ၥၫ့ခိၪဒိၪ ဂၠိၫမၩ့ဆံၫ့ဎံၪ ၥံၫဖီၩ့ခွံၬ ထၪ့ဘၭ လံနံၪ့ ဆၧနၪ့ထၪ့

နံၪ့၂၀၂၅နံၪ့ လၩယူၫလဲၫ့ ၂၂ၥၫ့လဂီၩ ၆နၩရံၫအခံၫ့နီၪ ၦၡၩနၪ့ထၪ့အၪ့ကံၩ့ဘၩဆိၪဖၪအ့ၪ ဒိၩ့ပၥံၫ့ဆၧအီၪကီၪ့ၥၫ့ခိၪဒိၪ ဂၠိၫမၩ့ဆံၫ့ဎံၪ ၥံၫဖီၩ့ခွံၬထၪ့ဘၭ ၄နံၪ့ဆၧနၪ့ထၪ့နီၪလီၫႉ

ဆၧနၪ့ထၪ့ယီၩနီၪ မၩဝ့ၫဒၪလၧ ဒိၩ့ပၥံၫ့ဆၧအီၪကီၪ့ ဒိၩ့ပၥံၫ့ဝံးဖၧၩ့ စံၫ့ပံတၧၫကၥံၪဒရဲၫ ၥရိၬလးဝၩ့ဖၧၩ့နီၪလီၫႉ ၦလၧအလ့ၩခိၪလ့ၩနါ မံဆၩဆၧလုထၪ့နီၪ မွဲဝ့ၫဒၪလၧ ဒိၩ့ပၥံၫ့ဆၧအီၪ ကီၪ့ ၥၫ့ခိၪဒိၪ Henry မၩ့အဲၪချံၫ့နီၪလီၫႉ

လၧမံဆၩဆၧလုထၪ့ဖၧၩ့ “ၥၫ့ခိၪဒိၪ ဂၠိၫမၩ့ဆံၫ့ဎံၫယီၩ လၧချူၭၥံၫဒံၭဘၪကနံၩနီၪ လခဲၫ့ ကနံၩအဂး အဝ့ၫကမိလီၩလၩ့လၬလၩ့ဆၧၥၭထိၬပရၧၫ့လဖၪ အဝ့ၫယီၩအီၪတဲၩ့ဝဲၩထၬဝ့ၫဒံၭ နီၪလီၫႉ လါနၫ့အဝ့ၫလီၩလၩ့လၬလၩ့ဘၪဝ့ၫလၧၩ့အ့ၬႉ အဝ့ၫအမူၩဒၩ လၧၫ့ဎွ့ၩယူၭအကၠီၩ့ ကဆါယွၩ ထဲၩ့ကိၭထဲၩ့အဝ့ၫလၧ 2021နံၪ့ လၩယူၫလဲၫ့၂၂ၥၫ့ လဂီၩ၆နၩရံၫအခံၫ့နီၪလီၫႉ အဝ့ၫ ယီၩ ဂဲၫထဲၩ့ယိထဲၩ့ခွါထဲၩ့ အၥိၪဖိၪလဖၪ ဘဲၫၦယူၬၥိၪကဂၩအၥိၭ ၁၈နံၪ့နီၪလီၫႉ အဝ့ၫယီၩ ထၧၩ့ၥံၫကကၠၪ ဂဲၫထဲၩ့လ့ၩခိၪလ့ၩနါ ဒိၩ့ပၥံၫ့ဆၧအီၪကီၪ့ထၧၫ့ဘံၪ့ယၫယီၩနီၪလီၫႉ

 အဝ့ၫဂဲၫထဲၩ့ စၭထၪ့ထၬ လၧအိၫလဲၩ့ဖၫ့ခိၪ ဆၧရၩလၩ့မံဆၩဆၧလုထၪ့နီၪ ခီၩ့နးမုၪယီၩ ကကၠၪ OSC Pathein ဆုးထဲၩ့မၩဝ့ၫဘိၩ့ဒံၭနီၪလီၫႉ အဝ့ၫအီၪက့ၪထးအ့ၪပၧၩ ဆၧန့ၥၫႇ ဆၧ ဆီၪ့မီၫ့ဆီၪ့မၬ ဒဲ ဆၧအီၪက့ၪၥုၪ့အီၪက့ၪၥၭလဖၪအဂး ကနံၩယီၩ ပကဝဲထၪ့ ADGENTES Studioဆ့နီၪလီၫႉ ADGENTES အခီၫပယီၫနီၪ မွဲဝ့ၫ “လၧၡၩခမျၧး လူမျိုးတကာသို့” နီၪလီၫႉ ဆၧထံၭလၩ့လူ လးယီၩနီၪ မွဲလၧၥၫ့ခိၪဒိၪဂၠိၫမၩ့ဆံၫ့ဎံၪ အီၪက့ၪထးအ့ၪပၧၩ ဆၧန့ၥၫနီၪလီၫႉ ဆၧနီၪအကၠီၩ့ ကနံၩယီၩ အကၧၩ့ဒိၪထုၬ ပကနၪ့ထၪ့အၪ့ကံၩ့ဘၩဆိၪဖၪအ့ၪ အဝ့ၫအဂး ဒိၪဒိၪဒ့ၭ လါဆံၭႉ” အဂဲး ၥၫ့ခိၪဒိၪHenry မၩ့အဲၪချံၫ့ လီၩလၩ့လၬလၩ့ဝ့ၫ ဘဲၫနီၪအၥိၭနီၪလီၫႉ

လကၭဘၪ မံဆၩဆၧလုထၪ့ လချူၭဂီၩ့ဒံၭဘၪနီၪ ၥၫ့ခိၪဒိၪ ဆိၪဂ့ၩဆိၪဘွၩ မၩဆံၫ့ဎံၪ ထၪ့ ADGENTES လံၬဘိၭပၪနီၪဂီၩ့ မွန်ဆီညှော်ပီအူးမန်းဝင်းသန်း ဒဲ ဖာသာရ်အိုင်စီဒို ၥံၪ ဖီလၩ့ဘၪ ဘၪထွ့ၫလၧ ADGENTES အဂဲးအဖးလဖၪနီၪလီၫႉ ဂီၩ့နီၪ ဖာသာရ်ရာဖာအဲလ် ဘုန်းနိုင်ဦး လ့ၩလီၩ့မၩဆံၫ့ဎံၪ ADGENTES Studio လၧ ထံၫဆံၫ့ဎံၪအဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ

နးအဲၪဖီၫဘွၩ