နံၪ့၂၀၂၅နံၪ့ လၩယူၫ၁၆ၥၫ့ လဂီၩ(၈နၩရံၫ)အခံၫ့နီၪ ဆၧမၩလၩမၩဖၩ့ ကလဲရေးရှင်းဘိၪ့ခိၪၥၫ့ခၫလဂၩ အဆၧထံၪလၩ့ဒီၪလၩ့အီၪဝ့ၫဒၪလၧ ထံၫခိၭဖံးဆၧအီၪကီၪ့ ထံၫခိၭဖံးတဝၫ့နီၪလီၫႉ  

လၧခးပယၩ့အဖၧၩ့ ၦအကဲၪထၪ့ဘၪ ကလဲရေးရှင်းၥၫ့ခၫ အီၪဒၪ ၃ဂၩဒံၭနီၪလီၫႉ လၧ၃ဂၩနီၪအဖၧၩ့ Fr.Dominic ဖိၩချံၫ့ယီၩဆ့ မွဲပၫဆ့ နီၪလီၫႉ

လၧမံဆၩဆၧလုထၪ့အထးဖၧၩ့ ၥၫ့ခၫအၥၫ့ Fr.Dominic ဖိၩချံၫ့ စံၭဝ့ၫဒၪ“အဆိၪထုၬ ယစံၭထၪ့အၪ့အုၭဘၪ ကဆါယွၩ အဆၧဆိၪဂ့ၩ ဆိၪဘွၩအဆၧယၪ့ၥၭလီၫႉ ၦလၧအဂဲၫထၪ့ ဘိၪ့ထၪ့ဘၭထၪ့ မံဆၩဆၧ လုထၪ့ယီၩမွဲလၧၥၫ့မုၥၫ့ခၫထီးလူၬ မံၭထၬမုၪႇခွၫလဖၪထီးလူၬ ဆၧ ဘိၪ့ဆၧဘၩဖိၪၥံၪထီးလူၬနီၪ ယစံၭခိးစံၭတၩဘၪနီၪလီၫႉ ပကဲၪၦၡၩနီၪ မွဲဆၧဂဲးဆါဘၭဆါအီၪဝ့ၫဒၪကိၭဂၩဒ့ၭလီၫႉ ယၧၩဆ့ယဆၧဂဲးဆါဘၭ ဆါ အီၪဝ့ၫဒၪအၪမၬလီၫ လါနၫ့ကဆါယွၩရွံအၪ့ထုၪ့ယၧၩလီၫႉ ဘဲၫနီၪ အၥိၭယမိယဖါနံၫဂၩဆ့မွဲ အဆၧဂဲးဆါဘၭဆါအီၪဆ့လီၫႉ ဆၧချဲၩ့ အၪလိၬၥၭအီၪလါနၫ့ လၩ့ဖၭလိၬၥၭအ့ၬဂီၩ့ ခီၩ့နးမုၪယီၩကကၠၪ ဂဲၫထဲၩ့ အီၪဎုၬလိၬၥၭန့ကၠၧၫ့ကၠၧၫ့နီၪဆ့ မွဲလၧကဆါယွၩအခိးအတၩလီၫႉ ဘဲၫယီၩနီၪ ယကဲၪထၪ့ၥၫ့ခၫယူၭႉ ထၧၩ့ယကကဲၪဘၪၥၫ့ခၫအဂးနီၪ ယဘၪဂဲၫထဲၩ့ကျ့ၭစၨၭ၁၇နံၪ့နီၪလီၫႉ  လၧ၁၇နံၪ့အထးဖၧၩ့ယီၩ ယမိစဲၪ့ လၫ့, ယမိခ့ၬလၫ့ထဲၩ့အလးခဲၫ့, အခံၫ့အီၪအၪဘျၩ့ဒ့ၭနီၪလီၫႉ လါနၫ့မွဲ လၧယွၩအခိးအတၩအကၠီၩ့ ယဂဲၫထဲၩ့ခၫ့ဖၭခွံၬဆၧလဖၪနီၪန့နီၪလီၫႉ တခၩပကရွံထၪ့ ဆၧၥၭမၧၫ့နးမံၩ့ ပကဘၪအီၪလၧဆၧဆံၫ့ဎံၪဖၧၩ့အ ဂး ပဆၧအီၪကီၪ့ယီၩ ၥီၪ့ၥၫ့ထၬပၧၩအီၪနီၪ ပကဘၪလီၩ့ဖိၬခိၭနၪဝ့ၫဒၪ ကိၭဂၩနီၪလီၫႉ”

