ၦဖျိၩ့ၡါဖိၪ နးနီၩ့ခၫရံၫဒဲ မၩ့ၥူၫခနူၬ (၃)

စၥူၫခနူၬဒဲ လမၠါ လ့ၩထီၩ့လၧ လံၩထံၭမၫဆမံၭအနိၭဖဲၩ့အခၫ ဒၪဘၪ ၡီၩ့ဒိၪနီၪ ၡီၩ့ဖိၪၥံၪဝၩ့ဖီၩ့ထၬဂီၩ့ ကွ့ၩၥဲၫကၠၭထံၫ မုၬမုၬလၩလၩနီၪလီၫႉ ကထံၪဎး ထိၪဖချီးဖၭဒိၪကဘံၪ့ ဂဲၫယူၩလၩ့လၧ ကမၫဖၧၩ့နီၪဂီၩ့ ကထဲၩ့အဲၪ့ဆိၬန့ ၡီၩ့ဖိၪအထီနီၪ စဎွၩဖိၪၥူၫခနူၬ ခၬလၧဖျါတၭ ထိၪဖချီးနီၪ လၩ့ထ့ၬလၬလၧ ထံၫကျၩနီၪလီၫႉ ဆၧအဂဲးအဖးနီၪ ၡီၩ့ဒိၪဒဲ ၡီၩ့ဖိၪၥံၪဒၪကကၠၪ ဂဲၫထဲၩ့ထၪ့လၧ ခီၫၥွံၪခိၪဂီၩ့ ခိးတၩထၪ့ စဎွၩဖိၪအကၠီၩ့ ကဖ့ၪလၫ့အ့ၪဝ့ၫ စ့ၩၥံၪထီၪ့ၥံၪနီၪလီၫႉ  လၧခဲၫ့ စဎွၩဖိၪစံၭဆၧၫ့ထဲၩ့ ယမိမၩစ့ၩၥံၪထီၪ့ၥံၪအ့ၬ ယမိထဲၩ့အၪ့လံၩ့န့ ၡီၩ့ခဲၩ့ခၫ့နးဖျၭနီၪလီၫႉ ကထံၪဎး ၡီၩ့ဒိၪနီၪ ဖ့ၪလၫ့အ့ၪ ၡီၩ့ခဲၩ့ခၫ့ဂီၩ့ စဎွၩဖိၪဒဲ လမၠါ အၥိၭနံၫဂၩယီၩ ဂဲၫထဲၩ့ထဲၩ့လၧ ပုၭတလုၭ ကမၫနီၪလီၫႉ

ဂဲၫထဲၩ့ကၠၭထီၩ့လၧ ပုၭတလုၭကမၫအခၫ စဎွၩနီၪစံၭလမၠါ ၡီၩ့ခဲၩ့ခၫ့နီၪ န့ယူၭ အီၪဒၪမွဲ ပကဘၪဖီၪ့ ၦနွ့ၫမုၪလီၫ လမၠါဧ့ လ့ၩလၧကမၫအိၩဂီၩ့ လ့ၩဖီၪ့ၦနွ့ၫမုၪၥံၪအီႉ လမၠါနးဆ့ ဘဲၫစဎွၩအၪ့မၧၫ့အၥိၭ အ့ၪန့ထၪ့ ၡီၩ့ခဲၩ့ခၫ့ဂီၩ့ လ့ၩလၧ ပုၭတလုၭကမၫအီၪနီၪလီၫႉ လမၠါနီၪ ထီၩ့လၧကမၫနဲၩ့အခၫ အီၪဂူၪအၥၭဂီၩ့ အီၪခိၬယိဝ့ၫလၧ ၦနွ့ၫမုၪၥံၪကဂဲၫအၪ့လုထံၫနီၪလီၫႉ ၦနွ့ၫမုၪၥံၪနးဆ့ ကကွ့ၩၥဲၫထံၫအခံၫ့ထီၩ့အခၫ ဂဲၫယူၩလၩ့လၧ ကမၫဖၧၩ့ဂီၩ့ ကွ့ၭၥဲၫကၠၭထံၫ မုၬမုၬလၩလၩနီၪလီၫႉ ကထံၪဎး လမၠါနီၪ ခွံၬစိၩၡီၩ့ခဲၩ့ခၫ့လၧ ၦနွ့ၫမုၪၥံၪအီၪနီၪတၭ လ့ၩဘၪဝ့ၫလၧ အမံၩ့မွဲဝ့ၫ နးနီၩ့ခၫရံၫ ဖိၪမုၪဒၪဘၨၩနီၪလီၫႉ နးနီၩ့ခၫရံၩ ကိၭၡၭအလူအခၫ အဝဲမုၪၥံၪမွဲ ၡးဖျးဘိၭ ထဲၩ့ယူၩလၫ့ဝ့ၫထီးအလူၬလီၫႉ

လၧခဲၫ့ လမၠါနီၪ ကွဲၪလၩ့ နးနီၩ့ခၫရံၫလၧ ၡီၩ့ခဲၩ့ခၫ့လီၩ့ ဎ့ၬဎ့ၬဖိၪဂီၩ့ ထဲၩ့န့အ့ၪစဎွၩဖိၪ စၥူၫခနူၬနီၪလီၫႉ စဎွၩဖိၪဒဲ နးဎွၩမုၪယီၩ ဒၪလိၬၥၭအခၫ လၧခီၩခီၩအိၩအဝ့ၫၥံၪအဆၧဘိၪ့အီၪထၬအၥိၭ ကဂၩဒဲကဂၩ ဆၧအဲၪဖျုၩကဲၪထၪ့နီၪလီၫႉ ထီးလၧခဲၫ့ကနံၩအခၫ စဎွၩဖိၪ စၥူၫခနူၬဒဲ နးဎွၩမုၪ နးနီၩ့ခၫရံၫယီၩ ကထဲၩ့လၧအမိအဖါအီၪအဂး လီၩထးအ့ၪလမၠါဂီၩ့ ဆုးထဲၩ့ဝ့ၫဒၪလၧ ခးအယုဒယၭနီၪလီၫႉ