ခးပယၩ့ၥၭဘၪ့မုၪနံၫဂၩ ကဲၪထၪ့ဆူၫဝၫ့မံၭထၭမုၪအဂဲး

ခးပယၩ့ ၥၭဘၪ့မုၪနံၫဂၩနီၪ ကဲၪထၪ့ဘၪ ဆူၫဝၫ့မံၭထၭမုၪအဂဲး ပၥ့ၪယၫဘၪနီၪလီၫႉ အဝ့ၫၥံၪကဲၪထၪ့ဘၪ ဆူၫဝၫ့မံၭထၭမုၪယီၩနီၪ မွဲလၧခးပယၩ့အဂး ဆၧလၩဆၧဖၩ့ကမံၩ့နီၪလီၫႉ အဝ့ၫၥံၪယီၩကဲၪထၪ့ဘၪ မံၭထၭမုၪလၧ ကဆါဎြံၬအလၩအဖၩ့ အၪ့လဲၩထၪ့ၥၭဘိၪ့မုနံၩနီၪလီၫႉ အဝ့ၫၥံၪဒိၭန့ မံၭထၭမုၪအဆၧကဲၪအလးနီၪ မွဲလၧ ဝံးတခိၩ့ စံၫ့ပံတၧၫ့ စံၫ့ပီၩ ၥရိၬလးဝၩ့ဖၧၩ့ နီၪလီၫႉ မုနံၩမုၥၫ့နီၪဘိၭ မွဲဝ့ၫလၧ ၂၀၂၅နံၪ့ႇ လၩအီဂၧၭ၆ၥၫ့ႇ လဂီၩ ၁၀နၩရံၫအခံၫ့နီၪလီၫႉၦလၧအလ့ၩခိၪလ့ၩနါမံဆၩဆၧလုထၪ့နီၪမွဲလၧ ၥၫ့ခိၪဒိၪ Bishop Noel Saw Naw Aye နီၪလီၫႉ

လၧမံဆၩဆၧလုထၪ့အဖၧၩ့ ၥၫ့ခိၪဒိၪ Bp.Mauriceညွန့်ဝေ လီၩလၩ့လၬလၩ့ဝ့ၫဒၪ “အဝ့ၫၥံၪယီၩမွဲလၧ အၥၭဖၧၩ့ဂ့ၩဘွၩဝ့ၫဒၪအကၠီၩ့ လၧအဖၧၩ့ဖၧၩ့ အဆၧဂ့ၩဆၧဘွၩနီၪ မၩဎံၫ လၩထၪ့အဝ့ၫၥံၪယူၭနီၪလီၫႉ မွဲအဝ့ၫၥံၪ အဆၧၥိၭဆၧကီၩ့လဖၪ မၩဎံၫလၩထၪ့အဝ့ၫၥံၪနီၪအ့ၬႉ အဝ့ၫၥံၪအဆၧဖ့ၪလၫ့လၩ့ၥၭနီၪ မၩဎံၫလၩထၪ့အဝ့ၫၥံၪ မၩမုၬလၩထၪ့အဝ့ၫၥံၪနီၪလီၫႉ နၥံၪအ့ၪ မွဲကအီၪလၩ့ဘူၭလၧယွၩကဆံၭ နၥံၪကဂဲၫဎံၫလၩထၪ့ကဆံၭနီၪလီၫႉ”

ၦလၧအကဲၪထၪ့ဘၪ မံၭထၭမုၪနံၫဂၩယီၩနီၪ မွဲလၧ Sr. Maria Louise Moe Thitza Oo ဒဲ Sr. Maria Vincentia Naw Ni Ni Aung ၥံၪနီၪလီၫႉ

Sr. Maria Louise Moe Thitza Oo နီၪ အီၪဖျဲၪထၪ့လၧ ၂၀၀၃နံၪ့ လၩ September 20ၥၫ့နီၪလီၫႉ အဝ့ၫယီၩအီၪဖျဲၪထၪ့အလးနီၪ မွဲလၧ Pyay ဆၧအီၪကီၪ့ ဒန့်သလွန်တဝၫ့နီၪလီၫႉ အထၧၫ့ဖုဝဲအီၪနံၫဂၩအကျၩ အဝ့ၫအယီၩအဎိၩထုၬနီၪလီၫႉ အဝ့ၫယီၩ လ့ၩနုၬလၩ့စိၩလၧ ဆူၫဝၫ့ Charity မံၭထၭမုၪခရၧၫ့ဖၧၩ့နီၪ မွဲလၧ ၂၀၁၉နံၪ့ လၩယူၫ၁၂ၥၫ့ဒၪအိၩ နီၪလီၫႉ

Sr. Maria Vincentia Naw Ni Ni Aung နီၪ အီၪဂဲၫဝ့ၫဒၪလၧ တောင်ငူဆၧအီၪကီၪ့ တောင်ပင်လယ် တဝၫ့ႇ ၦဖျိၩ့ဆၨၩခးဒီၪ့အဖၧၩ့နီၪလီၫႉ အထၧၫ့ဖုဝဲအီၪ ၇ဂၩအကျၩ အဝ့ၫယီၩ မွဲအဆံၭထုၬနီၪလီၫႉ ၂၀၁၉နံၪ့ လၩမၫၡါ ၁၅ၥၫ့ဒၪအိၩ အဝ့ၫယီၩဂဲၫနုၬလၩ့စိၩလၧ ဆူၫဝၫ့ Charity မံၭထၭမုၪခရၧၫ့ဖၧၩ့ယီၩနီၪလီၫႉ The Sisters of Charity of St. Vincent de Paul မံၭထၭမုၪခရၧၫ့ယီၩနီၪ လၧအဖီၩ့ခွံၬ ၁၈၁၄နံၪ့အထီဒၪအိၩ အီၪဂဲၫကဲၪထၪ့လၧ ခးGermany, Paderborn နီၪဂီၩ့ ၁၉၆၅နံၪ့နီၪ လ့ၩထီၩ့ဝ့ၫဒၪလၧ ခးKorea နီၪလီၫႉ

ဂီၩ့၂၀၀၆နံၪ့အခံၫ့အိၩ ဂဲၫထီၩ့စိၩဝ့ၫဒၪလၧ ခးပယၩ့ဖၧၩ့ယီၩနီၪလီၫႉ အဝ့ၫၥံၪ အခရၧၫ့ ဆၧဖံၭဆၧမၩနီၪ မွဲလၧ လီၩ့ယိထဲၩ့ခွါထဲၩ့ ၦၡၪ့ၦယၬဖိၪၥံၪႇ ၦလဆီၪ့ချဲၫ့ဘၪၥံၪ ဒဲ ၦလၧလိၪ ဘၪ ဆၧမၩဆၧၩ့လဖၪၥံၪ နီၪလီၫႉ အဝ့ၫၥံၪအခရၧၫ့ဆၧထိထီၫနီၪဘိၭ “ၦၡၪ့ၦယၬဖိၪၥံၪနီၪ မွဲဝ့ၫ ၦဆရၫဒဲ ပကဆါ” နီၪလီၫႉ