ၦခိၭနၪဆၧဖိၪၥံၪဧ့ႇ ခီၩခီၩအိၩၦၡၩလဖၪနီၪ အၥၭအီၪဝ့ၫနံၫဆံၫဘျဲၪၥၧၫ့ဆံၫ ထိၪတၭအၪ့ဎၬႇ အၪ့နၩ့ဘဲၩဖၭစၧၥ့ၪဝ့ၫဒၪဂ့ၩဘၪစဲၪမၬန့ဖိၪန့ဝၩမွဲအ့ၬဧၪႉ ဆၧနီၪအကၠီၩ့ဘၪဒၪခီၩ့ဆၧၫ့ယၫလၧ ဂံၪ့ဒီၪ့အဆၧကၪဆၧဂဲၩလဖၪလါနၫ့အၪ့နၩ့ထိးခ့ၬအ့ၪလိၬၥၭႇ ကဂၩဒဲကဂၩအဆၧနၪၥ့ၪအ့ၪ လိၬၥၭဆ့မွဲလၡၩဘၪခိၭအၥၭဆံၭဆံၭဆိၭဆိၭအဖၧၩ့ထၪ့ၡါဝ့ၫဒၪပၧၩလဖၪအၥိၭနီၭလီၫႉ ထီးနီၪ လၧခီၩခီၩအိၩၦၡၩလဖၪနီၪ အီၪက့ၪဒိၪဝ့ၫဒၪ ဆၧမ့ၬမဲနၭဒ့ၭမွဲအ့ၬဧၪႉ ကဂၩဒဲကဂၩ ၥုၪ့ၥၭလလၩ့ဎိၭဘၪလိၬၥၭလါနၫ့ ထီၩ့အဂံၪ့ဒီၪ့ကလၩ့ပြံၩလၩ့ပြၩဘနီၭအဝ့ၫၥံၪမၩဝ့ၫ မွဲလဘၧၫ့ဘၪနီၪလီၫႉ အထီဘဲၫယီၩၥၭဘၪ့ဖိၪလဖၪနီၪဘိၭ ဒၪလိၬၥၭဘဲၫယီၩ အဲၪလိၬၥၭ ဘဲၫယီၩႇ အဲၪလိၬၥၭဘဲၫယီၩ အၪ့န့လိၬၥၭဘဲၫယီၩ အၪ့န့လိၬၥၭဘဲၫယီၩ ပျၩလိၬၥၭဘဲၫယီၩႉ ဂံၪ့ဒီၪ့အဆၧၥၭမၧၫ့နီၪအဝ့ၫၥံၪအီၪက့ၪဝ့ၫဘဲၫဖိၪၥၪဖိၪလဖၪအဆၧကွ့ၩအၥိၭနီၪလီၫႉ မွဲဆၧ ဘနီၭၦလၧအကဲၪဝ့ၫဒၪၥၭဘၪ့မုၪခွၫၥံၪဧ့ႇလချုၭပလထၪ့ၡါဒံၭဘၪအထီ ပကဘၪခိၭနၪလီၩ့ဖိၬ မန့လၪလဖၪလဲၪနီၪဘဲၫယီၩ ယကလီၩဖ့ၪနဲၪအ့ၪနၥံၪနီၪလီၫႉ အဆိၫထုၬပဆၧအဲၪတၩ့ဖိၪနံၫဂၩ ယီၩကဂၩဒဲကဂၩကဘၪဘၪထံၭယူၩယါလိၬၥၭနီၪလီၫႉၦလၧပကအီၪဎုၬဝ့ၫဒၪကဂၩနီၪ လချုၭ ပလအီၪဎုၬဒံၭဘၪလိၬၥၭအထီဆၧဘၪထံၭလိၬၥၭႇ ဆၧၥၭထၪ့လိၬၥၭကဘၪအီၪဝ့ၫနီၪလီၫႉ ပဘၪထံၭလိၬၥၭအထီကဂၩဒဲကဂၩ ပဆၧနၪၥ့ၪအ့ၪလိၬၥၭကဂဲၫဒိၪထၪ့အၪထၪ့ဒဲ အဝ့ၫ လအဲၪဒိၭဘၪနီၪအဝ့ၫကၥ့ၪယၫထၪ့ဝ့ၫဂီၩ့ ဆၧလအဲၪဒိၭဘၪလဖၪယီၩ ပဂၭဎ့ၭခွံၬအဂး ပၥုၪ့ပၥၭကအီၪထၪ့ဝ့ၫဒၪနီၪလီၫႉဆၧအဲၪတၩ့နံၫဂၩယီၩ အ့ၪမွဲဘၪထံၭယူၩယါလိၭၥၭ နၩ့ကၠၪအ့ၬႉအဆၧချဲၩ့အၪလိၭၥၭနးဆိၭအ့ၬစွါဘဲၫထၪ့ၡါဂီၩ့ကကၠၪ အ့ၪမွဲအၥုၪ့အၥၭလလၩ့ဎိၭ ဘၪအထီကဘဎိၭဎဲၫဝ့ၫဘဲၫၥ့ၪလဲၪအဂဲးမွဲလၥ့ၪယၫဘၪဝ့ၫဒဲအဂံၪ့ဒီၪ့ အဆၧၥၭမၧၫ့နီၪ ကဎွ့ၩလၩ့ဝ့ၫဒၪလၧဆၧအခိအဝီၩလဖၪတၡါဒ့ၭနီၪလီၫႉ