ဘၪနီၫလဲၪမိလၨဆၧချဲၩ့ဘၪလၩ့မါထၪ့နီၪ (၁)

ထၧၫ့ဖုဝဲမုၪခွၫၥံၪဧ့ႇ လၧပဂၪ့ခိၪချိၫ့ယီၩ လၨဆၧချဲၩ့လဖၪ လမီၪ့ဎီၩ့ ဘၪဒဲ အီၪဝ့ၫအမံၩ့မံၩ့နီၪ မွဲ ဘၪထွ့ၫလၧ ၡၩခမျၧးလုၫလါကမံၩ့မွဲဂ့ၩႇ ဒြၭမဲၭဆၧးဎံၫဆၧလၩကမံၩ့မွဲဂ့ၩႇ ကုလၭၥၭမဂၭႇ ယူနက်စကို ခရၧၫ့ဒုၭအီၪဂုးခၧၫ့ထၬနီၪလီၫႉ မွဲဆၧ ဘဲၫနီၪ ဘဲၫမိလၨဆၧချဲၩ့ကဆုးအီၪၥၭမၧၫ့အဂး ဂၪ့ခိၪကုလၭၥၭမဂၭႇ ယူၫနဲစကိၫခရၧၫ့နီၪ ဖ့ၪဂဲးဖ့ၪ ဘၭထိးဆၧၫ့ထၬဝ့ၫဒၪနီၪလီၫႉ လၨဆၧချဲၩ့လၩ့မၬနီၪ မီၪ့ဎီၩ့ ၡၩခမျၧးဆၨၩလၩ့မၬနီၪလီၫႉ ကမိဒၪလၨဆၧချဲၩ့နးမံၩ့နီၪ လၩ့ဆၫ့ဂ့ၩဒိၪဝ့ၫဒၪ ဆၧဆၧးဎံၫဆၧးလၩ အဆၧနဲၪ့အီၪဝ့ၫနီၪလီၫႉ ထီးနီၪ နံၪ့ ၂၀၀၁ လၩ အီၭတိၩဘၫ ယူၫနဲစကိၫ မၩလၩမၩဖၩ့ၡီၩ့ထၪ့ (၃၁) ဘျၩ့လဘျၩ့ စ့ၭစ့ၭရဲၫ့ရဲၫ့ ဆၧအီၪကီၪ့ဎိၭလၩ့ (အထွေထွေညီလာခံ) နီၪ ဘၪထွ့ၫလၧ ဆၧဆၧးဎံၫဆၧးလၩ မမီၪ့ဎီၩ့ ဘၪႇ လၨဆၧချဲၩ့လမီၪ့ဎီၩ့ ဘၪႇ ဘၪထွ့ၫလၧ ဆၧၥၭမၧၫ့လဖၪ လမီၪ့ဎီၩ့ ဘၪနီၪ အီၪက့ၪပၭကၩဝ့ၫအကၠီၩ့ ဘိၭ ဘၪၥ့ၪယၫထၪ့ဝ့ၫဒၪနီၪလီၫႉ

ပဂၪ့ချိၫ့ယီၩ လၨဆၧချဲၩ့လဖၪ စၭထၪ့ လၩ့မၬခီၫလၧ အဖီၩ့ခွံၬနံၪ့ (၅၀၀) အိၩယူၭနီၪလီၫႉ ထီးထီၩ့ဆၧၫ့ထီ ဘဲၫယီၩ ဆုးၥၭမၧၫ့ထး လၨဆၧချဲၩ့နီၪ ကအီၪထးဒၪ ဖိၭဘိၭ (၆၈၀၉) မံၩ့လီၫအကၠီၩ့ ကွ့ၭနဲၪ့ထၬဝ့ၫန့နီၪလီၫႉ လၨဆၧချဲၩ့လၧအအီၪထးယီၩ ဖိၭဖၫ့နီၪ မွဲထီၩ့ဝ့ၫဒၪလၧ လယံၬလမီ ဘၪအထီ ကလၩ့မါၥ့ၪဝ့ၫဒၪ ဆၧၫ့ထီယူၭနီၪလီၫႉ လၨဆၧချဲၩ့ယီၩ ကဆုးအီၪဂုးခၧၫ့ကန့ဒၪ ဖိၭဘိၭ (၆၀၀) လီၫအကၠီၩ့ ပၥ့ၪယၫ ဘၪနီၪလီၫႉ ဆၧလၧလၨဆၧချဲၩ့နီၪ ၦချဲၩ့လအီၪလၧၩ့ဘၪနးဂၩအခၫ ကလၩ့မါခွံၬဝ့ၫဒၪနီၪလီၫႉ ဘၪနီၫလဲၪ ပလၨဆၧချဲၩ့ ဘၪလၩ့မါနီၪစွါဘဲၫ ၦၥိၩ့အၪဆၧချဲၩ့လဖၪနီၪ ဂဲၫလုဘံၭထၪ့ ၦၥိၩ့ၡၩလၨဆၧချဲၩ့ၥံၪ ကဆံၭဆံၭဂီၩ့ ၦၥိၩ့ၡၩလၨဆၧချဲၩ့လဖၪ ဂဲၫလၩ့မၬထၪ့နီၪလီၫႉ ထံၫခးအနိၪ့ ဆၧထၪ့ဒၩအကၠီၩ့ ဘၪထိးဆၧဒုၭဆၧယၩ ဆၧလၩ့အၪ့ယိၫအခၫမွဲဂ့ၩႇ ဘၪဒၪဎီၩ့ဆၧၫ့ယၫ နဲၩ့ဎီၩ့ဆၧလၩ့အၪ့ယိၫအခၫမွဲဂ့ၩဒဲ ဆၧဘၪဎၬဆၧဆၫအၧၩ့လဖၪ ဂဲၫကဲၪထၪ့အခၫမွဲဂ့ၩ ဆၨၩဆၬလဖၪလၩ့မၭထဲၭၥ့ၪအကၠီၩ့ လၨဆၧချဲၩ့နးဆ့ မွဲလၩ့ဎုၬထဲးၥ့ၪဆ့နီၪလီၫႉ