ဖျိၩ့ဆၨၩလဖၪအဆၧအီၪပြံၩပြၩ (၂)

ခိၪလၩဘွၩၥံၪ ဂဲၫနုၬလၩ့အထီ ထံၫထၪကျိၩ့လးကျဲၩ့နီၪ ဂဲၫကဲၪထၪ့ ၦၡၩၥံၪဂဲၫၥုၭအီၪထၪ့အၥၭအၪမၬဒဲ ဆၧၥုၪ့ဘုၪဒဲ ဘုၪစဲၪ့ထၪ့ဝ့ၫဒၪအအၪထုၬလးကျဲၩ့ကလးနီၪလီၫႉ မွဲဆၧဘဲၫနီၪ နံၪ့ ၁၉၂၀နီၪ ပထံၫထၪကျိၩ့လးကျဲၩ့ယီၩ ဂဲၫကဲၪထၪ့ ဂၪ့ခိၪ ဆၧၥိၪ့ထၪ့ဘုၪအအၪထုၬ (ကမ္ဘာ့ဆန်အများဆုံးတင်ပို့တဲ့) လးကျဲၩ့ကလးနီၪလီၫႉ ဘဲၫကဂဲၫကဲၪထၪ့ ခီၫ့ၡၩအနိၪ့ ဘဲၫယီၩၥိၭနီၪ ခိၪလၩဘွၩၥံၪမၩထၪ့အၥိၭ ပကယိလၧ ဆၧလ့ၩထၪ့လ့ၩထီၫ့အနိၪ့နီၪ အၪ့လဲၩ့ထၪ့အၥၭလါနၫ့ဂ့ၩ ဆၨၩဆၬၥံၪလၧ အအီၪထၬဝဲၩလၧ လးကျဲၩ့ယီၩ လဖၪအဂး ဆၧဘၪထံၭဆၫအီၪအၪမၬနီၪ ပကဒၪဘၪနီၪလီၫႉ

            ခီၫလၧ ခိၪလၩဘွၩအၪ့န့ထၪ့ ခးပယၩ့လၬကကဲၩ့ခီၫဂီၩ့အခၫနီၪ ဆၧထူၭထၪ့ၥုၪ့ဘုၪအနိၪ့အဂး ဖီၪ့ထၪ့ဖံၭထၪ့ဝ့ၫဂ့ၩဂ့ၩဘၪဘၪ ဒဲ ဂၪ့ခိၪခီၫ့ၡၩအဆၧဂဲၩဝၬနီၪ လုၭဘံၭဝ့ၫကန့အဂး မၩထၪ့ဝ့ၫနီၪလီၫႉ ၦဖျိၩ့ဆၨၩဖိၪၥံၪ အီၪအၪဝ့ၫဒၪအလး ၡၩခမျၧးအီၪၡၩဝ့ၫဒၪ ထံၫထၪကျိၩ့လးကျဲၩ့နီၪ အၪ့လဲၩ့ထၪ့ထဲၩ့ဝ့ၫဒၪလၧ ဂၪ့ခိၪဆၧထူၭထၪ့ဘုၪလးကျဲၩ့နီၪလီၫႉ နံၪ့ ၁၈၅၂ အထီ ကဲၪထၪ့ဝ့ၫဒၪ ဒိၩ့ဂိၩ – ခိၪလၩဘွၩ ဆၧဒုၭၥုၭဖၭဒိၪ နံၫဘျၩ့လဘျၩ့ဂီၩ့အထီနီၪ ဆၧမၩၥံၪလဖၪယီၩ စၭထၪ့ လ့ၩထၪ့လ့ၩထီၫယူၭနီၪလီၫႉ

