီၪ, လဒၪဘၪအစွၪတၭ, ဂဲၫထဲၩ့လီၩဘၪဝ့ၫလၧ အဒၪဘၪဆၧလမံၩ့အၥီၫ့ၥံၪလၧအစံၭ, အဝ့ၫလဂၩမၧၫ့ထၪ့ထဲၩ့ဝ့ၫတၭ, မၩထီၫမံၫထီၫမၪပၥၭလီၫ.- ၦလၧပကျၩလနၩ့နၩ့ လ့ၩလၧဆၧၥွၪခိၪတၭ, ဒၪဘၪဆၧဘဲၫ ၦမုၪစံၭဝ့ၫအၥိၭ လါနၫ့ဘိၩ ဒၪဘၪအဝ့ၫနီၪလဂၩဆ့အ့ၬ. ထီးနီၪလဖၧၫ့အဝ့ၫဒၪစံၭအဝ့ၫၥံၪ, ၦလၧအၥၭလဖၭဘၪ, ဒဲၦလၧအလနဲၩဘၪမီၪအလူၥံၪဧ့, ဎရံၬ ဘၪထိးဆၧဘဲၫနီၪတၭ, လ့ၩနုၬထၪ့န့ဘၪအလၩအဖၩ့နီၪမွဲအ့ၬဧၪ.- တၭအဝ့ၫဒၪလီၩဆိၫဝ့ၫလၧစမိစ့ၭ ဒဲ မီၪလဖၪထီးအလူၬနီၪ, ဒုၭနဲၪမၩဖျီၪထၪ့ဆၧ ဘၪဆဲၫ့လၧအနၫ့ဆါဒၪဝ့ၫ အဂဲးဘဲၫအအီၪလၧဆၧကွ့ၭအၥၭထီးအလူၬအဖၧၩ့လီၫ.- အဝ့ၫၥံၪလ့ၩဘူၭထၪ့ လၧတဝၫ့လၧအမိလ့ၩဝ့ၫနီၪ, အဝ့ၫဒၪ မၩအၥၭလၩ့ဂၬလၧ အမိလ့ၩဒံၭလၧယၫလခီၫလီၫ.- အဝ့ၫၥံၪအၪ့ကံၩ့အၪ့ယၫဝ့ၫဆီၪ့ဆီၪ့လ့ၬ, စံၭဝ့ၫ, အီၪလၧပၥိၭဘီၪ. အဂဲးဘဲၫယီၩ မုဂၪလၩ့တၭ, မုဘၪယူၭတၭ အဝ့ၫဒၪလ့ၩနုၬအီၪလၧအၥိၭလီၫ. ဆၧမၩအၥၭလၧအဆၧၫ့နၩ့ဒံၩ့ခံၫ့ လၧစပွဲထံၭလၧ အဝ့ၫၥံၪအၥိၭတၭ, အဝ့ၫဒၪမၩန့ကိၪ, ဆိၪဂ့ၩကံၪ့ ဘျ့ၭဝ့ၫတၭ, ဖ့ၪလၫ့အဝ့ၫၥံၪလီၫ.- အဝ့ၫၥံၪအမ့ၬၥၪ ဝဲထၪ့အၥၭတၭ, ၥ့ၪယၫဝ့ၫလီၫ.အဝ့ၫဒၪမၩလၩ့မါခွံၬအၥၭ လၧအဝ့ၫၥံၪအမ့ၬယၫလီၫ.- အဝ့ၫၥံၪချဲၩ့လိၬအၥၭတၭ, စံၭဝ့ၫ, လၧအဝ့ၫနီၪချဲၩ့လိၬအၥၭလၧပၧၩ လၧဖၧၩ့ၥၭနီၪ, ဒုၭနဲၪဆၧကွ့ၭအၥၭအဂဲးအကၠီၪ့တၭ, ပၥၭလၧပဂူၭဖိၫ့ဖၧၩ့ မွဲအခဲၩထၪ့အ့ၬဧၪ. အဝ့ၫၥံၪဂဲထုၪ့လၧနၩရံၩထီးနီၪ, ထဲၩ့ထဲၩ့ဝ့ၫလၧ ယရုစလံၫ့တၭ, ဒၪဘၪဝ့ၫလၧၦဆံၫလဂၩ, ဒဲၦအီၪလၧအၥိၭအီၪကိၩ့အီၪကီၪ့, စံၭဝ့ၫ, ကဆါနီၪဂဲထုၪ့ထဲၩ့တၡါတၭ,ဒုၭနဲၪယူၭအၥၭလၧစစဲမၧၫ့ယူၭ.- တၭအဝ့ၫၥံၪလီၩလၩ့လၬလၩ့ ဆၧမၩအၥၭလၧဖၧၩ့ၥၭနီၪ, ဒဲအဝ့ၫဒၪဒုၭၥ့ၪယၫအၥၭလၧ အဝ့ၫၥံၪ, ဘဲၫၥ့ၪလဲၪဘဲၫၥ့ၪလဲၪလၧဆၧကံၪ့ဘျ့ၭကိၪနီၪလီၫ.