မြစ်ကြီးနားဆၧအီၪကီၪ့ ၥၫ့ခိၪဒိၪ Bishop John Mung Ngawn La Sam အဆၧၥၭထိၬပရၧၫ့

နံၪ့ ၂၀၂၅နံၪ့ လၩနိၫဝံၩ့ဘၧၫ ၂ၥၫ့နီၪ ဂၪ့ခိၪထၧၫ့ဘံၪ့ယၫ ကဲၭၥလံၬ ဆၧဘိၪ့ဆၧဘၩဖိၪၥံၪ မၩလၩမၩဖၩ့ၡီၩ့ ၦအၥံၫဖီၩ့ခွံၬလဖၪအဘိၪ့မုနံၩနီၪလီၫႉ လၧခးပယၩ့ဖၧၩ့ ကဲၭၥလံၬဆၧအီၪကီၪ့ လဖၪအကျၩ မြစ်ကြီးနား ဆၧအီၪကီၪ့နီၪဆ့ မၩလၩမၩဖၩ့ၡီၩ့ ဘိၪ့မုနံၩနီၪဆ့လီၫႉ ၥၫ့ခိၪဒိၪနီၪမွဲ လၧBishop John Mung Ngawn La Sam နီၪလီၫႉ

          လၧၦအၥံၫဖီၩ့ခွံၬလဖၪ အဘိၪ့မုနံၩဖၧၩ့ ၥၫ့ခိၪဒိၪနီၪ လီၩလၩ့လၬလၩ့ဝ့ၫဒၪ ပဘၪဂဲၩဖျူ ဂဲၩဝၭဝ့ၫဒၪ ပဆၧၥၭမၧၫ့အဖၧၩ့ ပကဘၪလီၩ့ဎွါကဆါယွၩဒဲ ဒံၫဂၠ့ၫတဲၫ နီၪ ပကဘၪၥိၩ့ဝ့ၫဒၪလၧ ကန့ခိးန့တၩအလးနီၪအဂဲး အဝ့ၫလီၩဝ့ၫဒၪလီၫႉ လကၭဘၪ ပၥံၫဒဲပမၧၫ့နီၪ ဆုးကျိၭလိၬၥၭအ ဂဲး ဒဲ ဆၧယိလါလဆိၩယၫအဂဲးနီၪဆ့ ဆုးထဲၩ့လီၩလၩ့လၬလၩ့ဝ့ၫဒၪဒံၭနီၪလီၫႉလၧမံဆၩဆၧလုထၪ့နီၪအဖၧၩ့ လၧၥၫ့ခိၪဒိၪကၠၧၫ့ကၠၧၫ့ ၥၫ့မုၥၫ့ခၫ၇ဂၩနီၪ စူၭကီၪ့လ့ၩခိၪလ့ၩနါ မံဆၩဆၧလုထၪ့နီၪလီၫႉ

ၥၫ့ခိၪဒိၪနီၪ ဆုးထဲၩ့စံၭဝ့ၫဒၪ ဘဲၫယီၩအၥိၭဒံၭနီၪလီၫႉ “ၦၡၩလဂၩနီၪ လၩ့ဂၬဝ့ၫလၧ နၩ ရံၫကဖျိၪ့နီၪလီၫႉ ထၧၫ့စီၩ့ၥံၭအဂဲးလူၬကကၠၪ ပကဘၪဆုးထဲၩ့လ့ၩနီၪလီၫႉ စၭထၪ့လၧပအီၪ ဖျဲၪထၪ့နီၪ ဆၧၥံၫဂဲၫပၫဖိၬထဲးပခဲၫ့ယူၭနီၪလီၫႉ ကနံၩကကၠၪနီၪ ပဝ့ၫၥံၪကိၭဂၩဒ့ၭ ပကဘၪၥံၫ ကၠၭနီၪလီၫႉ လၧပဆၧၥၭမၧၫ့ဖၧၩ့ ဆၧအနၧၩ့ဒဲ ဆၧအစၪႇ ဆၧၥၭမုၬဒဲဆၧၥၭအုၭလဖၪ လဲၩမွံၩ ထၬအၥၭနီၪလီၫႉ ဆၧထီးအလူၬယီၩနီၪ မွဲကလ့ၩထီၩ့ဒၪလၧ ကဆါယွၩအအီၪတၭ ပဆၧထူၭ ဆၧလၧၫ့လဖၪနီၪ အ့ၪပၥံၫကကၠၪ မွဲပကဘၪအီၪက့ၪထးခွံၬနီၪလီၫႉ ဆၧဂုးဆၧၫ့လဆိၩၡၩနီၪ အီၪဒၪ ပနးၥၭအဆၧန့ၥၫကမံၩ့ဎးနီၪလီၫႉ ဆၧကထဲၩ့ပၫဖိၬပခဲၫ့နီၪ အီၪဒၪလၧပၥၭမၧၫ့အထီ ပဂဲၫထဲၩ့အီၪအၪ့ထၬ ဘဲၫၥ့ၪလဲၪႉ ပဆၧအဲၪဆၧကွံၩႇ ပဆၧဆူနဲၩဒဲ ပၧၩဒဲကဆါယွၩအကျၩ ဆၧဆုးကျိၭနီၪလီၫႉ ၦအၥံၫဖီၩ့ခွံၬလဖၪအဂး အၪ့ကံၩ့ဘၩဆိၪဖၪအ့ၪလါဆံၭႉ ကဆါယွၩနီၪ မွဲ အဆၧအဲၪကွံၩ ဎိၩဒိၪဝ့ၫဒၪအကၠီၩ့ အဝ့ၫဖျါခွံၬလန့ဘၪ ဆၧဒဲၩဘၭဘနီၪ အီၪနးမံၩ့အ့ၬႉ“ အဂဲး ၥၫ့ခိၪဒိၪယီၩ ဖ့ၪဘၪၦဆူနဲၩဖိၪအဂၩ ၁၀၀၀ဘျဲၪနီၪ ဆၧထုၪ့ၥုၪ့ထုၪ့ၥၭ ဘဲၫယီၩၥိၭအဂဲး ပန့ဘၪ ဆၧပရၧၫ့ယီၩလၧ RVA Lisu Service အဖၧၩ့နီၪလီၫႉ