နကရွံထၪ့ မနီၫလဲၪ

လၧဂၪ့ခိၪယီၩ ဆၧဒၪဆၧအဂ့ၩဒဲ ဆၧလီၩ့ဒၪဆၧအအၧၩ့ အီၪဝ့ၫနံၫမံၩ့လီၫႉ ဆၧဒၪဆၧအဂ့ၩနီၪ ၦကိၭဂၩအီၪက့ၪအၥုၪ့ အၥၭလအီၪဘၪနးဆ့ ဆၧဒၪဆၧအအၧၩ့ယီၩ မွဲမိအီၪလၧၦၡၩၥံၪအီၪကိၭဂၩဒ့ၭလီၫႉ ပဒၪဆၧအဂ့ၩကန့အဂးနီၪ နၫ့ဆါခိၪနူၬဆၧကိၪ့ဘၪကိၪ့ၥ့ၪဂ့ၩမၬ ကဒၪဝ့ၫၥ့ၪလီၫႉ အ့ၪမွဲ ဆၧကိၪ့ဘၪကိၪ့ၥ့ၪၡၩနီၪ ပဒၪဆၧအဂ့ၩကန့အဂး မွဲကယီၫအ့ၬလီၫႉ

လၧဖျိၩ့ဖျိၩ့အိၩ စဎွၩကဂၩနီၪ ပကိၪ့လိၬဆၧကဂၩနီၪ ဒၪဆၧအဂ့ၩၥ့ၪအၪမၬဒ့ၭ အဆၧကိၪ့ဘၪကိၪ့ၥ့ၪအီၪလီၫႉ စဎွၩအ့ၪမွဲအၪ့ကံၩ့ဆၧကိၪ့ဆၧတဲၩ့ကိၭကၠၪနီၪ ချဲၩ့လၩ့ဎိၭဖ့ၪကိၪ့ဝ့ၫမွဲ အဂ့ၩကကဲၩ့ခီၫလီၫႉ အနီၪဘိၭ ဆၧအဂဲးအၪဒၪဆၧနီၪ မၩဆၧၩ့ဝ့ၫန့လၧ ဆၧမုၬလၩၥၭဎွံၫအဖၧၩ့လီၫႉ ကနံၩနီၪတၭ စဎွၩဖၭဒိၪ အစူၪမုနီၪ ဝံၩအဖံၫလီၫႉ စဎွၩယီၩ ကိၭအပကိၪ့လိၬဆၧနီၪဂီၩ့ ချဲၩ့ဎိၭလၩ့အခၫ ပကိၪ့လိၬဆၧယီၩ စံၭဆၧထဲၩ့ ၥၭခိဆၧနးမံၩ့လဂ့ၩ စဎွၩဧ့ နဂုၪၥံၪ့ဎွံၪ အီၩၥံၪ့ဎွံၪဂီၩ့ ကဘျၪထဲၩ့လီၫႉ ဂဲၫကဲၪထၪ့ဝ့ၫဒၪလၧအဂ့ၩလီၫ ကဆါဧ့ အကၠီၩ့ စံၭဆၧၫ့ထဲၩ့ဝ့ၫဘဲၫယီၩၥိၭလီၫႉ လၧခဲၫ့ စဎွၩအစူၪမုယီၩ ဘျၪအ့ၬဂီၩ့ ဘၪဖ့ၬထ့ၬဝ့ၫဒၪတၭ စဎွၩယီၩ အစူၪမု အီၪလၧၩ့အ့ၬလၥၨၩႉ အနီၭဘိၭ စဎွၩနးဆ့ အၥၭမုၬအ့ၬ ဘဲၫအၥၭကမုၬထၪ့အဂး ကိၭပကိၪ့လိၬဆၧနီၪအခၫ ပကိၪ့လိၬဆၧနီၪ စံၭဒီၭ ဂဲၫကဲၪထၪ့လၧအဂ့ၩလီၫစဎွၩဧ့ တၭ စဎွၩယီၩၥၭထၪ့ ကဲ ပကိၪ့လိၬဆၧဧ့ လ့ၩအီၪလၧ ဒူၭစၧၩ့ထၬအိၩ နးဖျါ ၥိၪ့ဝ့ၫလၧ ဒူၭစၧၩ့ထၬဖၧၩ့နီၪလီၫႉ

ကနံၩနီၪတၭ စဎွၩယီၩ ဘဲၫအၥုၪ့အၥၭကမုၬထၪ့အဂး လ့ၩစဲၪ့ထၪ့လၧ ၡိၬကျၩလီၫႉ စဎွၩလၧအၥုၪ့အၥၭလမုၬဘၪယီၩ ဒၪလၧအထံၫအဖျဲၥံၪလၧၩ့အ့ၬဂီၩ့ ဆၧထဲၩ့ဖီၪ့ထၬအဝ့ၫလၧကလုထၪ့ဆၧအဂးလီၫႉ စဎွၩနးဆ့ အစူၪဝံၩလၫ့ အဆၧဘိၪ့လၩ့ၡၩ အယီၩကဘၪထိးၥံၫအၥၭ အၥၭမုၬအ့ၬလၧၩ့ၥၨၩႉ လၧခဲၫ့ ကလုထၪ့ဆၧအဂး ဒုၭအၪ့လုဝ့ၫထံၫႇ ဂုၪအ့ၪဝ့ၫဆၧနၧၩ့မၧၫ့နၧၫ့ကၠၪအခံၫ့နီၪ ဒၪဝ့ၫစဎွၩယီၩ အစူၪမုအီၪအ့ၬတၭ အစူၪအခၪ့ကိၭအ့ၬ လုထၪ့ဝ့ၫန့အ့ၬဘိၭ ဖျါလၩ့ထဲၩ့စဎွၩနီၪလီၫႉ

ဝ့ၩ ဂဲၫကဲၪထၪ့လၧအဂ့ၩ ဂဲၫကဲၪထၪ့လၧအဂ့ၩ ကိၭၡါထၪ့အလူဂီၩ့ ဂဲၫထဲၩ့လၧနီးဖၧၩ့လၧ ဆၧမုၬလၩၥၭဎွံၫအဖၧၩ့ နီၪလီၫႉ ဂဲၫထဲၩ့ထီၩ့လၧနီးဖၧၩ့ ကထုၪ့ဎး အၪ့မၧၫ့ၦၡၩဖျါလၩ့ ပကိၪ့လိၬဆၧနီၪ အၪ့မၧၫ့ဝ့ၫဂဲၫဒၪအဝ့ၫလီၫႉ ပကိၪ့လိၬဆၧယီၩဂဲၫထီၩ့အခၫ စဎွၩအၪ့ယၫထဲၩ့လၥၨၩႉ လါနၫ့စံၭဆၧၫ့ထဲၩ့စဎွၩ စဎွၩဧ့ နဘၪအၪ့ယၫယၧၩလိၫအ့ၬ အ့ၪမွဲနၥၭထၪ့ယၧၩအ့ၬ နလ့ၩကိၭန့ထဲးယၧၩစွါဘဲၫ အခံၫ့ပယီၩ ယကၥံၫယူၭ နီၪလီၫႉ