            နံၪ့ ၁၈၆၉ နီၪ ဝဲထၪ့ စူးအက်ခုၪ့ချိၬအခၫ မၩလဲးထၪ့ ဖနံၬထးကၩအနိၪ့ ထီၩ့လၧ ခးအုရီၩပၭနီၪလီၫႉ ထီးနီၪ အ့ၫယၫဝတံၫ ထံၫထၪကျိၩ့လးကျဲၩ့နီၪ ဂဲၫကဲၪထၪ့ ဘၪထွ့ၫလၧဂၪ့ခိၪ ဆၧၥုၪ့ဆၧဖျါဆၧ ဆၧမၩအဎိၩထုၬလးကျဲၩ့ကလးနီၪလီၫႉ ဆၧဒုၭၥုၭဖၭဒိၪကဲၪထၪ့ နံၫဘျၩ့လဘျၩ့ ထီးလဂီၩ့ဒံၭဘၪအထီ ခးပယၩ့နီၪ ဂဲၫကဲၪထၪ့ ဂၪ့ခိၪယီၩ ဆၧၥိၪ့ထၪ့ဘုၪန့အအၪထုၬ ထံၫခးကခးဂီၩ့ ကနံၪ့အဖၧၩ့ ၥိၪ့ထၪ့ဘုၪန့ ၃ႉ၁၂၃ ခွးနီၪလီၫႉ အ့ၫယၫဝတံၫ ထံၫထၪကျိၩ့လးကျဲၩ့ယီၩ ဂဲၫကဲၪထၪ့ ဂၪ့ခိၪယီၩ အဎိၩထုၬ ဆၧၥုၪ့ဆၧဖျါ လးကျဲၩ့ဂီၩ့ ခီၫလၧအထီနီၪ ထီးထီၩ့ဂၪ့ခိၪဖနံၬထးကၩ ကနုၬဖျီၪ့ဝ့ၫန့အဂး ခိၪလၩဘွၩၥံၪ မၩထၪ့န့နီၪလီၫႉ

            ခိၪလၩဘွၩၥံၪလဖၪ ဂဲၫမၩလဲးထၪ့ ခီၫ့ၡၩအနိၪ့ ဆၧလ့ၩထၪ့ထီၪ့အီၪလါနၫ့ဂ့ၩ မွဲလအၪ့ဎၬယိဘၪ ထံၫဖိၪခးဆါၥံၪအဂးဒဲ ယိလၩ့ဒၪမွဲ အဝ့ၫၥံၪအထံၫခးအဂးနီၪလီၫႉ ဖံၬလးႇ ၦမၩဆၧဖိၪဒဲ စ့ၩဆူၫလၩ့ၥံၪနီၪ ကထူၭထၪ့ဘုၪအဂး လိၫဝ့ၫဒၪ အရ့ၩဒိၪထုၬ အဝံအစၧၩ့လဖၪနီၪလီၫႉ ထံၫထၪကျိၩ့လးကျဲၩ့နီၪ ဖံၬလးၥံၪအီၪလါနၫ့ဂ့ၩ ဆၧၥုၪ့ဆၧဖျါအဂး ကဘၪမၩပျၩ့ထၪ့ဖံၬလးဒဲ ကဘၪဆံၬအဂး ဆၧမၩဆၧဖိၪၥံၪလိၫနီၪလီၫႉ မွဲဆၧဘဲၫနီၪ ခိၪလၩဘွၩပဒိၪနီၪ ဒီၩ့ဂိၩၥံၪအီၪလၧ ခးပယၩ့ထၬကကဲၩ့ခီၫလဖၪနီၪ အၪ့မၧၫ့ဝ့ၫဂဲၫၥုၭအီၪထဲၩ့ အၥၭလၧ ခးပယၩ့လၬကကဲၩ့ခီၫ ဆၧထံၪလၩ့ဒီၪလၩ့နီၪ စၭထၪ့မၩဝ့ၫဒၪနီၪလီၫႉ လကၭဒံၭဘၪ ကိၭဒံၭ ၦမၩဆၧဖိၪၥံၪလၧ ခးအံၫ့ဒံၩယါဒံၭနီၪလီၫႉ