ၦဖျိၩ့ဆၧအူၪဆၧဒံၩ့ကမံၩ့မွဲဝ့ၫ နါဒံၩ့အဂဲး
ထၧၫ့ဖုဝဲထံၩၥိၭဖျိၩ့ဖိၪၥံၪဧ့ႇ အီၪဆီၪ့အီၪချဲၫ့ကိၭဂၩဒ့ၭနဲၪႉ မုကနွ့ၫယီၩ ပဆၧဆၧးဎံၫဆၧးလၩအနိၫ့ဖၧၩ့ ယမိအၪ့နၩ့လီၩအ့ၪဘၪနၥံၪ ဆၧအဂဲးနီၪမွဲ လၩ့ဘူၭကလၩ့မါဝ့ၫဒၪ ၦဖျိၩ့အဆၧအူၪဆၧဒံၩ့ကမံၩ့မွဲဝ့ၫ နါဒံၩ့အဂဲးနီၪလီၫႉ အဆိၫထုၬ ၦဖျိၩ့ဆၨၩအနါဒံၩ့နီၪ မိမီၪ့ဎီၩ့ဒၪ ဒီၩ့ဝိၩအနါဒံၩ့လီၫႉ အဖျုၩအီၪဝ့ၫ (၆) ဘီၩ့ မွဲဝ့ၫ ၦဖျိၩ့နါဒံၩ့နီၪ လၧဖျိၩ့ဖျိၩ့အိၩ မွဲဝ့ၫဆၧအူၪဆၧဒံၩ့လၧ အမံၩ့ဎိၩဝ့ၫဒၪကမံၩ့လီၫႉ အထီဘဲၫယီၩ လၧဝံးဖၭဒိၪ တဝၫ့ဖၭဒိၪလဖၪအကျၩ ဂဲၫလၩ့မါထၪ့နၭမၬယူၭနီၪလီၫႉ လါနၫ့ လၧဖျိၩ့ဆၨၩခးဒီၪ့ ၦဖျိၩ့တဝၫ့လနၩ့နၩ့နီၪ ပကဒၪဘၪဒံၭနီၪလီၫႉ
လၧဖျိၩ့ဖျိၩ့အိၩ ဖံၫဖူၫၥံၪလဖၪ အဝ့ၫၥံၪအဖံၫအဖူၫအထီဒၪအိၩ အဂဲးအဖးလဖၪႇ ၡါ ဒဲ ခိၪလီၩ့ထိၩ့ချိၬအဂဲးအဖးလဖၪႇ ဆၧအဲၪဆၧကွံၩအဂဲးလဖၪနီၪ ကွ့ၭနဲၪထၬဝ့ၫဒၪလၧ ထၩနီၪလီၫႉ အဝ့ၫၥံၪ ကွ့ၭနဲၪထၬ ထၩ ဒဲ ဆၧၥၭအွံၪၥံၪလဖၪယီၩ ဒံၩ့ထၪ့နါဒံၩ့ဂီၩ့ ၥၭအွံၪထၪ့ယံၫယါဝ့ၫနီၪလီၫႉ
လၧဖျိၩ့ဖျိၩ့အိၩ အၪဒၪဆၧ ၥၭဘၪ့ၥံၪလဖၪနီၪ ဆိၪဖၪထၩ ဘၪဝ့ၫကိၭဂၩဒဲ လ့ၩလီၩ့ဂါလၧ ၦမုၪနၩ့ၥံၪအဂံၪ့ ဒံၩ့ထၪ့နါဒံၩ့ဂီၩ့ အၪ့ကံၩ့အဲၪဝ့ၫဒၪဒဲ လၧအထီအနီၪဒၪအိၩ နါဒံၩ့နီၪ မွဲလၧ ၦဖျိၩ့ၥၭဘၪ့ၥံၪလဖၪအကျၩ အဲၪဒိၭဝ့ၫအနၭထုၬ ဆၧအူၪဆၧဒံၩ့ကမံၩ့နီၪလီၫႉ
