နံၪ့၂၀၂၅နံၪ့ လၩယူၫ၇ၥၫ့နီၪ ၥၫ့ခိၪဒိၪHenryမၩ့အဲၪချံၫ့ ဝဲထၪ့အ့ၪ မိုင်းနားစင်မနာရီ (၂၀၂၅-၂၀၂၆)ဆၧမၩလိၪလံၬအနံၪ့ လၧဒိၩ့ပၥံၫ့ႇ မယၩ့ခၠီၩ့ႇ ယ့ၫၡူၬအၥၭဆံၫ့ဎံၫၥရိၬဖၧၩ့ႇ လၧမံဆၩဆၧလုထၪ့နီၪလီၫႉ

လၧမံဆၩဆၧလုထၪ့အဖၧၩ့ ၥၫ့ခိၪဒိၪအဲၪချံၫ့ လီၩလၩ့လါလၩ့ဝ့ၫဒၪ “လၧပၥၭဆံၭဒံၭ အထီ ပၥီၪ့ဘၪလံၬနီၪ မွဲလၧဆၧဆိၪဂ့ၩဆိၪဘွၩကမံၩ့နီၪလီၫႉ ပၥီၪ့ဘၪလံၬအကၠီၩ့ ပဒိၭန့ဘၪ ယွၩအခိးအတၩအဂဲးပၥ့ၪယၫဘၪလီၫ. ဘဲၫနီၪအၥိၭ ယူၩဘလံၫအနံၪ့ယီၩ မွဲလၧဆၧဆိၪဂ့ၩ ဆိၪဘွၩအနံၪ့အကၠီၩ့ ကနံၪ့ယီၩဆၧမၩလိၪအနံၪ့ထၧၫ့နံၪ့ယၫအဖၧၩ့ ဘဲၫၥိၭနၥံၪကဒိၭန့ဘၪ ယွၩအဆၧဆိၪဂ့ၩဆိၪဘွၩအဂး နၥံၪကဘၪအၪ့ကံၩ့ဘၩဆိၪဖၪနီၪလီၫႉ လကၭဘၪ ကိမုဆဲၪ့ နံၩနီၪ မွဲလၧၥၭမုဆံၫ့ဎံၫကဆါယွၩအဘိၪ့မုနံၩအကၠီၩ့ ဘဲၫၥိၭၥၭမုဆံၫ့ဎံၫယွၩ အဆၧဖၩ့လၩ့ဘၪ လၧ ၦထံၩဖျဲၥံၪဒဲမိမၫရံၫအဖၫ့ခိၪဂီၩ့ အဝ့ၫၥံၪယီၩ အဂုအိၩကဘၪလီၩလၩ့လါလၩ့ ယွၩအလူ အထၫအဂး ၥၭမဲၪကၠၭဆၧလါနၫ့ဂ့ၩ စၭထၪ့လၧအခံၫ့နီၪ အဝ့ၫၥံၪယီၩ လၧဆၧၥုၪ့ဒူၩၥၭဒူၩဖၧၩ့ လီၩလၩ့လါလၩ့ထဲၩ့ ကဆါယွၩအဆၧၥၭထိၬပရၧၫ့ဘၧၫ့ထဲၩ့ဝ့ၫနီၪလီၫႉ ဆၧအယီၩမွဲလၧ ၥၭမုဆံၫ့ဎံၫယွၩအစီၩ့အမၩ့နီၪလီၫႉ နၥံၪကဘၪစၭထၪ့မၩလိၪဆၧမၩလိၪလဖၪအဂး မွဲၥၭမု ဆံၫ့ဎံၫယွၩ အဆၧဆိၪဂ့ၩဆိၪဘွၩ ကလိၪဝ့ၫဒၪတၡါလီၫႉ မွဲလၧၥၭမုဆံၫ့ဎံၫယွၩအကၠီၩ့ နၥံၪကၥီၪ့လိၪဘၪလံၬဂ့ၩဂ့ၩဘၪဘၪႇ နၥံၪကဒုၭဆၧၫ့ထဲၩ့ ဆၧကၪဆၧဂဲၩ ဆၧပလၧၫ့ ပလဲၩလဖၪကန့အဂးဒဲ လၧဆၧဆီၪ့ဆၧချဲၫ့ဖၧၩ့ ဘဲၫၥိၭနၥံၪထၪ့ဆၧမၩလိၪ ကန့ထၧၫ့နံၪ့ယၫ အဂးနီၪ နၥံၪကဘၪအၪ့ကံၩ့ဘၩဆိၪဖၪလၧ ၥၭမုဆံၫ့ဎံၫယွၩ အအီၪနီၪလီၫႉ ဘဲၫနၥံၪအၥိၭ ၥၭဘၪ့ဖိၪၥံၪကနၩ့နၩ့နီၪ မိထၪ့ဆၧမၩလိၪလါနၫ့ ထၪ့ဘၪဝ့ၫအ့ၬ ဘၪလီၩ့ဎွါအၪ့ဘဲၫနီၪ အီၪအၪမၬဒ့ၭႉ ဆၧနီၪအကၠီၩ့ နၥံၪထၪ့ဘၪ ဆၧမၩလိၪအခံၫ့ယီၩ ကျ့ၭစၨၭမၩလိၪကၠၭ ဂ့ၩဘၪစဲၪ့အဂးနီၪ ယမိဆၫ့ထွ့ၫဘၪနၥံၪနီၪလီၫႉ ဆၧအလးယီၩနီၪ မွဲလၧၦကကဲၪထၪ့ ၦဆိၬၥၫထနၫလဖၪအလးအကျဲၩ့နီၪလီၫႉ” အဂဲး ၥၫ့ခိၪဒိၪယီၩ ဖ့ၪဂဲးဖ့ၪဘၭ ဆၧမၩလိၪဖိၪၥံၪ ဘဲၫနီၪအၥိၭလီၫႉ

လၧဒိၩ့ပၥံၫ့မယၩ့ခၠီၩ့ ယ့ၫၡူၬအၥၭဆံၫ့ဎံၪၥရိၬ လးဝၩ့အဖၧၩ့ ကနံၪ့ယီၩအထးဖၧၩ့ မိုင်းနားစင်မနာရီ ဆၧမၩလိၪဖိၪထီးလူၬအီၪ၄၂ဂၩႇ ၦလၧအဲၪဒိၭကဲၪထၪ့SFXမံၭထၭခွၫအဂး ဆၧမၩလိၪဖိၪအီၪ၁၂ဂၩ ဒဲ ၦလၧကကဲၪထၪ့ SFXမံၭထၭမုၪအဂး ၦထၪ့ဆၧမၩလိၪ အီၪဝ့ၫဒၪ ၁၈ဂၩအဂဲး ပန့ဘၪဆၧပရၧၫ့ယီၩလၧ မွန်ဆီညှော် ဖာသာရ်ပီဦး ဝင်းသန်းအအီၪနီၪလီၫႉ

နးအဲၪဖီၫဘွၩ