ဖျိၩ့ဆၨၩၥၭဘၪ့လဖၪကြၨၭအၪ့ဎၬထၪ့ထဲၩ့ၦဖျိၩ့ဆၨၩဖးဖီၩ့ဧၪ

ၦဖျိၩ့ၥၭဘၪ့ၥံၪလဖၪ ကြၨၭအၪ့ဎၬထၪ့ထဲၩ့ ၦဖျိၩ့ဖးဖီၩ့ဧၪႉ ၦကနၩ့နၩ့ ကလီၩဝ့ၫ ပအၪ့ဎၬထၪ့ ဖးဖီၩ့နီၪ ကဂ့ၩမနီၫလဲၪ ကလူၬဂီၩ့မွဲအခံၫ့လီၫႉ အၡါမၪနီၪ ၦဖျိၩ့ၥၭဘၪ့ၥံၪလဖၪ ကြၨၭအၪ့ဎၬထၪ့ထဲၩ့ ၦဖးဖီၩ့လီၫႉ ဘၪနီၪလဲၪစွါဘဲၫ ၦဖျိၩ့ဆၨၩဖးဖီၩ့နီၪ မွဲၦဘၪထိးမၩလၩ့မါခွံၬထၬနီၪလီၫႉ ခီၫလၧ ပဆံၭဆံၭဒံၭအခၫဒၪအိၩ မွဲပဂဲၫထဲၩ့ၥီၪ့လိၪဘၪ ပဖးဖီၩ့အ့ၬနီၪလီၫႉ မွဲဆၧဘဲၫနီၪ အထီဘဲၫယီၩ ကြၨၭပအၪ့ဎၬထၪ့ထဲၩ့ ၦဖျိၩ့ဆၨၩဖးဖီၩ့နီၪလီၫႉ ခီၫလၧဖျိၩ့ဖျိၩ့အိၩ ခးပယၩ့ဖးဖီၩ့နီၪ မွဲစဎွၩၥံၪဖိၬလိၬထၪ့ထၬ အၪဒၪဆၧနီၪ ယိဎွါအၪ့ဎၬကွ့ၭထၬဝ့ၫဒၪ မွဲလၧဒိၩ့ဝိၩအဖးဖီၩ့လီၫတၭ ဆၨၩဆၬဖၭဒိၪ (၈) ဆၨၩ အီၪဝ့ၫဒၪ ခးပယၩ့ခးစၧၩ့ကီၪ့ယီၩ မွဲကဲၪထၪ့ ခးပယၩ့ဖးဖီၩ့အ့ၬဂီၩ့ မွဲဒၪ ဒီၩ့ဝိၩ့အဖးဖီၩ့လီၫအကၠီၩ့ ဆၨၩဒီၪ့ဖိၪၥံၪအဂး လပၫဘၪနီၪလီၫႉ ပကိၪ့ၥ့ၪလဖၪ ကွ့ၭထၬလၧ ၦဖျိၩ့ဆၨၩဖးဖီၩ့လံၬစီၩ့ဖၧၩ့နီၪ ဘၪနီၫလဲၪ ခးပယၩ့ယီၩ ဆၧၡူၪဆၧၡီၩ့လန့ဘၪအဂဲးအဖးနီၪ မွဲဒၪပဒိၪၥံၪ မၩထၪ့ထၬ ခပယၩ့ဖးဖီၩ့လီၫအကၠီၩ့ လီၩထၬဝ့ၫဒၪနီၪလီၫႉ

ၦဖျိၩ့ဆၨၩဖးဖီၩ့နီၪ ပဒိၪၥံၪလီၩ့ဎွါအၪ့ဎၬထၪ့ထၬ လအီၪဘၪလါနၫ့ဂ့ၩ ပကဒၪဘၪ လၧဘျၪ့ကိၪ့ဒိၪလး ဖျိၩ့ဆၨၩဆၧမၩလိၪဖိၪလဖၪ မဟာဝိဇ္ဇာ၊ပါရဂူ၊ ဘွဲ့လွန်ဒီပလိုမာကျမ်းအဂး လီၩ့ဎွါအၪ့ဎၬကွ့ၭထၬကၠၭဝ့ၫနီၪလီၫႉ လါနၫ့ ခးပယၩ့ဘျၪ့ကိၪ့ဒိၪဆၧကိၪ့ၥ့ၪနီၪ ဆၧနဲၪ့လၩဖၩ့ကန့အဂး ကၠၩ့လဖၪနီၪ ကထူၭထၪ့လံၬစီၩ့ လုၫလါမွဲလအီၪဘၪလီၫႉ မွဲဆၧဘဲၫနီၪ ဆၧမၩလိၪဖိၪၥံၪ အဆၧကျ့ၭစၨၭခိးဂဲးခိးဘၭလဖၪနီၪ အီၪထးဒၪလၧ ဘျၪ့ကိၪ့ဒိၪဆၧဖီလံၬဒူၭဖၧၩ့လီၫဂီၩ့ မွဲလထီၩ့ဘၪလၧ ၦခမျၧးၥံၪအကျၩနီၪလီၫႉ

ခးပယၩ့ ဆၧဖီၩ့ဖျ့ၭန့ဂီၩ့ အလးခဲၫ့ ၁၉၅၅နံၪ့ ခၩ့ခိၪဒိၪ အူၩနု လီၩဝ့ၫ ဖျိၩ့ဆၨၩၥံၪ ဖီၪ့ထၪ့စူၪဝဲၩဂီၩ့ ဒုၭထၪ့ဆၧနီၪ ယၥၭမဲၪအ့ၬ လါနၫ့ ယၥၭမဲၪမွဲ အဝ့ၫၥံၪကၥ့ၪယၫထဲၩ့ အဖးဖီၩ့နီၪလီၫႉ

ပထံၫထၪကျိၩ့ခးဒီၪ့လးဝၩ့ဖၭဒိၪ ခၩ့ခိၪဒိၪလံၩ မၩ့ဂၠီၫနံၫ လီၩဝ့ၫ ဖျိၩ့ဖိၪၥံၪ လပၥ့ၪယၫဘၪဖးဖီၩ့ (နကလၩ့ဆၨၫထး)  ပကအီၪထးအလးခဲၫ့လီၫႉ မွဲဆၧဘဲၫနီၪ ပကဘၪမၩထီးပၥ့ၪယၫ ပဖးဖီၩ့လီၫႉ ဖျိၩ့ဆၨၩမီၪ့ဎီၩ့ ပကဘၪအီၪလၧ ဆၧယံၩဆၧၡီၩ့လီၫႉ