ခးပယၩ့ထၧၫ့ဘံၪ့ယၫယူၩဘလံၫ

နံၪ့၂၀၂၅နံၪ့ လၩမ့ၫ၂၂ၥၫ့ လဂၫလၩ့ ၅နၩရံၫအခံၫ့နီၪ ၦၡၩမၩလၩမၩဖၩ့ ခးပယၩ့ထၧၫ့ဘံၪ့ ယၫ ယူၩဘလံၫ လၧဝံးတခိၩ့ စံၫ့မ့ၫရံၫကၥံၫဒရဲၫၥရိၬလးဝၩ့ဖၧၩ့နီၪလီၫႉ

ၦလၧအလ့ၩခိၪလ့ၩနါ မံဆၩဆၧလုထၪ့နီၪ မွဲလၧကၫဒံၫနဲၪခၠၩစဘိၫဂီၩ့ လၧခးပယၩ့ဖၧၩ့ ကၫတိၫလံၬဆၧအီၪကီၪ့အဒီၪ့ ၁၇ဒီၪ့ဖၧၩ့ ၥၫ့ခိၪဒိၪထီးလူၬဂဲၫထၪ့ဝ့ၫဒၪ ၂၂ဂၩနီၪလီၫႉ အဆိၪထုၬ ကၫဒံၫနဲၫႇ ၥၫ့ခိၪဒိၪလဖၪဒဲ မွန်ဆီညှော်နီၪ အီၪဂဲၫနုၬလၩ့စိၩၥရိၬဖၧၩ့ လၧယူၩဘလံၫတရၫ့ အဖိးနီၪလီၫႉ

ဂီၩ့နီၪ လၧမံဆၩဆၧလုထၪ့ဖၧၩ့ ကၫဒံၫနဲၫလီၩဝ့ၫဒၪ “မွဲလၧထံၫဂဲးခးဂဲးလမုၬဘၪအကၠီၩ့ မုကနံၩယီၩ ပမၩလၩမၩဖၩ့ ခးပယၩ့ထၧၫ့ဘံၪ့ယၫယူၩဘလံၫအခံၫ့ ၥၫ့ခိၪဒိၪထီးလူၬဂဲၫ လန့ ဘၪဂီၩ့ ဂဲၫထၪ့ဝ့ၫန့အီၪဒၪ ဆၧအီၪကီၪ့၁၇ဒီၪ့ဖၧၩ့ ၥၫ့ခိၪဒိၪ၂၂ဂၩနီၪလီၫႉ ကနံၩယီၩနီၪမွဲလၧ ကိၪဘိၪ့ဆံၫ့ဎံၪအဘိၪ့မုနံၩနီၪလီၫႉ ဆၧနီၪအကၠီၩ့ ပကအၪ့ကံၩ့ဘၩဆိၪဖၪအ့ၪ ခးပယၩ့ဆၧဎူၫ ဆၧဎၩ့ကန့ထၪ့အဂးဒဲ ဂၪ့ခိၪထၧၫ့ဘံၪ့ယၫအဂးလါဆံၭႉ”

လကၭဘၪမွန်ဆီညှော်အန်ဒရီးယားဖာရန်းတေနးဆ့လီၩလၩ့လါလၩ့ဆၧၥၭထိၬပရၧၫ့ ဘဲၫယီၩအၥိၭဒံၭလီၫႉ “ပနၪ့ထၪ့ဘၪ ၥၫ့ဎွၩဒိၪဖရၫ့စံနီၪလီၫႉ လၧ၂၀၂၄နံၪ့ လၩဒံၫစဲၩ့ဘၧၫ ဎြံၬအီၪ ဖျဲၪအခံၫ့အိၩ အဝ့ၫဂဲၫထဲၩ့ဖျိၬလိၬထၬအ့ၪပၧၩ ယူၩဘလံၫအနံၪ့ယီၩနီၪလီၫႉ ပယိလါမွဲအဝ့ၫ အၥၭကဂၭဂီၩ့လၧပၧၩအ့ၬႉ အဝ့ၫယီၩနီၪ မုလါဝ့ၫ ပဝ့ၫၥံၪလဖၪ ပကအီၪကီၪ့လၩ့ဎိၭလိၬၥၭ လၧကဆါယွၩအဂးနီၪလီၫႉ”

