ဆၧဘၧၩ့လၩ့ Fr.Vincent မၩ့ၥူၫလဲၫ့အစွၫ မံဆၩဆၧလုထၪ့

၂၀၂၆နံၪ့ လၩဖ့ၫဘြူၫအ့ၫရံၫ ၄ၥၫ့ လဂီၩ ၁၀နၩရံၫခီၫအခံၫ့နီၪ ၦၡၩဘၧၩ့လၩ့ Fr.Vincent မၩ့ၥူၫလဲၫ့အစွၫမံဆၩဆၧလုထၪ့အီၪဝ့ၫဒၪလၧ ဆၧရွံခီၫ့ဆၧအီၪကီၪ့ မ့ၫရံၫကိၩ့တဝၫ့နီၪလီၫႉ

ၦလၧအလ့ၩခိၪလ့ၩနါ မံဆၩဆၧလုထၪ့နီၪ မွဲဝ့ၫဒၪဒိၩ့ပၥံၫ့ဆၧအီၪကီၪ့ ၥၫ့ခိၪဒိၪ Bp.Henry မၩ့အဲၪချံၫ့နီၪလီၫႉ မံဆၩဆၧလုထၪ့ဖၧၩ့ ၥၫ့ခၫ ကၫရိၫလူၩ လီၩလၩ့လၬလၩ့ဝ့ၫဒၪ “ၥၫ့ခၫ မၩ့ၥူၫလဲၫ့ယီၩနီၪ အၥၭခိဆၧၥ့ၪအၪမၬလ့ၬႉ အၥၭနီၪအီၪဖူၭလူၭကုၭ ဂီၩ့ အဲၪဒိၭဆၧၡူၪဆၧၡီၩ့ ဆၧဎူၫဆၧဎၩ့ဒိၪမၬလီၫႉ ဆၧနီၪအကၠီၩ့အဝ့ၫယီၩ ဘၪထိးကိၭဘဲၫကဆါယွၩအဖိၪခွၫကဂၩအၥိၭနီၪလီၫႉ အဝ့ၫဘၪအၥၭထုၬဆၧၥၭအွံၪနီၪ မွဲဝ့ၫဒၪလၧ နေဝင်ချိန်ရယ်ကြိုနင့်အုံး ဆၧၥၭအွံၪနီၪလီၫႉ လၧအလးလၩ့ဝ့ၫဒၪအလးလဖၪနီၪ အဝ့ၫယီၩ အီၪဝ့ၫဒၪ မုၬမုၬလၩလၩနီၪလီၫႉ”

ၥၫ့ခိၪဒိၪမၩ့အဲၪချံၫ့လီၩလၩ့လၬလၩ့ဝ့ၫဒၪ”ယကဂဲၫဘၪအဝ့ၫ အဆၧဘၧၩ့လၩ့အဂး အဂုအိၩယစီၪထၬအ့ၬႉ လါနၫ့အဝ့ၫယီၩ ဘၪထိးထၬဆၧဆၫအကျၩ ကျ့ၭစၨၭဂဲၫထဲၩ့ထၧၩ့အထီၩ့လၧ ခးပယၩ့ဖၧၩ့ႉ အဝ့ၫယီၩ ဂဲၫထဲၩ့မၩဆၧၩ့ထၬ ဒိၩ့ပၥံၫ့ဆၧအီၪကီၪ့ယီၩအီၪအၪမၬလ့ၬႉ လၧဆၧရွံခီၫ့ဆၧအီၪကီၪ့ဖၧၩ့ယီၩ ၥၫ့မုၥၫ့ခၫဘဲၫအဝ့ၫၥိၭ မွဲဂဲၫအီၪထၪ့ဒၪဝ့ၫအၪအၪလါဆံၭနီၪဘိၭ ယအၪ့ကံၩ့ဘၩဆိၪဖၪနီၪလီၫႉ”

Fr.Vincent မၩ့ၥူၫလဲၫ့ယီၩ လချူၭၥံၫဒံၭဘၪအထီ အဝ့ၫကဘၠၩ့ၥၭအဂးစူၭထၬအထီလဖၪနီၪ မၩဘိၪ့ထးဆၧအီၪကီၪ့ ထီးလူၬနီၪလီၫႉ ဒိၩ့ပၥံၫ့ဆၧအီၪကီၪ့ထၧၫ့ဘံၪ့ယၫ ၥၫ့မုၥၫ့ခၫၥံၪအဂး မၩဘိၪ့ထးဝ့ၫ ထီအကုၬ၁၀၀၀ႇ SFX Bro ခရၧၫ့အဂး ထီးအကုၬ၃၀၀ႇ SFX Sisterခရၧၫ့အဂး ထီးအကုၬ၃၀၀နီၪ အဝ့ၫယီၩ မၩဘိၪ့ထးဝ့ၫနီၪလီၫႉ

လၩ့ဆၫ့ဝ့ၫဒၪကမံၩ့နီၪ လၧအဝ့ၫအဆၧဘၧၩ့လၩ့အဖၧၩ့ အဝ့ၫဘၪၥၭထုၬ ဆၧၥၭအွံၪနီၪ မၪလူၬထး ၥၫ့မုၥၫ့ခၫလဖၪ မွဲကၥၭအွံၪဖ့ၪနဲၪအဝ့ၫအကၠီၩ့တၭ ၥၫ့မုၥၫ့ခၫလဖၪ ၥၭအွံၪလၩ့ဎိၭထၪ့ဘၪ ဆၧၥၭအွံၪနီၪ လၧအဝ့ၫအဂးနီၪလီၫႉ လၧမံဆၩဆၧလုထၪ့အဖၧၩ့ ၥၫ့မုၥၫ့ခၫလဖၪ ဂဲၫဝ့ၫဒၪ ကအီၪဖိၭဘိၭအဂၩ ၄၀ဂီၩ့ ၦဆူနဲၩဖိၪဒဲ ဆၧဘိၪ့ဆၧဘၩဂူၫဂၩၥံၪ ၦဘူၭဒၭၥၫ့မုၥၫ့ခၫၥံၪဆ့ မွဲဂဲၫဘၧၩ့လၩ့အဝ့ၫအစွၫဆ့အဂဲး ပန့ဘၪဆၧပရၧၫ့ဘဲၫယီၩအၥိၭနီၪလီၫႉ