ခးပယၩ့အဂး ၥၫ့ဎွၩဒိၪ အဆၧဒုၭၥ့ၪယၫႇ ဂၪ့ခိၪစူၪဝဲၩ ဆၧပြၧၩ့ထၪ့ ဆၧဖ့ၪထုၪ့ၥၭ

လၧဂၪ့ခိၪအၥီၫ့ခရၧၫ့ ၥၫ့ဎွၩဒိၪ လံၫယိၫ (၁၄) နီၪ လီၩလၩ့ဝ့ၫဒၪ ခးပယၩ့ ဘၪဒၪဆၧကၪဆၧဂဲၩနီၪ နဲၪထၪ့ဝ့ၫလၧ ဆၧအၪ့ယိၪခဲၫ့ကံၭဎိၩဒိၪအဖၧၩ့ဂီၩ့ ဆၧဎူၪဆၧဎၩ့ဒဲ ပၫဝ့ၫဒၪ ဆၧချဲၩ့ဎိၭလၩ့ဖၧၩ့ၥၭလဖၪႇ ထံၫဖိၪခး ဆါလၧ အဘၪဒၪဎီၩ့ဆၧၫ့ယၫ ဆၧကၪဆၧဂဲၩလဖၪယီၩ ဘၪထွ့ၫလၧ ၡၩခမျၧးဒီၩ့ဘၪဎီၩ့ၥၭ ဆၧနုၬလၩ့အခွး ဆၧနဲၩ န့ထိးၥၭကန့အဂး အၪ့ကံၩ့ထၪ့ဝ့ၫနီၪလီၫႉ

ၥၫ့ဎွၩဒိၪ အဆၧလီၩလၩ့လၭလၩ့လဖၪယီၩ လီၩလၩ့ဝ့ၫဒၪလၧ နံၪ့ ၂၀၂၆ႇ လၩ ဇၫ့နဝၫရံၫ ၉ၥၫ့ႇ ၥံၭၥီၫ့မုနံၩ လၧဘၫတံၫကၫ့ ရွံထၪ့န့ထၬ အၥီၫ့လဖၪအီၪနီၪလီၫႉ ဘၪထွ့ၫလၧ ခးပယၩ့ ၥၫ့ဎွၩဒိၪအၥီၫ့ Msgr. အၫ့ဒရံၩယၩ ဖၫရၩ့တ့ၫ အၪ့နၩ့ချဲၩ့လၩ့ အလံၬပရၧၫ့ဂီၩ့ နဲၪလီၩဖျီၪထၪ့ဝ့ၫလၧ ခးပယၩ့ဖၧၩ့ ဆၧနိၪ့ဆၧနၭၥံၪ ဂဲၫနၭထၪ့အဂဲးနီၪလီၫႉ

ယဆၧဆီၪ့မီၪ့လဖၪနီၪ ကဲၪထၪ့ဝ့ၫဒၪလၧ လၩမၭ ဖူၫဆံၫဂုဖၭဒိၪအကၠီၩ့ ဂဲၫနၭထၪ့ဝ့ၫဒၪ လၧခးပယၩ့အဖၫ့ခိၪ လၩ့ဘၪဝ့ၫဒၪ  ၡၩခမျၧးဆၧဒီၩ့ဘၪဎီၩ့ၥၭဒဲ ဘၪထွ့ၫလၧ ဆၧဒူၩဆၧယးနီၪ လ့ၩဝ့ၫဒၪလၧ ဆၧကၪဆၧဂဲၩဖၭဒိၪ အဖၧၩ့လီၫအကၠီၩ့ ၥၫ့ဎွၩဒိၪ လီၩဝ့ၫနီၪလီၫႉ ဆၧရွံထၪ့လၧ အလ့ၩဝ့ၫလၧ ဆၧရူၪဆၧၡီၩ့လဖၪနီၪ ဘဲၫပအၪ့ကံၩ့ထၪ့ထဲၩ့ ကန့အဂး ၡၩခမျၧးဆၧဒီၩ့ဘၪဎီၩ့ၥၭ ဆၧမၩဆၧၩ့လဖၪ ဘဲၫကန့ဎွ့ၪဎီၩ့အဂးနီၪလီၫႉ