လကၭဒံၭဘၪ Fr.Edwardနီၪဆ့ ဖီလၩ့ဘၪ စံၭခိးစံၭတၩ လံၬဆိၫ့ ဂ့ၩဆိၫ့ဘွၩဘဲၫယီၩအၥိၭနီၪလီၫႉ”မၩ့စၫ့အ့ၩ ဒဲ ဂါခ့ၫၥၩ့ၥံၪ နၥံၪဂဲၫထဲၩ့ ယိထဲၩ့ခွါထဲၩ့ နၥံၪအဖိၪခွၫယီၩ ထၧၩ့ကဲၪထၪ့ ၥၫ့ခၫကဂၩဂီၩ့ နၥံၪလု ထၪ့နၥံၪအဖိၪခွၫယီၩ လၧဆၧအီၪကီၪ့အဂးအကၠီၩ့ ပစံၭခိးစံၭတၩဘၪ နၥံၪ ဒိၪဒိၪအၪအၪလ့ၬတၭ ပအီၪက့ၪဖိၫလိၫဘၪနၥံၪ လၧစံၭခိးစံၭတၩ လံၬဆိၫ့ဂ့ၩဆိၫ့ဘွၩယီၩနီၪလီၫ” လံၬဆိၫ့ဂ့ၩဆိၫ့ဘွၩယီၩနီၪ ကဘၪဖ့ၪလၫ့အ့ၪ ၥၫ့ခၫအၥၫ့ Fr.Dominic အမိအဖါနီၪလီၫႉ ဘၪဖ့ၪလၫ့အ့ၪဝ့ၫ အခီၫပယီၫနီၪဘိၭ မွဲလၧမိဖါနံၫဂၩယီၩ ဖ့ၪလၫ့ခွံၬအဖိၪခွၫယီၩလၧ ဆၧအီၪကီၪ့အဂးအ ကၠီၩ့ စံၭခိးစံၭတၩဝ့ၫဒၪဒဲ အီၪက့ၪဖိၫလိၫဝ့ၫဒၪ အခီၫပယီၫနီၪလီၫႉ

အဝ့ၫယီၩနီၪ လၧအဖီၩ့ခွံၬ၂၀၂၅နံၪ့ လၩမ့ၫ၃၁ၥၫ့အိၩ ကဲၪထၪ့ဘၪ ၥၫ့ခၫ လၧခးဖံလံပဲၫ့အိၩနီၪလီၫႉ

ၦလၧအဂဲၫထဲၩ့ ၥုၪ့ထၪ့ထၬ ကလဲရေးရှင်း ဘိၪ့ခိၪၥၫ့ခၫခရၧၫ့ယီၩနီၪ မွဲလၧ St. Anthony Mary Claret ဂီၩ့ ဂဲၫထဲၩ့ၥုၪ့ထၪ့ထၬဝ့ၫ မုနံၩမုၥၫ့နီၪ ဘိၭ မွဲလၧ1849နံၪ့ လၩJuly16ၥၫ့ဒဲ ဂဲၫထဲၩ့ၥုၪ့ထၪ့ထၬဝ့ၫအလးနီၪ မွဲလၧ Spainထံၫခးႇ Vicဝံးဖၧၩ့နီၪလီၫႉ