လကၭဘၪ ၥၫ့ခိၪဒိၪFrancis Than Htunနးဆ့ လီၩလၩ့လါလၩ့ဝ့ၫဒၪ “ဆၧလၧ ယူၩဘ လံၫ အဘိၪ့မုနံၩနီၪ မွဲပမၩမုၪမၩလၩဆၧအ့ၬႉ အနီၪၦၡၩၥ့ၪယၫအ့ၬႉ ၦၡၩစီၪဝ့ၫလၧပမၩ ယူၩဘလံၫနီၪ ပမၩမုၬမၩလၩဆၧ စီၪကၠၭဝ့ၫဘနီၪႉ အၡါမၪ ဆၧလၧယူၩဘလံၫနီၪ မွဲပဂဲၫထၪ့ ဘၩကၠဲၬဂီၩ့ ဂီၩ့အ့ၬႉ ယူၩဘလံၫယီၩဖ့ၪလၫ့ပၧၩ ဆၧချဲၩ့ၥ့ၪယၫကမံၩ့နီၪ လၧဆၧလၩ့အၪ့ ယိၫအကျၩ လၧဆၧဒုၭဆၧခၭအကျၩ ခၫ့ဖျီၪ့လၧယူၩဘလံၫယီၩ ယွၩဖ့ၪလၫ့ပၧၩ ဆၧပျီၩဖျ့ၭနီၪ လီၫႉ ပဒၪဘၪ ၦၡၩမၩလၩမၩဖၩ့ယူၩဘလံၫအခၫ အဝ့ၫၥံၪခီၫ ဘၩကၠၭကၠဲၬမုၬမုၬလၩလၩ အၪ့လၩ့ဎိၭကၠၭ မ့ၩအွံၪအွံၪဆၧၫ့ဆၧၫ့ ပၧၩခီၫပလီၩ့စဲၪ့မံၩ့ဂၭဖျိၭ လၧဆၧဒုၭဆၧခၭကျၩ လၧဆၧၩ့ကျၩ အ့ၪပကစီၪဘနီၪစွါဘဲၫ ပဝ့ၫၥံၪယီၩ ပကမွဲဒၪၦအမၩလၩမၩဖၩ့ ယူၩဘလံၫ ပျီၩပျီၩနီၪလီၫႉ ဆၧနီၪအကၠီၩ့ၥၫ့ဎွၩပရၫ့စံနီၪစံၭယံၩယါဝ့ၫဒၪ ပဝ့ၫၥံၪလဖၪယီၩ ပကဘၪၥၭမၧၫ့ လၧ ဆၧယိလါအဂဲးနီၪလီၫႉ ပဘၪဒၪဆၧၫ့ယၫလၧဆၧၡၪ့ဆၧနၭလဖၪအခၫ ပကဘၪ ၥ့ၪယၫ ထၬကမံၩ့နီၪ ကဆါယွၩနီၪ ဖ့ၪလၫ့ထၬယၧၩ ဆၧၥၭမၧၫ့အလၩ့ဆၫ့လၩ့မဲၩနဲၪ အီၪက့ၪထၬ ဆၧယိလါ ဘယီၩဂီၩ့ ပကဘၪဆုးထဲၩ့အီၪမၧၫ့ပၥၭအဂဲး ၥၫ့ဎွၩဖရၫ့စံၭယီၩ လီၩထၬဝ့ၫ အီၪနီၪလီၫႉ ဆၧနီၪအကၠီၩ့ ပကကျ့ၭစၨၭအီၪမၧၫ့ပၥၭလၧ ဆၧယိလါကိၭဂၩဒ့ၭလါဆံၭႉ ကနံၩ ယီၩ လၧဆၧကၪဆၧဂဲၩဖၧၩ့ နၥံၪဂဲၫထီၩ့စိၩလၧအလးထယီၩအကၠီၩ့ဆ့ ယစံၭခိးစံၭတၩဘၪ နၥံၪကိၭဂၩဒ့ၭနီၪလီၫႉ”

လချူၭမံဆၩဆၧလုထၪ့လစၭထၪ့ဒံၭဘၪဒဲ မံဆၩဆၧလုထၪ့ဂီၩ့ခွံၬအခၫနီၪ ၦၡၩဖ့ၪနဲၪ ထၬ ခးပယၩ့ဖၧၩ့ဆၧအီၪကီၪ့ ကဒီၪ့ဘၪကဒီၪ့ ယူၩဘလံၫအဆၧဂဲၩဝၭ ဆၧဂၩ့လဖၪဒူၭဂီၩ့ ၦၡၩလ့ၩယိထၪ့ကၠၭဒံၭနီၪလီၫႉ

နးအဲၪဖီၫဘွၩ