ဆၧဖိၭလိၭထၪ့ဆၧရူၪဆၧမုၬနီၪ ဘၪထွ့ၫလၧ ဂၪ့ခိၪထၧၫ့ဘံၪ့ယၫ ဆၧဂၭဂီၩ့ဂၭစၪဒဲ ဆုးကျိၭအၥၭလၧ ခးပယၩ့အဆၧၫ့အထီနီၪ ၥၫ့ဎွၩစံၭဝ့ၫ ဆၧလၧဆၧမုၬဆၧရူၪနီၪ န့မွဲ ဂဲးဘၭဒဲ ဆၧမၩထီးထၬနီၪလီၫႉ ဆၧဒုၭၥုၭနီၪ ဆၧမၩဂၭဂီၩ့ဂၭစၪဆၧဒဲ မံၫ့ၥၭဝ့ၫလါနၫ့ဂ့ၩ ဆၧမုၬဆၧရူၪနီၪ ဆၧၥၭဆၧၩ့ ဆၧအွံၪၥၭဆၧၩ့ ဒဲဆၧဖိၬလိၬထၪ့ဂဲးဘၭ လိၫဝ့ၫဂီၩ့ လကၭဒံၭဘၪ ဆၧထုၪ့ၥုၪ့ထုၪ့ၥၭ လိၫဝ့ၫကိၭကၠၪနီၪလီၫႉ

ထီးနီၪ လၧအဝ့ၫအဆၧချဲၩ့လၩ့အဖၧၩ့ ဘၪထွ့ၫလၧ စူၪဝဲၩအဆၧပြၧၩ့ထၪ့အၥၫ့ကမံၩ့ ကဂဲၫကဲၪထၪ့ၥ့ၪ ဝ့ၫနီၪ ထုၭထၪ့ ဆၧထုၪ့ၥုၪ့ထုၪ့ၥၭ ဆီၪ့ဆီၪ့လ့ၬနီၪလီၫႉ လၧလၩဖ့ၫဖီၫဝၫရံၫ နယူၩစတၭ နူၩကလံၩယၩလံၬစၧၩ့ အခံၫ့ကလူၬထၪ့ဒဲ ခိၪနုၬအဘျၪကိၪ့ၥ့ၪ စူၪဝဲၩအၥၫ့လဖၪ ဆၧဖိၬလိၬထၪ့ ဆၧလၩ့အၪ့ယိၫအဖၫ့ခိၪ အၪ့ယိၫခဲၫ့ကံၭဝ့ၫ အၪမၬနီၪ နဲၪဖျီၪထၪ့ဝ့ၫနီၪလီၫႉ

ၥၫ့ဎွၩဒိၪနီၪ ဆၧပျီၩ့ဖျ့ၭဒဲ ၡၩဆၧအၪ့န့ထၪ့မူၩဒၩနီၪ ပဒၩ့ယိထွ့ၫဝ့ၫနီၪ ဘၪထွ့ၫလၧ ၥနိၫ့လဖၪ AI နီၪ ဘဲၫကတဲၩ့ဝဲၩ့ၥိၩ့ထၪ့ဝ့ၫ ကျ့ၭကျ့ၭဘၪဘၪလၧ ၡၩခမျၧးအၥနိၫ့အဖၧၩ့အကၠီၩ့ အၪ့ယၫထၪ့ဝ့ၫဒၪနီၪလီၫႉ ခးပယၩ့ ဖိၪၥံၪအဂး ၥၫ့ဎွၩဒိၪအဆၧချဲၩ့လဖၪနီၪ ဂၪ့ခိၪၡါစီၩ့ဒီၩ့ခိၪဖၧၩ့ အဝ့ၫၥံၪ အဆၧဂဲၩဝၭနီၪ မၩထၪ့ထီၪ့ဝ့ၫဒၪ ဂ့ၩဂ့ၩဂီၩ့ ဆၧမၩဆၧၩ့ဒဲ ဆၧချဲၩ့ဎိၭလၩ့အဂဲး လၧအလိၫဝ့ၫဒၪလဖၪနီၪ အရ့ၩဒိၪ ဘၪထွ့ၫလၧ ၡၩခမျၧးဒီၩ့ဘၪဎီၩ့ၥၭ အလိၫဝ့ၫတၡါလဖၪဒဲ ဘၪထွ့ၫလၧဂၪ့ခိၪထၧၫ့ဘံၪ့ယၫ ဆၧဖိၭလိၬထၪ့ ဆၧမုၬဆၧရူၪအဂး ဆၧအၪ့ကံၩ့ထၪ့ ၡၩအတခ့ၭဖဝၭ ကဆံၭကခ့ၭကမံၩ့အဂး နဲၪဖျီၪ့ထၪ့ဝ့ၫနီၪလီၫႉ