ၦဖျိၩ့ၡါဖိၪ နးနီၩ့ခၫရံၫဒဲ မၩ့ၥူၫခနူၬ (၁)

လၧခးပယၩ့ ခးစၧၩ့ကီၪ့ႇ ကယၩဆၨၩခးဒီၪ့အဖၧၩ့ ဝံးလွဲၫ့ကီၫအနဲၩ့နီၪ ပကိၭဝ့ၫလၧ ဝံးစ့ၩခိၪလီၩ့ (ငွေတောင်မြို့) ဝံးဖိၪအီၪကဝံးနီၪလီၫႉ ဘၪထွ့ၫလၧ ဝံးဖိၪယီၩအဂဲးနီၪ ၦထၧၫ့ဖုဝဲဖျိၩ့ဆၨၩ ကယၩဆၨၩဖိၪၥံၪလဖၪ လီၩယံၫယါၡါဖိၪ ဘဲၫယီၩၥိၭလီၫႉ

လၧဖျိၩ့ဖျိၩ့အိၩ အယုဒယၭခးဒီၪ့နီၪ စဎွၩဒိၪလဂၩ ပၧၩ့ဆၧနီၪလီၫႉ ကနံၩနီၪ စဎွၩဒိၪယီၩ အနးဎွၩမုၪနီၪ အီၪဖျဲၪန့ ဖိၪခွၫလဂၩတၭ စဎွၩဒိၪနီၪအၥၭဎွံၪ ကိၭစူၭကီၪ့ထၪ့ လၧနီးဖၧၩ့ ပကိၪ့ၥ့ၪၥံၪလဖၪဂီၩ့ အၪ့မၧၫ့ကိၭအ့ၪအဝ့ၫအဖိၪခွၫအမံၩ့နီၪလီၫႉ ၦကိၪ့ၥ့ၪၥံၪလဖၪ ယိဖိၪၥၪဆံၭယီၩ အဆၧဘိၪ့ဂီၩ့ ဖ့ၪလၫ့အ့ၪဝ့ၫအမံၩ့လၧ စၥူၫခနူၬ နီၪလီၫႉ

စဎွၩဖိၪယီၩ ဂဲၫဎိၩလၫ့အခၫ လ့ၩမၩလိၪ ဆၧကိၪ့ ဘၪကိၪ့ၥ့ၪလၧ တက္ကသိုလ် ခးဒီၪ့ လၧစဎွၩၥံၪကြၨၭၥ့ၪထၬ ဆၧကိၪ့ၥ့ၪလဖၪနီၪလီၫႉ စဎွၩဖိၪမၩလိၪ ဆၧကိၪ့ၥ့ၪလဖၪ အခံၫ့ထၪ့ ဘၭၥၧၫ့နံၪ့အခၫ ကလိၬထၪ့ အဆရၫဂီၩ့ ဂဲၫထဲၩ့ထဲၩ့လၧ ခးအယုဒယၭနီၪလီၫႉ စဎွၩဖိၪလဂၩ ဂဲၫထဲၩ့လၧဖၧၩ့ၥၭအထီ ဆၧပွံၭအၥၭတၭ အီၪပွံၭလၧ ခိၪလီၩ့ဒၩ့ခိၪကဒုၩနီၪ လၧဆၧလၩ့ဆၫ့အဖၧၩ့ ဒၪဘၪ ၦနွ့ၫမုၪ (၇) ဂၩနီၪ ဂဲၫယူၩလၩ့ဘဲၫ ထိၪၥနူၬဂီၩ့ ဆုးလၩ့ကၠၭလၧ ကမၫ ကကမၫဖၧၩ့နီၪလီၫႉ ၦနွ့ၫမုၪၥံၪနီၪ ဎံၪလၩ့ဝ့ၫ ဘဲၫဖီၫတကီၩအၥိၭ ကွ့ၩၥဲၪကၠၭထံၫလၧ ကမၫဖၧၩ့နီၪတၭ အခံၫ့ထၪ့ ဘၭအခၫ ၥိၭကီၩ့လၫ့ထဲၩ့ အဆၧကီၩ့ဆၧၥိၭဂီၩ့ ထဲၩ့ယူၩလၫ့ထဲၩ့နီၪလီၫႉ