ၦဖျိၩ့ဆၨၩဖိၪၥံၪ ဂဲၫၥုၭအီၪထဲၩ့ လၧခးအ့ၩၡၩအဂဲး (၂)
ဖျိၩ့ဆၨၩၥံၪနီၪ အီၪလၧ ခးတရူၭ ယူၫနၫ့လးကျဲၩ့အထီ မွဲတရူၭၥံၪမၩနၧၩ့မၩစၪအဝ့ၫၥံၪအကၠီၩ့ ဂဲၫထဲၩ့ၥုၭအီၪထဲၩ့အၥၭလၧ မဲခီၫဘံၩချိၬဖျီၩ့ႇ ရွ့ၫလံၫ-အ့ၫယၫဝတံၫ ဘံၩချိၬဖျီၩ့ ဒဲ ၥၫ့လွ့ၫဘံၩချိၬဖျီၩ့အၥိၭဂီၩ့ ဂဲၫထီၩ့လၧ ခးပယၩ့ဖၧၩ့ ကဆံၭကဆံၭနီၪလီၫႉ ဖျိၩ့ဆၨၩၥံၪ ၥုၭအီၪအၥၭနီၪ ပကဒၪဘၪ ဂံၪ့ဒီၪ့ (၃) ဒီၪ့ နီၪလီၫႉ
အဆိၪထုၬ ဂံၪ့ဒီၪ့ (၃၃) ဒီၪ့မွဲဝ့ၫ ဖျိၩ့ဆၨၩနီၪ အီၪဂဲၫလၧ ခးတရူၭ ဂဲၫဖိၬထူၭလၩ့ မဲခီၫဘံၩချိၬဖျီၩ့တၭ ထီၩ့လၧ ၥဲၫ့ထံၫခးႇ လီၩထံၫခးႇ ခးကၫ့ဘီၩဒံၩယၩဒဲ ခးဘံၫယဲၭနၫ့ၥံၪနီၪလီၫႉ လၧခဲၫ့ ဂံၪ့ဒီၪ့ (၃၃) ဒီၪ့မွဲဝ့ၫ ဖျိၩ့ဆၨၩၥံၪနီၪ ခီၫလၧခးတရူၭ ဂဲၫဖိၬထူၭလၩ့ ရွ့ၫလံၫထံၫချိၬဂုၭဒၩကဆၫ့ အ့ၩယၫဝတံၫ ဘံၩချိၬဖျီၩ့တၭ ဂဲၫထီၩ့လၧ ခးပယၩ့ဖၧၩ့ယီၩနီၪလီၫႉ လၧခဲၫ့ထုၬ ဂံၪ့ဒီၪ့ (၃၃) ဒီၪ့နီၪ ဂဲၫဖိၬထူၭလၩ့ ၥၫ့လွ့ၫဘံၩချိၬဖျီၩ့တၭ မွဲဂဲၫထီၩ့လၧ ခးပယၩ့ဆ့နီၪလီၫႉ
လၧရွ့ၫလံၫဘံၩကဆၫ့ အ့ၫယၫဝတံၫဘံၩချိၬဖျီၩ့ ဂဲၫလၩ့ဝ့ၫဒၪ ဖျိၩ့ဆၨၩၥံၪနီၪ ရွ့ၫလံၫဘံၩဒဲ အ့ၫယၫဝတံၫဘံၩ ဘၪဆုးဆ့ၭလိၬၥၭအလးနီၪ အီၪအၪ့မၩအၪ့ဖံၭအၪ့တၭ ၥုၪ့ထၪ့ ဝံးကဝံးနီၪလီၫႉ ၦဖျိၩ့ခိၪနါဒိၪ ဖူၫခဲဝၩ ဖိၬလိၬထၪ့ထၬဝံးနီၪ ဖျိၩ့ၥံၪကိၭလၧ ခဲဝၩဝံးနီၪလီၫႉ ခဲဝၩဝံးနီၪ ၥဲၫ့ဆၨၩဆၬၥံၪကိၭလၧ တူၩကီၩ ဝံး (လၧၥဲၫ့အလၨဆၧချဲၩ့အဖၧၩ့ အခီၫပယီၫအီၪဝ့ၫဒၪ ဆၧအၪ့ဎွ့ၩအၪ့ဆၫကျိၪ ထံၫချိၬနဲၩ့ဒဲ ဒီၩ့ဝိၩၥံၪကိၭလၧ တကီၩ့ဝံးနီၪလီၫႉ
ဖျိၩ့ဆၨၩၥံၪနီၪ ဂဲၫထီၩ့လၧ ခးပယၩ့ဖၧၩ့ယီၩ ၃ဘျၩ့အကၠီၩ့ ပၥ့ၪယၫဘၪနီၪလီၫႉ အဆိၪထုၬကဘျၩ့နီၪ မွဲ ဘံၫစံၫ ၁၁၂၅နံၪ့ ႇ နံၫဘျၩ့လဘျၩ့နီၪမွဲ ဘံၫစံၫ (၇၁၂) နံၪ့ ဒဲ လၧခဲၫ့ထုၬကဘျၩ့နီၪ ဘံၫစံၫ (၇၃၉) နံၪ့နီၪလီၫႉ အထီဘဲၫယီၩ ပအၪ့န့ထၬ ပဖျိၩ့ဆၨၩအနံၪ့နီၪ မွဲၦဖျိၩ့ဆၨၩဖိၪၥံၪဂဲၫထီၩ့လၧ ခးပယၩ့ဖၧၩ့ လၧခဲၫ့ထုၬကဘျၩ့မွဲဝ့ၫ ဘံၫစံၫ ၇၃၉ နီၪ ပဝံထဲးဎုၬလၧ ဎရံၬအနံၪ့စွါဘဲၫ ကပၥ့ၪယၫဘၪ ၦဖျိၩ့အနံၪ့နီၪလီၫႉ