ထီးမုဆၫကနံၩယီၩအထီ ကလဲရေးရှင်းခရၧၫ့ဖိၪၥံၪထီးလူၬ အီၪဝ့ၫဒၪ ဖိၭဘိၭအဂၩ၃၀၀၀ဘျဲၪယူၭနီၪလီၫႉ လၧအဂၩ၃၀၀၀ဘျဲၪဖၧၩ့ ၥၫ့မုၥၫ့ခၫ လဖၪႇ မံၭထၭခွၫလဖၪ ဒဲ ဆၧမၩလိၪဖိၪၥံၪလဖၪ ပၫဝ့ၫဒၪနီၪလီၫႉ

အဝ့ၫၥံၪအခရၧၫ့ယီၩ လၧခးၥဲၫထၧၫ့ဘံၪ့ယၫအဖၧၩ့ လ့ၩလီၩ့ဖီၪ့ထၪ့ ယွၩအဆၧဖံၭဆၧမၩ လၧထံၫခး၇၀ဘျဲၪအဖၧၩ့နီၪလီၫႉ

ခရၧၫ့ယီၩနီၪ ကဆါယွၩအဆၧအဲၪမ့ၪဒိၩ့ဖၧၩ့ ဘၪလီၩ့ရၩလၩ့ ယွၩလူ ယွၩထၫႇ ဘၪဆူနဲၩဒိၭနဲၩ့ၥၭလၧ မိမၫရံၫအၥၭဆံၫ့ဎံၫဖၧၩ့ ဒဲ ဘၪလီၩ့ဖီၪ့ ထၪ့ဖံၭထၪ့ ယွၩအဆၧဖံၭဆၧမၩလဖၪနီၪလီၫႉ

ဘၪထွ့ၫလၧ ဆၧအီၪကီၪ့ဖၧၩ့ အဝ့ၫၥံၪဘၪမၩဝ့ၫဒၪလဖၪနီၪ ဘၪရၩလၩ့ ယွၩလူယွၩထၫႇ ဘၪလီၩ့မၩဆၧၩ့ ဆၧအီၪကီၪ့လဖၪႇ ဘၪလီၩ့မၩဒိၪထၪ့ ထီၫထၪ့ ဆၧကိၪ့ဘၪကိၪ့ၥ့ၪအနိၫ့ ဒဲ ဆၧဘိၪ့ဆၧဘၩအနိၫ့ႇ ဘၪမၩထၪ့ မံၫဒံၫယၫ ဆၧဖံၭဆၧမၩလဖၪဒဲ ၡၩခရၧၫ့ဖၧၩ့ ဆၧဘၪလိၬဎွ့ၪဎီၩ့ ကအီၪ ထၪ့အဂးႇ ၦၡၪ့ဖိၪယၬဖိၪၥံၪအီၪဝ့ၫဒၪ အလးယဲၩ့ယိၬလဖၪနီၪ အဝ့ၫၥံၪ ယီၩ ဘၪလ့ၩမၩ ဆၧအီၪကီၪ့အဆၧမၩႇ ဘၪထုၬထၪ့ဘၪထွ့ၫလၧ ကလဲ ရေးရှင်းအဂဲးအဖးလံၬလဖၪႇ ဘၪကၩ့ကၩဎိၭလၩ့ဆၧလၧ ဆၧဘိၪ့ဆၧ ဘၩဂူၫဂၩလဖၪႇ  ၥၭဘၪ့ဒဲဆၧအီၪမၧၫ့အီၪဂဲၩအဂး ဆၧဖံၭဆၧမၩလဖၪႇ ဆၧဎူၫဆၧဎၩ့ဒဲ ၡၩခံးဂးအဂး ဘၪလီၩ့မၩဂဲၩဝၭထၪ့ဝ့ၫဒၪနီၪလီၫႉ

နးအဲၪဖီၫဘွၩ