နံၪ့၂၀၂၅နံၪ့ လၩယူၫ၇ၥၫ့ လဂီၩ၈နၩရံၫခီၫဒဲ ထီၩ့စိၩလၧလဂၫလၩ့ ၄နၩရံၫ၂၀မံန့အခံၫ့နီၪ ဝံးတခိၩ့ဆၧအီၪကီၪ့အဖၧၩ့ ခရၧၫ့ဖိၪၥံၪလဖၪ မၩဎိၭလၩ့ကၠၭ ယူၩဘလံၫဆၧထံၪလၩ့ဒီၪလၩ့လၧ St. Mary Cathedral ၥရိၬလးဝၩ့ဖၧၩ့နီၪလီၫႉ

လၧဆၧထံၪလၩ့ဒီၪလၩ့နီၪအဖၧၩ့ St. Vincent De Paul, Focolare , Missionaries Family of Christ, Fondacio, Association of Spreading Eternal Gospel to all nations ခရၧၫ့ဖိၪၥံၪလဖၪဂဲၫထၪ့ မၩဎိၭလၩ့ကၠၭဝ့ၫဒၪကၠၧၫ့ကၠၧၫ့နီၪလီၫႉ ဆၧထံၪလၩ့ဒီၪလၩ့နီၪစၭထၪ့ဝ့ၫဒၪလၧ ဂဲၫနုၬလၩ့စိၩလၧၥရိၬဖၧၩ့ လၧယူၩဘလံၫတရၫ့အဖိးနီၪဂီၩ့ ကိုဇေးဗီးယဲနီၪ လီၩပျၩ့ဖ့ၪနဲၪဘၪ ယူၩဘလံၫလိၫဂိၫအဂဲးအဖးနီၪလီၫႉ

လကၭဘၪခရၧၫ့ ကခရၧၫ့ဘၪကခရၧၫ့နီၪ လီၩပျၩ့ဖ့ၪနဲၪထဲၩ့အဝ့ၫၥံၪ အခရၧၫ့အဂဲးအဖးလဖၪဂီၩ့ ဖ့ၪနဲၪထၬကၠၭ ဆၧဖ့ၪနဲၪဒူၭဒံၭနီၪလီၫႉ လၩ့လၧမုဆၫခီၫနီၪ ၥၫ့ခိၪဒိၪ Bishop Francis Than Tun လ့ၩခိၪလ့ၩနါ ဆၧဘိၪ့ထၪ့ဘၩထၪ့ၡီၩ့ ကိၪဘိၪ့ဆံၫ့ဎံၪႇ ဆၧအၪ့ယၫထဲၩ့ဆၧဒဲၩဘၭဆၧကွဲၪဖျါ ဒဲ မံဆၩဆၧလုထၪ့နီၪလီၫႉ

Bishop Raymond Wai Lin Tun နီၪ လၧမံဆၩဆၧလုထၪ့အထးဖၧၩ့ လီၩလၩ့လါလၩ့ဆၧၥၭထိၬပရၧၫ့ဘဲၫယီၩအၥိၭနီၪလီၫႉ “ဆၧအီၪကီၪ့ဖၧၩ့ ခရၧၫ့လဖၪနီၪ မွဲလၧၥၭၥုဆံၫ့ဎံၪအစီၩ့အမၩ့အကၠီၩ့ ဂဲၫကဲၪထၪ့ဂီၩ့ မွဲကဘၪကဲၪထၪ့ကၠၭ ဆၧၥၭထိၬပရၧၫ့အဆၧဖၩ့တၭ ကဘၪလီၩလၩ့လါလၩ့ယွၩလူယွၩထၫနီၪလီၫႉ ဘဲၫၥၫ့ဎွၩဒိၪ Pope Benedict XVIစံၭထၬဝ့ၫအၥိၭ ဆၧအီၪကီၪ့ခရၧၫ့ဖိၪလဖၪယီၩနီၪ မွဲလၧၥၭမုဆံၫ့ဎံၪအဆၧဖံၭဆၧမၩနီၪလီၫႉ”အဂဲး ၥၫ့ခိၪဒိၪ Bishop Raymond Wai Lin Tun ယီၩ စံၭဝ့ၫဒၪဘဲၫယီၩအၥိၭနီၪလီၫႉ

