နံၪ့၂၀၂၅နံၪ့ လၩယူၫ၂၇ၥၫ့ လဂီၩ၇နၩရံၫအခံၫ့နီၪ ဆၧမၩလၩမၩဖၩ့ ယ့ၫၡုၬအၥၭဆံၫ့ဎံၫ ၦကကဲၪထၪ့ဘိၪ့ခိၪၥၫ့ခၫလး အနံၪ့အီၪထၪ့ဘၭ၇၈နံၪ့ ယူၩဘလံၫ မံဆၩဆၧလုထၪ့နီၪလီၫႉ ဆၧထံၪလၩ့ဒီၪလၩ့ယီၩနီၪ မၩဝ့ၫဒၪလၧ ဒိၩ့ပၥံၫ့ မယၩ့ခၠီၩ့ ယ့ၫၡုၬအၥၭဆံၫ့ဎံၫၥရိၬဖၧၩ့နီၪလီၫႉ

ၦလၧအလ့ၩခိၪလ့ၩနါမံဆၩဆၧလုထၪ့နီၪ မွဲဝ့ၫဒၪလၧဒိၩ့ပၥံၫ့ဆၧအီၪကီၪ့ၥၫ့ခိၪဒိၪBp. ဟင်နရီ မန်းအိုင်ခလိန် နီၪလီၫႉ မံဆၩလချူၭစၭထၪ့ဒံၭဘၪနီၪ ၥၫ့ခိၪဒိၪဆိၪဂ့ၩဆိၪဘွၩ ဖါဇူၫဇဲၫ အဂၩ့နီၪလီၫႉ ဂီၩ့နီၪ ၥၫ့ခၫဒိၪ ဖာသာရ်ဂျိမ်း(စ်)အိုင်ရှူ နီၪ ဖီလၩ့ဖ့ၪနဲၪဘၪ ဆၧကဲၪထၪ့ဘိၪ့ခိၪ ၥၫ့ခၫဆၧမၩလိၪလးအဖးဖီၩ့အဂဲးနီၪလီၫႉ

ဆၧမၩလိၪလးယီၩနီၪ ဂဲၫထဲၩ့အီၪဖျဲၪထၪ့န့ ၥၫ့ခိၪဒိၪ ၅ဂၩဒဲ ၥၫ့မုၥၫ့ခၫအဂၩ ၁၁၀ယူၭနီၪ လီၫႉ ဘဲၫယီၩဆၧမၩလိၪလးခိၪနါနီၪမွဲလၧ ၥၫ့ခၫFr.Albert ညာဏ်စိုးငြိမ်းႇ နးၥၭအဂး ၦမူၩဒၩ အီၪနီၪ မွဲလၧ Fr.Noah ဂီၩ့ ၦလၧအဘၪပၧၩ့ၥနိၫ့နီၪ မွဲလၧ Fr.James စအဲၪၡူၪ နီၪလီၫႉ

ၥၫ့ခၫFr.Albert ညာဏ်စိုးငြိမ်း နီၪ စံၭဝ့ၫဒၪ “ဆၧကိၭမံၩ့နီၪမွဲလၧယွၩလီၫႉ ဆၧၥုၪ့ဎွံၪၥၭ ယီၫနီၪဆ့ မွဲဒၪအီၪဂဲၫလၧယွၩအအီၪလီၫႉ ၦၡၩလဂၩအဆၧမုၬလၩနီၪဆ့ မွဲဒၪဝ့ၫလၧကဆါယွၩ အစီၩ့အမၩ့ဆံၭႉ ပစီၪဎီၩ့လၧအမ့ၬယၫအိၩနီၪ ဘဲၫယီၩၦၡၩဂဲၫကဲၪ ၥၫ့ခၫလၩ့ၡၩဝ့ၫဒၪယူၭႉ အဂဲးနီၪဘိၭဆီၪ့ဘိၩ့ဒံၭႉ လါနၫ့ယမိလီၩဘၪ ၥၭဘၪ့ခွၫၥံၪနီၪဘိၭ ကဆါယွၩအဆၧဂ့ၩဆၧဘွၩ နီၪ ပဆဲးယိမၬပၥ့ၪယၫဝ့ၫဒၪလီၫႉ ဆၧနီၪအကၠီၩ့ ဂဲၫစိၩလၧဆၧအလးယီၩဂီၩ့ ဂဲၫဆဲးယိယွၩ အဆၧဂ့ၩဆၧဘွၩ ဂဲၫလီၩ့ဎွါထၪ့ယွၩအဆၧဂ့ၩဆၧဘွၩအဂးလါဆံၭနီၪဘိၭ ယကိၭဖံၭၥိၭဘၪ ၥၭဘၪ့ခွၫၥံၪနီၪလီၫႉ”

လကၭဘၪ ၦလၧအဂဲၫထၪ့ ဆၧမၩလိၪ ဒဲ ဆၧမၩလိၪဖိၪၥံၪအကျၩ အဎိၩလဂၩမွဲဝ့ၫဒၪ Komas နီၪစံၭဝ့ၫဒၪ “ယမိဖ့ၪဆၧၫ့လၩ့ယၥၭလၧ ကဆါယွၩအဆၨၩဖိၪၥံၪအဂးအကၠီၩ့ ယဂဲၫ ထီၩ့စိၩလၧ မယၩ့ခၠီၩ့ယီၩနီၪလီၫႉ ယကဂဲၫလၧယီၩအဂးနီၪ ဆၧကၪဆၧဂဲၩ အီၪဝ့ၫဒၪကနၩ့ဆ့ နီၪလီၫႉ ဘၪထွ့ၫလၧယဂံၪ့ဒီၪ့ အဆၧကၪဆၧဂဲၩမွဲအီၪ ယဆၧကိၪ့ဘၪကိၪ့ၥ့ၪအဂးဆ့ မွဲဆၧကၪ ဆၧဂဲၩအီၪဆ့နီၪလီၫႉ ၦၡၩမၩလၩမၩဖၩ့ ယူၫဘလံၫယီၩအခံၫ့ ပၥ့ၪယၫထဲၩ့ဘၪ ဆၧမၩလိၪလး ယီၩအဖးဖီၩ့အဂဲး လကၭဘၪပဒၪဘၪ ၥၫ့မုၥၫ့ခၫလဖၪ ဂဲၫဝ့ၫဒၪအၪမၬလ့ၬအခၫ ပကမိကဲၪ ၥၫ့ခၫပၥၭအဂဲး ဂဲၫဆီၪ့ထၪ့ ဒဲ ဆၧမၩလိၪလးကၠီးယီၩ ဂဲၫထဲၩ့အီၪထၪ့ ထၪ့ဘၭ၇၈နံၪ့ယူၭ အကၠီၩ့ ယအီၪက့ၪဖိၫလိၫဘၪ ဒိၪဒိၪအၪအၪလ့ၬနီၪလီၫႉ”

နးအဲၪဖီၫဘွၩ