လကၭဘၪ Msgr. Andrea အၪ့ကံၩ့အၪ့ယၫထၪ့ ဘဲၫၥိၭၦၡၩကအၪ့ကံၩ့ဘၩဆိၪဖၪအ့ၪ ၥၫ့ဎွၩဒိၪPope Leo XIVအဂးႇ ကနၪ့ထၪ့အၪ့ကံၩ့ဘၩဆိၪဖၪအ့ၪ ၦလၧအဂဲၫထဲၩ့အီၪက့ၪထၬ ယူၩဘလံၫအနံၪ့ယီၩလဂၩမွဲဝ့ၫPope Francisအဂးႇ ၥၭမုဆံၫ့ဎံၫယွၩနီၪ ကဂဲၫဆိၬန့အ့ၪပၧၩ ဆၧၥၭမၧၫ့အၥၫ့ႇ ဆၧအဲၪဆၧကွံၩႇ ဆၧဎူၫဆၧဎၩ့ ဒဲ ဆၧပျီၩဖျ့ၭအဂဲးႇ Msgr. Andreaယီၩစံၭဝ့ၫဒၪနီၪလီၫႉ

ဂီၩ့နီၪ Focolareခရၧၫ့ Mrs. Winny နီၪ လီၩလၩ့လါလၩ့ဝ့ၫဒၪ နးၥၭအဂဲးဘၭ မွဲလၧပကအဲၪပဘူၭပနဲၩ့ ဘဲၫပအဲၪလၩ့ပၥၭအၥိၭဒဲ ပကဘၪအဲၪပဒုၪဒၩလဖၪအဂဲးနီၪလီၫႉ ပကအဲၪပဘူၭပနဲၩ့အဂးနီၪ အဆိၪထုၬ ပကဘၪစၭထၪ့ဝ့ၫဒၪလၧပဂံၪ့ဒီၪ့အဖၧၩ့ႇ လၧပဂံၪ့ဒီၪ့အဖၧၩ့ ဆၧနၪၥ့ၪလိၬၥၭလအီၪဘၪအထီ ပဘၪဒၪဆၧၫ့ယၫလၧဆၧဂဲၩအခံၫ့ ပကဘၪအဲၪလိၬၥၭ ဆၧအယီၩနီၪ အခီၫပယီၫအီၪမီၪ့ဎီၩ့ ဘဲၫပအဲၪပယွၩ အအီၪလၧထုၪ့စူၪယၫလီၩ့အဂဲးနီၪလီၫႉ

ဆၧအီၪကီၪ့ခရၧၫ့ဖိၪၥံၪယီၩနီၪ လၧဆၧအီၪကီၪ့အဖၧၩ့ အဝ့ၫၥံၪယီၩ လီၩ့မၩဆၧၩ့ၦၡၪ့ၦယၬဖိၪၥံၪႇ လ့ၩအီၪကွ့ၩၦဆူၭၦဆၫဖိၪၥံၪႇ လၧခရၧၫ့အဖၧၩ့ အၪ့ကံၩ့ဘၩဆိၪဖၪအ့ၪၦၡၩအဂးႇ လီၩ့ယိထဲၩ့ခွါထဲၩ့ ၦလၧအဘၪလီၩ့စဲၪ့မံၩ့ဂၭဖျိၭလဖၪႇ မွဲလၧဖူၫဆံၫဂုအကၠီၩ့ ၦဘၪဒၪဆၧၫ့ယၫဆၧကၪဆၧဂဲၩလဖၪအဂး အဝ့ၫၥံၪအခရၧၫ့လဖၪယီၩ လီၩမၩဆၧၩ့အ့ၪဝ့ၫဒၪ ဘဲၫယီၩၥိၭအဂဲး ပန့ဘၪဆၧပရၧၫ့ယီၩ လၧRVA ဖျိၩ့ၡၩ့အအီၪနီၪလီၫႉ

နးအဲၪဖီၫဘွၩ